Intore itoza icyo iri cyo ntitoza icyo izi gusa – MINEDUC

  • Imvaho Nshya
  • Ugushyingo 11, 2023
  • Hashize amezi 4
Image

Indemyabigwi ni Umutwe w’Intore zigizwe n’abayobozi 420 b’ibigo by’amashuri y’imyuga, tekinike n’ubumenyi ngiro barangije itorero bari bamazemo iminsi 10 mu kigo cy’ubutore cya Nkumba mu Karere ka Burera mu Ntara y’Amajyaruguru.

Minisiteri y’Uburezi (MINEDUC) yasabye intore kuzagaragariza abo ziyobora kunoza umurimo, kuwukorana ubuhanga ndetse no kuwukorera ku gihe.

Byagarutsweho na Irere Claudette, Umunyamabanga wa Leta muri Minisiteri y’Uburezi ushinzwe Ikoranabuhanga n’Amashuri y’Imyuga n’Ubumenyingiro, ku wa Gatanu tariki 10 Ugushyingo ubwo hasozwaga itorero ry’Indemyabigwi.

Insanganyamatsiko y’iri torero yagiraga iti ‘Kwimakaza umuco w’Ubutore mu mashuri ya TVET, umusingi w’iterambere ry’Igihugu’.

Irere yabwiye intore ko amashuri ziyoboye ategerejweho impinduka zikomeye u Rwanda rukeneye mu bukungu ndetse n’imibereho y’abarutuye abibutsa ko intore itoza icyo iri cyo.

Yagize ati “Muri iri torero twibukijwe ko intore itoza icyo iri cyo idatoza icyo izi gusa, mwatojwe indangagaciro nyinshi zirimo gukora umurimo unoze, kuwukorera ku gihe ndetse no kwitanga.

Tubatumye gushyira mu bikorwa ibi byose, muzagaragarize abo muyobora, yaba abakozi bagenzi banyu, abanyeshuri ndetse n’ababyeyi ko muri intore koko mu kunoza umurimo, kuwukorana ubuhanga ndetse no kuwukorera ku gihe”.

Yabasabye kuzerekana ko ari Indemyabigwi bityo bakarema ababyiruka, bafite imyitwarire iboneye, bagendera kure ingeso mbi, basobanukiwe neza icyo u Rwanda rubifuzaho.

Umuyobozi ni ugira uruhare rukomeye mu guhindura ubuzima bw’ishuri no kuriteza imbere haba mu mibereho yaryo, ibikorwa remezo, ibikoresho ndetse n’ibindi.

Ingabire Domitille, Umuyobozi w’ishuri rya Kiyumba mu Karere ka Muhanga akaba ari imwe mu ntore z’Indemyabigwi, yabwiye itangazamakuru ko bafite intego yo kwigisha indangagaciro na kirazira mu mashuri yabo yigisha tekinike n’ubumenyi ngiro.

Yagize ati “Ibi ni ukugira ngo abanyeshuri bacu barimo kwiga tekinike basohoke bafite n’indangagaciro na kirazira biranga Umunyarwanda mwiza”.

Eng Ngabonziza Germain, Umuyobozi w’ishuri rya Nyanza TSS riherereye mu Karere ka Nyanza, agaragaza ko itorero ryari rikenewe cyane.

Ati: “Mu kazi kacu ni byiza yuko mu bigo by’amashuri hari harimo hamwe na hamwe ibibazo bijyanye n’imiyoborere hagati y’ubuyobozi n’abayoborwa ariko iri torero ryadutoje uko twazigisha bariya bantu ariko natwe twitanzeho urugero bakatureberaho koroherana, ubufatanye kugira ngo ibyo dukora byose bidufashe kunoza neza inshingano zacu”.

Ubwo intore zinjizwaga mu zindi, Eng. Umukunzi Paul, Umuyobozi Mukuru w’Urwego rw’igihugu rushinzwe guteza imbere Imyuga n’Ubumenyingiro (RTB), yasabye abayobozi b’amashuri ya tekinike, imyuga n’ubumenyi ngiro guteza imbere indangagaciro na kirazira by’umuco nyarwanda mu bigo by’amashuri bayoboye.

Yagize ati “Ndababonamo icyizere cy’impinduka mu burezi bwacu bw’imyigishirize ya tekinike, imyuga n’ubumenyi ngiro.

Ndashaka kubona intambwe idasobanya mu burezi bwacu, turashaka kubona abarezi bubakiye ku ndangagaciro z’umuco nyarwanda, kuri kirazira kugira ngo bakore umurimo wabo umunsi ku wundi”.

KAYITARE JEAN PAUL

  • Imvaho Nshya
  • Ugushyingo 11, 2023
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE