Ingamba zafashwe mu kwirinda indwara y’ubutaka

  • NYIRANEZA JUDITH
  • Ukuboza 12, 2023
  • Hashize amezi 3
Image

Indwara y’ubutaka si nshyashya ariko Leta y’u Rwanda yafashe ingamba zo kuyirwanya kuko iyo ifashe itungo, rikaribwa n’abantu na bo bayandura kandi kwirinda biruta kwivuza.

Iyi ndwara ikunze kwibasira amatungo yuza yagaragaye mu bihugu by’abaturanyi nko muri Uganda, Kenya, Zambia, Zimbabwe, Malawi n’ahandi, ni yo mpamvu Minisiteri y’Ubuhinzi n’Ubworozi ishishikariza abaturarwanda, by’umwihariko aborozi kwitwararika kugira ngo ingamba zashyizweho zikomeze gufasha mu kuba iyo ndwara itagera mu gihugu.

Umuyobozi Mukuru wungirije mu Kigo cy’Igihugu gishinzwe iterambere ry’ubworozi, Dr Uwituze Solange yavuze ko indwara y’ubutaka atari nshyashya ariko itari no mu Rwanda kandi Leta yashyizeho ingamba zo kuyikumira.

Yagize ati: “Mu Rwanda iyo ndwara ntayihari, gusa yabonetse mu bihugu duturanye nko muri Uganda ndetse n’ahandi nko muri Kenya, Zambia, Malawi n’ahandi ku buryo dushishikariza Abanyarwanda muri rusange by’umwihariko aborozi kwitwararika kugira ngo itaba yakwambuka igakwira.

Leta y’u Rwanda yafashe ingamba zo kuyirinda harimo gukingira amatungo iyo ndwara y’ubutaka, kororera mu biraro, kongerera ubumenyi abavuzi b’amatungo n’ibindi”.

Yongeyeho ko igihe umuntu ariye itungo ryari rirwaye na we yandura kimwe no kurikoraho kuko bishobora gutera umuntu indwara zo mu buhumekero.

Ati: “Ni indwara ifata n’abantu igihe bakoze cyangwa bariye itungo ryari rirwaye ubutaka. Ni indwara iterwa na bagiteri ikunze kwibasira inyamaswa zuza nk’inka, ingamiya, impongo, ihene, imbogo n’izindi. Iyo itungo rizifite bakaritaba, utwo dukoko dushobora kurenza imyaka 50, […]  aho twari turi dushobora gutemba tukajya mu bishanga noneho ubwatsi buhameze bukaribwa n’amatungo akandura”.

Yakomeje asobanura ko akenshi gukingira bitangira muri Nzeri kandi imbaraga zashyizwemo kuko abavuzi b’amatungo bongererwa ubumenyi ndetse urukingo rutangirwa ubuntu, ikindi kandi hubatswe na laboratwari mu rwego rwo kubasha gupima ndetse n’ubushakashatsi bukomeza gukorwa hakanongerwa n’ubukangurambaga.

Indi ngamba ni ukwirinda kurya itungo ryifushije kuko yandura, abaririye bakaba bakwandura iyo ndwara, ndetse bashobora kugira indwara z’ubuhumekero.

Abantu bakangurirwa kurya inyama zapimwe n’abaveterineri, hagaragazwa aho zituruka hakizerwa ubuziranenge bwazo, hazwi mabagiro agakomeza kubaga amatungo azwi aho akomoka yambaye amaherena, ku maresitora n’amahotero gukoresha inyama zabagiwe mu mabagiro azwi zifite icyemezo.

Kubahiriza amabwiriza yo gutwara amatungo, hakirindwa ko abaturage ubwabo barya inyama zidapimye, abaturiye imipaka bakirinda kwambukana amatungo kuko ashobora kwanduzanya.

Kwirinda kuragira hanze, ku gasozi ahubwo bakororera mu biraro kandi haba ari mu nzuri bakagenzura amatungo bakoranye na baveterineri, bakingiza, bayashyire mu bwishingizi.

Kwigisha itegeko mbere yo guhana hakurikijwe amategeko mu rwego rw’ubuvuzi bw’amatungo.

Gutanga amakuru hakiri kare kugira ngo inzego zitandukanye zuzuzanye, hatagira inyama zakwinjira muri karitsiye zitapimwe zabagiwe ahatari ku ibagiro rizwi zikavangwa n’izindi zipimye.

Ibimenyetso by’indwara y’ubutaka

Bimwe mu bimenyetso by’indwara y’ubutaka nk’uko byagarutsweho na Dr Uwituze harimo umuriro mwinshi ushobora kugera kuri dogere selisiyusi 42, itungo ritangira kubyimba nka kuko amaraso aba atagenda neza akananirwa guhumeka kugera aho rigapfa.

Itungo ryarwaye ubutaka risohora amaraso ahari umwenge hose afite ibara rijya kwirabura, inka ikamwa ibura umukamo ukagabanyuka, igatitira.

Bimwe mu bimenyetso ku muntu waba yanduye indwara y’ubutaka ni ibiheri ku ruhu kuko bagiteri iba yinjiye inyuze ku ruhu, ibimenyetso bifata imyanya y’ubuhimeketo gutitira, kubabara mu gatuza, ibicurane akaba afite ibimenyetso mu rwungano ngogozi harimo kuribwa mu nda, umuriro.

  • NYIRANEZA JUDITH
  • Ukuboza 12, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE