Inyambo zazamuye umubare w’abasura mu Rukari ugera ku bihumbi 50

  • MUTETERAZINA SHIFAH
  • Werurwe 23, 2024
  • Hashize ukwezi 1
Image

Ubuyobozi bw’Inteko y’Umuco buratangaza ko gushyira Inyambo mu nzu ndangamurage y’i Nyanza mu Rukari, byatumye abahasura biyongera bakava ku bihumbi 14 bakagera ku bihumbi 50 ku mwaka.

Ni ibyagarutsweho n’Intebe y’Inteko Prof Masozera Robert kuri uyu wa Gatandatu tariki 23 Werurwe 2024, ubwo i Nyanza mu Rukari haberaga Iserukiramuco ryo kumurika Inyambo ryaherukaga kuba mu myaka 70 ishize, kuko zamuritswe bwa mbere mu Rwanda mu 1954.

Ubundi kumurika Inyambo mu muco Nyarwanda bigaragaza isano iri hagati y’umuntu n’inka, kuri iyi nshuro imitwe y’Inyambo ikaba yamurikiwe ku kibuga cy’ingoro yo kwigira  iri ahitwa ku Rwesero mu Karere ka Nyanza, hakaba hanagaragajwe umwihariko wazo bitewe n’agace zivamo.

Intebe y’Inteko Prof. Robert Masozera avuga ko kuva Ingoro y’Amateka y’Abami yashyirwamo muri 2011 abantu bahasuraga batari benshi.

Ati: “Ariko kuva aho zitangiye kumurikirwa hariya mu Rukari, umubare wariyongereye, kubera ko twavuye ku bihumbi 14 ubu tumaze kugera ku bihumbi 50, iki gikorwa noneho nikizajya kiba ngarukamwaka, murumva ko nabyo bizongera bwa bukerarugendo bushingiye ku muco.”

Bamwe mu Banyarwanda bitabiriye iri serukiramuco, bagaragaje kunyurwa n’ibyo beretswe, ariko banasobanura ko bishimiye cyane ko Inyambo zongeye kugaruka ku gicumbi.

Umwe muri bo yagize ati: “Ubundi aho hari igicumbi cy’umuco, ari i bwami, noneho ni uko Inyambo zongeye kugaruka ku gicumbi, icyo nakwifuza ni uko zakwira Uturere tw’u Rwanda n’abana bavuka n’abavutse kera bakabona Inyambo.”

Mugenzi we ati “Abanyarwanda kuva kera hose, kugira ngo umuntu ajye kugira ishingiro agira ni ukuba atunze inka, ubundi kandi kugira ngo azagire umugeni ni ukuba afite inka, ni zo zimugeza ku cyo ashaka kugira ngo abe icyo ari cyo.”

Abanyamahanga bo batunguwe ndetse banakunda uburyo ibirori byo kumurika Inyambo byari biteguwe, kuko inka beretswe zasaga neza cyane, bitandukanye n’izo basanzwe babona hirya no hino aho bagenda.

Umuyobozi w’Intara y’Amajyepfo Kayitesi Alice, avuga ko bizera neza badashidikanya ko abantu basura ingoro yo mu Rukari bazakomeza kwiyongera.

Ati: “Ni igikorwa kizazamura umubare wa ba mukerarugendo bagendereraga iyi ngoro, ariko kandi bikanazamura ubukungu bwayo, kuko uko basura ni ko banagira ikiguzi batanga, ndetse bakanagenda batubera ba Ambasaderi n’ahandi hirya no hino.”

Ingoro y’umwami iri mu Rukari, hamwe n’iyo kwigira iri ku Rwesero zakira nibura abantu ibihumbi 50 ku mwaka, zikaba zinjiza arenga miliyoni 100 ku mwaka.

  • MUTETERAZINA SHIFAH
  • Werurwe 23, 2024
  • Hashize ukwezi 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE