Inkomezabigwi mu Mbanzarugamba za Kicukiro zavuze ko utaritabiriye Itorero yacikanwe

  • KAYITARE JEAN PAUL
  • Ukuboza 18, 2023
  • Hashize amezi 3
Image

Kuri uyu wa Mbere tariki 18 Ukuboza 2023 hasojwe Urugerero rw’Inkomezabigwi icyiciro cya 11 cyari cyaratangiye tariki 25 Nzeri 2023. Minisiteri y’Ubumwe bw’Abanyarwanda n’Inshingano Mboneragihugu (MINUBUMWE) yatangaje ko Urugerero rw’uyu mwaka rwitabiriwe n’intore 77,104.

Minisitiri w’Ubumwe bw’Abanyarwanda n’Inshingano Mboneragihugu, Dr Bizimana Jean Damascène, abinyujije ku rubuga rwe rwa X, yashimiye Akarere ka Kamonyi mu Ntara y’Amajyepfo kahize Uturere mu mikorere y’Urugerero ku kigereranyo cya 91%.

Uturere twa Kicukiro, Gakenke, Kayonza na Rusizi twahize utundi mu Ntara duherereyemo n’Umujyi wa Kigali.

Minisitiri Dr Bizimana Jean Damascène, yavuze ko abataritabiriye urugerero bahombye.

Yagize ati: “Ababuze ku Rugerero mwarahombye ariko itorero ntimuzariburemo”.

Akarere ka Kicukiro kahawe inka y’indashyikirwa. Ibirori byitabiriwe n’inzego zitandukanye zirimo iz’umutekano, intore zo ku rugerero mu Karere kose, abafatanyabikorwa b’Akarere barimo ‘Gikuriro kuri Bose’, abikorera ndetse n’abagize Inama nNjyanama y’Umurenge wa Masaka.

Tuyishimire Marie Josée wo mu Kagari ka Ayabaraya akaba n’intore yo ku Mukondo mu Murenge wa Masaka yishimira ko mu gihe cy’amezi abiri bamaze mu itorero hari byinshi baryigiyemo.

Avuga ko bagize uruhare mu kurwanya imirire mibi nko kubaka uturima tw’igikoni, Irerero ryatashywe uyu munsi n’ibindi.

Akomeza agira ati “Twubatse Irerero mu Murenge wacu wa Masaka, dukora ibikorwa byo kwishyurira Mituweli abaturage batishoboye n’ibindi bikorwa bitandukanye”.

Bubatse Irerero ry’ibyumba bibiri n’ubwiherero.

Avuga ko umuntu utaritabiriye ibikorwa by’Urugerero yahombye byinshi birimo n’inama z’abayobozi.

Niyonzima Patrick wo mu Murenge wa Gahanga ahamya ko mu itorero bakozemo ibintu byinshi birimo n’imirimo y’amaboko.

Yabwiye Imvaho Nshya ati “Twakoze uturima tw’igikoni, tubarura abantu bishyuye mituweli ndetse n’abantu bakodesha.

Icyo byatwunguye ni ugukorera hamwe nk’Abanyarwanda n’izindi nyigisho zijyanye no gukunda igihugu no gusigasira ibyo abatubanjirije bagezeho”.

Ku rundi ruhande ngo urubyiruko rutitabiriye Urugerero hari byinshi rwahombye birimo no kumenyana n’abandi.  

Ubuyobozi bw’Akarere ka Kicukiro bwatangaje ko abitabiriye urugerero batagwingiye bityo bugashima intore zakoze ibikorwa by’indashyikirwa birimo akarima k’igikoni.

Mutsinzi Antoine, Umuyobozi Nshingwabikorwa wa Kicukiro yabwiye Imvaho Nshya ko Akagari ka Cyimo kakoze igikorwa cyahesheje Akarere kuba aka mbere mu Mujyi wa Kigali biturutse ku kubaka Irerero ry’abana.

Kuba hari icyumba birasanzwe ariko hubatswe akarima k’igikoni gateye imbere.

Yagize ati: “Dushaka ko kariya karima katubera intangarugero. Ku biro by’Utugari hagomba kuba hari ishuri kandi umuntu akagira icyo ahigira.

Yijeje ko ibyo intore zakoze bitazasubira inyuma kandi ko bigomba gusigasirwa, agasaba intore gukomeza kuba indashyikirwa.

Kugira ngo Akarere ka Kicukiro gashobore guhabwa inka y’indashyikirwa byatewe n’uruhare rw’abafatanyabikorwa, gukorana n’inzego zitandukanye zirimo n’iz’umutekano.

Avuga ko itorero ritangira, ubwitabire butari bwiza ariko uko Akarere kagiye gafata ibyemezo n’ingamba ndetse kagasura n’ingamba zitandukanye byagiye byongera ubwitabire.

Itorero rirangiye Akarere ka Kicukiro kari kuri 81% bivuze ngo mu banyeshuri barangije amashuri bageraga ku 4,000, habonetse nibura abasaga 3,700.

Mutsinzi yagize ati: “Ni umubare utari mukeya ariko nkuko nabivuze dutangira umubare wari hasi, kubera ingamba twagiye dufata zatumye umubare ugenda wiyongera”.

Yasabye urubyiruko gukomeza indangagaciro rwigiye ku rugerero no kwitwara neza kugira ngo rukomeze kuba intangarugero aho rutuye.

Amafoto: Ntwali Anaclet

  • KAYITARE JEAN PAUL
  • Ukuboza 18, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE