Intara y’Amajyaruguru ifite umukoro wo kwita kuri serivisi abayobozi baha umuturage

  • NYIRANEZA JUDITH
  • Ugushyingo 25, 2023
  • Hashize amezi 6
Image

Ubuyobozi bw’Intara y’Amajyaruguru bwasabye abayobozi mu nzego zitandukanye, kurushaho kwita kuri serivisi buha abaturage bushingiye ku bipimo byagaragajwe n’Urwego rw’Igihugu rw’Imiyoborere RGB.

Ni ubutumwa bwatanzwe ku wa Gatanu tariki ya 24 Ugushyingo, ubwo mu Karere ka Musanze hari hateraniye inama nyunguranabitekerezo yahuje RGB, Intara y’Amajyaruguru n’Abafatanyabikorwa mu iterambere JADF, hareberwa hamwe ibikorwa byagezweho ku bufatanye bw’izi nzego mu mwaka wa 2023 no kugaragaza ibyavuye mu bushakashatsi ku gipimo cy’imiyoborere myiza.

Umuyobozi Mukuru wa RGB, Dr Usta Kaitesi yasabye Abayobozi b’Inzego z’ibanze bitabiriye iyi nama kurushaho kunoza ubufatanye n’Abafatanyabikorwa mu iterambere JADF hagamijwe kugera ku ntego yo guteza imbere abaturage no kuzamura imibereho yabo kugira ngo irusheho kuba myiza.

Umuyobozi Mukuru wa RGB, Dr Usta Kaitesi

Urwego rw’Igihugu rw’Imiyoborere rwatangaje ko ubushakashatsi ku Ishusho y’uko abaturage babona imiyoborere n’imitangire ya serivisi mu nzego zibegereye CRC2023, igaragaza ko abaturage bo mu Ntara y’Amajyaruguru bishimiye imitangire ya serivisi ku kigero cya 76.2% kandi ko mu byiciro 16 byasuzumwe, umutekano uri ku isonga n’amanota 89.8% mu gihe serivisi z’ubutaka n’imiturire ziri ku kigero cyo hasi cya 60.4%.

Guverineri w’Intara y’Amajyaruguru, Mugabowagahunde Maurice yasabye abayobozi mu nzego zitandukanye kwita kuri serivisi ihabwa abaturage.

Yagize ati: “Ibyo Urwego rw’Igihugu rw’Imiyoborere RGB rutugaragarije nk’abayobozi mu Ntara yacu, biratanga umukoro wo kurushaho kwita kuri serivisi ihabwa umuturage. Bityo ni ngombwa kurushaho kumuha serivisi inoze kandi itangiwe ku gihe”.

Abitabiriye iyi nama batanze ibitekerezo bitandukanye biganisha ku ngamba zo gushyira imbaraga aho RGB yabagaragarije ko hakiri intege nke, hagamijwe ko umuturage akomeza kwishimira serivisi ahabwa n’Inzego z’ibanze.

Guverineri w’Intara y’Amajyaruguru, Mugabowagahunde Maurice

Nk’uko bigaragazwa na RGB kandi muri uyu mwaka wa 2023, Abafatanyabikorwa mu iterambere JADF bakoresheje miliyari zigera kuri 31 mu bikorwa bitandukanye bigamije guteza imbere abaturage mu Ntara y’Amajyaruguru, birimo kugeza amazi meza ku baturage, kubungabunga ibidukikije, n’ibindi.

Ni inama yayobowe na Guverineri w’Intara y’Amajyaruguru Mugabowagahunde Maurice afatanyije n’Umuyobozi Mukuru w’Urwego rw’Igihugu rw’Imiyoborere, RGB, Dr Usta Kaitesi yitabiriwe n’Abayobozi mu nzego zitandukanye zikorera mu Ntara y’Amajyaruguru zirimo iza Leta, iz’umutekano n’iz’abikorera.

  • NYIRANEZA JUDITH
  • Ugushyingo 25, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE