Intara ya Tanzania n’iy’u Rwanda byiteguye kubyaza umusaruro amahirwe y’ishoramari

  • Imvaho Nshya
  • Nzeri 15, 2023
  • Hashize amezi 9
Image

Ubuyobozi bw’Intara ya Kagera muri Tanzania n’ubw’Intara y’Iburasirazuba mu Rwanda, bwiyemeje gushyira mu bikorwa ubufatanye bugamije kubyaza umusaruro amahirwe y’ishoramari aboneka ku mpande zombi binyuze mu bufatanye bw’inzego n’abikorera.

Umuyobozi w’Intara ya Kagera, Fatma Abubakar Mwassa yavuze ko nta gihugu cyatera imbere vuba mu gihe ubukungu bw’Urwego rw’Abikorera rutarenga umutaru bityo akaba ari yo mpamvu abikorera bagenda berekwa amahirwe y’ishoramari ari mu gihugu no hanze yacyo.

Yagize ati: “Abanyatanzania n’Abanyarwanda ni abanyamahirwe kuko bafite abayobozi beza bafite icyerekezo cyiza n’intego byo guteza imbere abaturage n’ibihugu babereye abayobozi. Bafitanye umubano mwiza ndetse bashyize bamwe bahuza imbaraga, umubano w’ibihugu byombi ubu ni nta makemwa ndetse badufunguriye inzira baduha amahirwe yose ashoboka ngo twiteze imbere.

Ni cyo gihe ngo abikorera dutangire tubyaze amahirwe ari mu bihugu byacu by’umwihariko Intara tuyoboye. Ni yo mpamvu Abanyatanzania bakwiye gushora imari yabo mu Rwanda n’Abanyarwanda bagashora muri Tanzania kuko amasezerano ibihugu byombi byagiranye abibemerera.”

Guverineri w’Intara y’Iburasirazuba CG Gasana Emmanuel yavuze ko nk’Intara y’Iburasirazuba bagiye kurushaho gukorana n’Intara ya Kagera yo muri Tanzania hagamijwe kwihutisha iterambere n’imibereho y’abaturage ndetse n’ubucuruzi buteza imbere ibihugu byombi.

Yagize ati: “Ubu navuga ko rwose turi mu gihe gikomeye, twiyemeje gukorana n’Intara ya Kagera mu kwihutisha iterambere ry’imibereho y’abaturage bacu ari ko n’ubucuruzi buteza imbere ibihugu byacu kandi twiteguye neza gufatanya n’abikorera bo mu Rwanda na Tanzania. Icyo tubasaba ni ubufatanye no kugira icyerekezo cyiduteza imbere.”

Abanyatanzaniya bizeye kubyaza umusaruro amahirwe ari mu Ntara y’Iburasirazuba

Bamwe mu bikorera bo mu Ntara ya Kagera muri Tanzania bavuze ko uruzinduko bamazemo iminsi mu Rwanda barwitezeho inyungu kuko bizeye ko kubyaza amahirwe ari mu Ntara y’Iburasirazuba bikazatuma habaho ubuhahirane mu buhinzi ndetse n’ubucuruzi.

Umuyobozi ukuriye ishami ry’Ubucuruzi, Inganda n’Ubuhinzi mu Ntara ya Kagera muri Tanzania, Ladislaus G. Rutananukwa yagize ati: “Uruzinduko twagiriye mu Rwanda twarwigiyemo byinshi biri mu byiciro by’ubuhinzi buteye imbere ku buso buto, kororera mu biraro. Ibyo twigiye mu Rwanda, tugiye kubisangiza abo twasize iwacu. Intara ya Kagera imaze igiye ifitanye umubano n’Intara y’Iburasirazuba mu Rwanda, rero nk’abikorera ku mpande zombi bakwiye gukoresha amahirwe ahari no gufatanya muri byose.’’

Rutananukwa akomeza avuga ko mu Ntara ya Kagera hari amahirwe menshi abashoramari bo mu Rwanda cyane cyane abo mu Burasirazuba babyazamo umusaruro.

Ati: “Nkuko mubizi Intara ya Kagera ifite ubuso bugari bubereye ubuhinzi, ubucukuzi by’amabuye y’agaciro, ubukerarugendo n’ibindi. Turifuza ko isoko ryambukiranya imipaka rirusha uko rimeze uyu munsi.”

Abikorera biyemeje kubyaza umusaruro amahirwe ari mu ishoramari

Abikorera bo mu Rwanda bavuga ko amahirwe ari mu Ntara ya Kagera muri Tanzania biteguye kuyakoresha no kuyabyaza umusaruro.

Umushoramari mu kigo gitwara abantu n’ibintu Bayingana Eulade yagize ati, ‘‘Nk’abikorera ubu tugiye gutangira kujyanamo na bo guhera muri iyi minsi bitewe nuko amasezerano y’imikoranire ku mpande zombi yasinywe, tweretswe amahirwe ahari ubu tugiye kujya mu biro aho bakorera dushake ibyangombwa nibabiduha dutangire dukore.”

Umuyobozi w’abikorera mu Burasirazuba Nkurunziza Jean de Dieu abishimangira avuga ko igihe ari iki ku bashoramari bo muri iyo Ntara kurushaho kugira imikorere n’imikoranire, ishoramari rigakorwa mu buryo bw’umwuga.

Nkurunziza yongeyeho ko hazabaho ubufatanye hagati y’Intara zombi. Yagize ati: “Bamaze iminsi basura ibikorwa bitandukanye hano mu Ntara y’Iburasirazuba birebana n’ubucuruzi, ubuhinzi n’ubworozi kandi barebye ibice byinshi bitandukanye, ubukerarugendo n’ibindi kandi urabona ko biteguye bafite inyota yo kugira imikoranire myiza hagati y’intara zombi. […] tugiye gushora imbaraga zacu ku bikomoka ku buhinzi n’ubworozi.”

Yagize ati: “Uyu munsi turashimira ubuyobozi bw’Intara zombi budahwema kutwereka amahirwe ahari kandi baradufasha cyane, biragaragarira buri wese rero ko abikorera bo mu Ntara y’Iburasirazuba bafite amahirwe yo kujya gushora mu Ntara ya Kagera iri hafi y’Intara yacu bivuga ngo igihe ni iki kandi natwe turiteguye ndetse n’abagenzi bacu bo muri Tanzania bamaze iminsi basura ibikorwa biri mu Ntara yacu.’’

Ibihugu byombi bisanzwe bifitanye umubano

U Rwanda na Tanzaniya bisanzwe bifitanye amasezerano y’ubufatanye yashyizweho umukono tariki ya 2 Nzeri 2021 na Perezida wa Tanzaniya, Samia Suluhu Hassan, ubwo yagiriraga uruzinduko rw’iminsi 2 mu Rwanda.

Ayo masezerano harimo agamije kunoza ubufatanye mu burezi, kunoza ibyerekeranye n’abinjira n’abasohoka ndetse n’ubufatanye mu gukurikirana ibirebana n’ikorwa ry’imiti n’ikoreshwa ryayo, no kwifashisha ikoranabuhanga mu itumanaho.

Ibicuruzwa byo mu Rwanda biva n’ibijya mu mahanga, ibingana na 90% byose binyuzwa mu gihugu cya Tanzaniya, kuba u Rwanda na Tanzaniya bifitanye umubano mwiza byorohereza abacuruzi mu byo bakora.

Kuva mu mwaka wa 2011, Intara y’Iburasirazuba yasinyane amasezerano y’imikoranire n’Intara ya Kagera, yo muri Tanzania igamije guteza imbere ubuhahirane ku mpande zombi.

NSHIMIYIMANA FAUSTIN 

  • Imvaho Nshya
  • Nzeri 15, 2023
  • Hashize amezi 9
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE