Ingabo za SADC zatangiye kugaba ibitero kuri M23

  • NTAWITONDA JEAN CLAUDE
  • Mutarama 29, 2024
  • Hashize ukwezi 1
Image

Ingabo zoherejwe n’Umuryango w’Ubukungu w’ibihugu by’Afurika y’Amajyepfo (SADC) zinjiye  ‘byeruye’ mu mirwano n’inyeshyamba za M23, nk’uko byemezwa n’ubuyobozi bw’izo nyeshyamba ziherereye mu Burasirazuba bwa Repubulika Iharanira Demokarasi ya Congo (RDC).

Bertrand Bisimwa ukuriye igice cya Politiki cya M23 yatangaje ku mbuga nkoranyambaga ko guhera ku Cyumweru izo ngabo za SADC zatangiye gufatanya n’ingabo za Leta ya Repubulika Iharanira Demokarasi ya Congo (RDC) n’indi mitwe yari isanzwe ikorana na zo.

Bisimwa yagize ati: “Kuva ejo ubwo bufatanye bushya bwakoresheje intwaro za muzinga ziremereye, indege z’intambara, drones, n’ibifaru mu kurasa buhumyi ibice bya Karuba, Mushaki, no hafi y’aho.”

Bisimwa avuga ko ibyo bitero byagize ingaruka zikomeye ku basivile.

SADC cyangwa ingabo za RDC ntacyo baratangaza ku kwinjira mu mirwano kw’umutwe w’ingabo za SADC cyangwa ku basivili M23 ivuga ko barimo kwicwa muri ibi bitero aho igenzura.

Ingabo za SADC ziri muri Kivu ya Ruguru zoherejwe mu butumwa bwo kurwanya M23 zavuye mu bihugu bya Africa y’Epfo, Malawi, na Tanzania, iza mbere zahageze mu kwezi gushize mu bikorwa by’ibanze byo kwiga intambara no kwitegura.

Abategetsi ba Repubulika Iharanira Demokarasi ya Congo (RDC) biteze intsinzi ku mu mirwano bafashijwe n’ingabo za SADC, ibyigeze kuba mu 2012 ubwo M23 yafataga Umujyi wa Goma n’ibice binini bya Masisi na Rutshuru mbere y’uko ibyamburwa byose.

M23 ubu ivuga ko ubu izengurutse umujyi wa Goma igice cyose cyo ku butaka – uretse ikiyaga cya Kivu, nyuma y’uko mu mirwano yo muri iyi wikendi (weekend) ishize ivuga ko yafashe umusozi w’ingenzi wa Muremure uri hafi y’umuhanda wa Sake – Minova uhuza Goma, n’ibice bya Masisi, na Kivu y’Epfo.

Umubare nyawo w’abasirikare bagize umutwe wa SADC wageze muri RDC ntabwo uzwi neza, amashusho yatangajwe mu minsi ishize yagaragaje abagize uyu mutwe berekana ibikoresho byabo birimo ibimodoka by’intambara, imbunda za muzinga, n’ibifaru (chars).

Lawrence Kanyuka, Umuvugizi wa M23, avuga ko uyu mutwe ufite “uburenganzira bwo kwirwanaho no kubuza kugira nabi ingabo zishyize hamwe z’ubutegetsi bwa Leta ya Kinshasa”.

Abasesenguzi bavuga ko kwinjira kw’ingabo za SADC mu mirwano bishobora guhindura byinshi kuri iyi ntambara bahereye ku buryo byagenze mu myaka 10 ishize, abandi bakavuga ko ibyabaye icyo gihe bishobora kutisubiramo kuri iyi nshuro.

Inzobere za Loni n’ibihugu bimwe by’iburengerazuba bivuga ko Ingabo za RDC zifatanyije n’inyeshyamba za FDLR zasize zihekuye u Rwanda muri Jenoside yakorewe Abatutsi hamwe n’Ingabo z’u Burundi.

Umuryango w’Abibumbye uvuga ko mu mezi abiri ashize abasivili bagera ku 570,000 bavuye mu byabo bahunga iyi mirwano muri Masisi na Rutshuru bakaba bari mu nkambi aho bakeneye inkunga y’ibiribwa n’ibindi bibafasha mu zubimz bwa buri munsi.

  • NTAWITONDA JEAN CLAUDE
  • Mutarama 29, 2024
  • Hashize ukwezi 1
TANGA IGITEKEREZO
Rizinde cllement says:
Gashyantare 4, 2024 at 7:55 am

Jye ndabona Reta yacongo yarikwiye kumvikana na M23 congo nini Niba
badashakako abavuga ikinyarwanda bakorerahamwe babahe ubwijyenge baba igice kyabo murakoze

Andika igitekerezo

AMATEGEKO AGENGA IYANDIKA RY'IGITEKEREZO CYAWE