Intumwa za Cote d’Ivoire zashimye imyitwarire ya Polisi y’u Rwanda

  • Imvaho Nshya
  • Mata 1, 2022
  • Hashize imyaka 2
Image

Kuri uyu wa Kane tariki ya 31, Werurwe, itsinda ryaturutse muri Cote d’Ivoire rigizwe n’abapolisi n’abandi baturutse mu nzego zitandukanye riyobowe na Traore Wodjo Fini, umujyanama wa Minisitiri w’umutekano ryasuye ibikorwa bitandukanye bya Polisi y’u Rwanda ikorera mu Karere ka Rubavu.

Iri tsinda ryashimye imyitwarire myiza iranga abapolisi b’u Rwanda n’uburyo bakora akazi kabo by’intangarugero haba mu Rwanda no mu mahanga.

Bakiriwe n’Umuyobozi wa Polisi mu ntara y’Iburengerazuba Assistant Commissioner of Police (ACP) Edmond Kalisa, abasobanurira uko umutekano uhagaze, ishusho y’ibyaha muri iyi Ntara, abasobanurira n’uruhare rwa Polisi mu gucunga umutekano nubwo hari imbogamizi z’i byaha byambukiranya umupaka bihagaragara.

Yakomeje avuga ko iyi ntara y’Iburengerazuba kimwe n’izindi Ntara z’igihugu  umutekano  uhagaze neza, uretse ko ho hakunda kuboneka ibyaha byambukiranya umupaka binyuranije n’amategeko cyane cyane abambutsa ibiyobyabwenge, magendu n’ibindi byaha, Polisi y’u Rwanda ikaba ifatanya n’izindi nzego ndetse n’abaturage mu guhangana n’ibyo byaha.

Iri tsinda ryasuye ahantu hatandukanye harimo;  La Corniche One Stop Border Post; umupaka uhuza u Rwanda n’igihugu cya Repubulika iharanira Demokarasi ya Kongo aho beretswe uko Polisi y’u Rwanda icunga urujya n’uruza rw’abaturage n’ibinyabiziga byambukiranya imipaka.

Traore yashimiye imyitwarire myiza iranga abapolisi b’u Rwanda n’uburyo bakora akazi kabo neza bafatanije n’abaturage.

Yagize ati:”Twishimiye gusura iyi Ntara, tukibonera uburyo abaturage bakorana n’inzego z’umutekano hagamijwe umutekano n’ituze ry’abaturage.”

  • Imvaho Nshya
  • Mata 1, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE