Inama z’uwaminuje mu Buhinde yagera mu Rwanda akaba ‘Umuyede’

  • AKIMANA JEAN DE DIEU
  • Mutarama 7, 2024
  • Hashize amezi 2
Image

Hatangimana Jean Bosco w’imyaka 35 ukomoka mu Bugesera, ni umwe mu bantu bahuye n’ibyo batari biteze ubwo yasozaga amasomo ya Kaminuza mu Buhinde yagaruka mu Rwanda akabura akazi, bigatuma ahera ku gufasha abafundi ari byo bita Umuyede.

Uyu mugabo kuri ubu ufite umugore n’abana babiri, agira inama urubyiruko yo gukora buri gihe birinda gusuzugura umurimo kuko umuntu abeshwaho no gukora.

Mu kiganiro yagiranye n’Imvaho Nshya, yagarutse ku cyizere yari afite ubwo yasozaga icyiciro cya kabiri cya Kaminuza (Bachelors) mu Buhinde yagarutse mu Rwanda azi ko ahita abona akazi ariko atungurwa n’uko yaje akakirwa n’ubushomeri.

Yashatse akazi kajyanye n’ibyo yize  bijyanye n’Ubushabitsi arakabura, yigira inama yo gukora akazi kose abonye, cyane ko yari afite umuryango ugizwe n’umugore n’abana babiri yagombaga gutunga atibye, adahemutse cyangwa ngo yandavure.

Amaze kubura akazi i Bugesera, Hatangimana yagiye mu Murenge wa Ruhango, Akarere ka Ruhango mu gushaka imibereho yo gutunga umugore n’abana be 2.

Akazi yahereyeho kari ako kuvanga umucanga na sima ahereza abafundi, icyo gihe hariho ibikorwa byo kuvugurura inzu zahise zikoreramo Ibiro by’Umurenge wa Ruhango.

Yagize ati: “Njyewe nasoje amasomo yanjye mu mwaka wa 2017 mu ishami ry’Ubushabitsi mu gihugu cy’u Buhinde mu cyiciro cya 2, ngarutse mu Rwanda nsanga ntashobora kubona akazi kubera ibyo nize, ariko ubuzima bwambanye nabi ku buryo nihebye nkumva ko amasomo nize ntacyo amfashije, mpitamo kwigira inama ko akazi kose nzabona nzagakora.”

Impinduka zaje kuba mu mwaka wa 2020 ubwo yari mu kazi k’ubuyede ku nyubako ya Kaminuza y’Ubukerarugendo n’Ikoranabuhanga (UTB) Ishami rya Ruhango, akabona amahirwe yo guhita ahasaba akazi kajyanye n’ibyo yize agahita anagahabwa.

Nyuma y’imyaka itandatu yamaze atarabona akazi k’ibyo yize, kuri ubu Hatangimana akora mu Ishami rishinzwe umutungo muri UTB ishami rya Ruhango,  akavuga ko kwihangana byatumye agera ku ntego yifuje zo gukora mu kigo gikomeye.

Yagize ati: “Njyewe rero namaze kumenya ko bashaka umukozi wize Kaminuza nshaka amakuru nanjye nsaba ko natanga ibyangombwa, basanga mfite ubumenyi bashaka bampa akazi. Ubu nkora mu bijyanye n’icungamutungo kandi ntabwo nabigezeho gutyo kwihangana biruta byose.”

Inama ku basoza amashuri bagategereza kubona akazi k’inzozi zabo

Hatangimana avuga ko abasoza amashuri badakwiye kwiheba ngo bumve ko byarangiye, abakiri bato abasaba kwirinda ingeso mbi zatuma inzozi bafite ziyoyoka, akabibutsa ko kwishora mu biyobyabwenge no gutwara inda z’imburagihe bitagezweho.

Yavuze ko umurimo ari bwo buzima uko waba umeze kose, kuko urushaho gutuma umuntu yigirira icyizere kandi ngo haba hahishemo amahirwe yagutse y’ubuzima.

Yagize ati: “Mu buzima nabayelo iyo mba mvuye kwiga nkahita nyoboka ikoreshwa ry’ibiyobyabwenge ntabwo nari kubasha kugera ku nzozi zanjye. Nirinze izo ngeso zose zo kwishora mu bidafite umumaro numva ko nkwiye gufata umugambi mwiza kandi ndabikora ndinda inzozi zanjye.”

Akomeza asaba buri wese, yaba umusore cyangwa umukobwa, kwirinda bagategereza igihe cyabo kikagera nkuko na we icye cyageze atabikekaga.

Mukarubega Zulfat wahaye akazi Hatangimana, amushimira ukwihangana no kwitangira umurimo

Asaba urubyiruko gukura amaboko mu mifuka bakagana umurimo kabone n’iyo waba uciriritse utanga amafaranga make kuko ashobora gutunga umuntu bikamurinda gusabiriza.

Mukarubega Zulfat  washinze UTB, yashimye Hatangimana wihanganye agakora akazi abandi bize bashobora kubona nk’agasuzuguritse, ari na ho bamusanze bagasanga afite ibyangombwa byose by’umukozi bari bakeneye.

Yavuze ko uretse kuba yari yujuje ibisabwa, Hatangimana yagaragaje ubushobozi bwo kwitangira umurimo uko waba ugoye kose.

Mukarubega yaboneyeho kugaragaza akamaro k’Ishami ry’Ubukerarugendo ryatangijwe mu Karere ka Ruhango, ashimangira ko igitekerezo yakigize nyuma y’impanuro zatanzwe  n’Umukuru w’Igihugu Paul Kagame wasabaga  ubufatanye bw’Inzego za Leta n’abikorera mu Iterambere ry’Igihugu.

Umuyobozi w’Akarere ka Ruhango Habarurema Valens, avuga ko bishimiye kwakira Kaminuza y’Ubukerarugendo n’Ikoranabuhanga izafasha mu gutanga ubumenyi no guha akazi ku bana b’u Rwanda,  ikaba ije kunganira Kaminuza ya Gitwe.

Yaboneyeho gusaba urubyiruko gukurikira urugero rwa Hatangimana wemeye kwirengagiza amashuri ye agakora Ubuyede kugira ngo atunge umuryango we.

Ati: “Iri ni isomo buri wese akwiye kwiga, mu gihe cyose uwarangije amasomo ntakwiye kumva ko azahita abona akazi kajyanye n’ibyo yize, ahubwo akwiye guteganya ko hari umugani w’Ikinyarwanda uvuga uti “Iyimijwe n’ikaramu ntiramburura” bagategereza bihanganye.”

Kaminuza ya UTB muri Ruhango yatangiye gutanga amasomo mu bijyanye n’ubukerarugendo ndetse hari n’abanyeshuri bazatangwa n’Akarere bakennye kugira ngo bahabwe uburyo bwo kwiga batishyura kubera ubukene bw’imiryabgo yabo.

  • AKIMANA JEAN DE DIEU
  • Mutarama 7, 2024
  • Hashize amezi 2
TANGA IGITEKEREZO
lg says:
Mutarama 8, 2024 at 9:29 am

Uyu muvandimwe aratangaje ntasanzwe gusa abantu nkaba baba baratwe amafaranga yigihugu cyangwa yimiryango yabo bajya kwiga hanze bo bakagaruka mugihugu gutanga umusanzu wabo hajye hashirwaho urutonde rwabo ahagaragara kugirango aho bakenewe bahamagarwe nkuyu Bosco hamwe no kwihangana nimana yamuyoboye ubu yari kuzicwa ninzoga ubuzima bwe bukarangira uko gusa nkurikije ibitekerezo bye ashobora kuba atazinywa cyangwa anywa gake akabona umwanya wogutekereza no gufata icyemezo numuntu wumugabo cyane

U says:
Mutarama 8, 2024 at 3:46 pm

H

U says:
Mutarama 8, 2024 at 3:46 pm

H

Andika igitekerezo

AMATEGEKO AGENGA IYANDIKA RY'IGITEKEREZO CYAWE