Inteko Ishinga Amategeko irishimira ko yageze ku bikorwa byose byari biteganyijwe

  • NYIRANEZA JUDITH
  • Ukuboza 5, 2023
  • Hashize amezi 6
Image

Inteko Rusange ya Sena yasoje igihemwe cya mbere cy’umwaka 2023-2024, hagaragajwe ibikorwa byagezweho kuri uyu wa Mbere tariki 4 Ukuboza 2023.

Perezida wa Sena Dr Kalinda François Xavier yagaragaje ibyakozwe mu gihembwe harimo kwemeza ishyirwaho ry’abayobozi 9 no gutora  itegeko ngenga rigenga amatora.

Sena yagejejweho raporo z’ibikorwa bya Komisiyo z’Igihugu n’iz’izindi nzego zitandukanye.

Abasenateri basuye abaturage banifatanya nabo mu bikorwa by’umuganda. Sena kandi yasuzumye raporo za Komisiyo Zihoraho zijyanye no kugenzura ibikorwa bya Guverinoma

Inteko Rusange yasabye Guverinoma kongerera ubushobozi serivisi yo gukurikirana ibikorwa by’Abanyarwanda baba mu mahanga nyuma yo gusuzuma raporo ya Komisiyo y’Ububanyi n’Amahanga, Ubutwererane n’Umutekano yagenzuye uruhare rw’Abanyarwanda baba mu mahanga mu iterambere ry’Igihugu.

Inteko Rusange kandi yemeje raporo ya Komisiyo ya Politiki n’Imiyoborere ku gikorwa cyo kungurana ibitekerezo na Minisitiri w’Ubutabera akaba n’Intumwa Nkuru ya Leta ku bijyanye n’isuzuma ngarukagihe mpuzamahanga ku burenganzira bwa Muntu (UPR).

Kuri uyu wa Mbere kandi Abadepite basoje igihembwe cya mbere gisanzwe cya 2023/2024.

Perezida w’Umutwe w’Abadepite Mukabalisa Donatille yavuze ko muri iki gihembwe kirangiye ibikorwa byose byari biteganyijwe byakozwe ndetse hiyongereyeho n’ibindi.

Perezida w’Umutwe w’Abadepite yagaragaje ibyakozwe birimo kwemeza ishingiro ry’amategeko 10, amategeko 14 yatowe harimo Itegeko Ngenga rihindura Itegeko Ngenga n° 001/2019.OL ryo ku wa 29/07/2019 rigenga amatora ubu rikaba ryaranatangajwe mu Igazeti ya Leta.

Umutwe w’Abadepite wakiriye raporo na gahunda z’ibikorwa by’inzego zitandukanye aho hitabye abahagariye Guverinoma kugira ngo batange ibisobanuro mu magambo ku bibazo byagaragaye.

Mu gusoza igihembwe, Inteko Rusange y’Umutwe w’Abadepite yemeje itegeko ryerekeye kurengera umutungo bwite mu by’ubwenge n’itegeko rigenga ubusugire bw’urusobe rw’ibinyabuzima.

  • NYIRANEZA JUDITH
  • Ukuboza 5, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE