Ingabo za EAC zatangiye kuva muri Congo

  • ZIGAMA THEONESTE
  • Ukuboza 3, 2023
  • Hashize amezi 6
Image

Ingabo z’Umuryango w’Afurika y’Iburasirazuba (EAC) zatangiye kurira indege ziva mu gihugu cya Repubulika Iharanira Demokarasi ya Congo kuri iki Cyumweru tariki ya 03 Ukuboza 2023.

Ni ingabo za EACRF zari zaroherejwe mu Burasirazuba bwa RDC muri gahunda yo kugarura amahoro n’umutekano mu Ntara ya Kivu y’Amajyaruguru, aho ingabo za Leta zifatanyije n’imitwe yitwaje intwaro zihanganye n’inyeshyamba za M23.

Ku ikutiro, ingabo za Kenya ni zo zabimburiye izindi, hagenda icyiciro cya mbere cy’abasirikare 98, mbere y’iminsi itanu ugereranyije n’igihe izi ngabo cyo kuva mu burasirazuba bwa RDC, dore ko byari biteganyijwe ko manda y’izi ngabo izarangira tariki ya 8 Ukuboza 2023.

Kenya ni yo yari yarabimburiye izindi ngabo kuza muri Congo, ubu hari izaturutse mu bihugu bya Sudani y’epfo, u Burundi, Uganda na Kenya.

Ingabo za Kenya zari zimaze umwaka urenga zikorera ibikorwa byazo muri za Teritwari za Rutshuru, Nyiragongo ndetse no mu mujyi wa Goma.

Amafoto n’amashusho yagiye hanze yerekana zimwe muri izi ngabo ziri ku kibuga cy’indege cya Goma, zitegura gufata rutemikirere zigasubira iwabo.

Ingabo za EAC zatangiye kuzinga utwangushye, nyuma y’uko Guverinoma ya Repubulika Iharanira Demokarasi ya Congo itangaje ko itazazongerera amasezerano yo gukomeza kuba ku butaka bw’icyo gihugu.

Ni nyuma y’uko Perezida Félix Antoine Tshisekedi n’ubutegetsi bwe bakunze kunenga umusaruro w’izo ngabo, ahanini bitewe no kuba zaranze kujya mu mirwano n’inyeshyamba za M23.

Hashingiwe ku masezerano y’inama z’Abakuru b’Ibihugu ba EAC zabereye i Luanda na Nairobi, kujya mu mirwano na M23 ntabwo byari muri gahunda yari mu zajyanye EACRF, n’ubwo Leta ya Kinshasa yo yifuzaga ko ziriya ngabo zajya ku rugamba.

Biteganyijwe ko Ingabo za EAC nizimara kuva muri RDC zizahita zisimburwa n’iz’Umuryango w’Ubukungu w’Ibihugu byo muri Afurika y’Amajyepfo (SADC) zigeze kure imyiteguro yo kujyayo.

Hari amakuru aherUtse yavugaga ko SADC yatangiye kohereza ibikoresho muri RDC.

Imirwano irakomeje aho ingabo za Congo FARDC n’abo bafatanya ba Wazalendo bakomeje kugaba ibitero ku nyeshyamba za M23 ziharanira ko bamwe mu banyekongo baheze ishyanga babona uburenganzira ku gihugu cyabo, mu bice bya Teritwari za Masisi, Rutshuru ndetse na Nyiragongo.

M23 ishinja FARDC kohereza bombe ziraswa n’indege mu bice bituyemo abaturage b’abasivili, bamwe bikabahitana abandi bakurwa mu byabo n’izi ntambara za hato na hato.

  • ZIGAMA THEONESTE
  • Ukuboza 3, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE