Inama ya AGRF yitezwe i Kigali izategura ijwi ry’Afurika ku biribwa muri COP27

  • NTAWITONDA JEAN CLAUDE
  • Werurwe 14, 2022
  • Hashize imyaka 2
Image

Inama y’Ihuriro Nyafurika ku Iterambere ry’Ubuhinzi muri Afurika (African Green Revolution Forum/AGRF 2022) yitezwe kubera i Kigali mu Rwanda hagati y’italiki 5-9 Nzeri 2022 yitezweho kuzaba amahirwe yo gutegura ijwi rihuriweho ry’Afurika mu bijyanye no kurinda uruhererekane rw’ibiribwa.

AGRF 2022 ije mu gihe cy’ingenzi, Afurika igeze mu ikoni riyiganisha ku kuzahura ubukungu ndetse n’iterambere rishingiye ku kwiyemeza kwagaragajwe mu masezerano y’i Malabo, intego za Gahunda yagutse y’Iterambere ry’Ubuhinzi muri Afurika (CAADAP) ndetse n’iz’Umuryango w’Abibumbye z’Iterambere Rirambye (SDGs).

Umuyobozi w’Umuryango Nyafurika uharanira guteza imbere ubuhinzi (AGRA) Dr. Agnes Kalibata, yavuze ko uyu muryango utewe ishema no kuba waratangije iyo nama ya AGRF 2022 izabera i Kigali mu Rwanda ishyigikira ishyirwa mu bikorwa ry’imishinga igamije kuzahura iterambere ry’ubuhinzi n’ubukungu bw’Afurika muri rusange.

Yavuze kandi ko iyo nama iziga ku buhinzi bw’Afurika izaba n’amahirwe yo guhuriza hamwe ijwi rusange ry’Afurika ku birebana n’umutekano w’ibiribwa ndetse n’ihindagurika ry’ikirere rizatangazwa mu nama ya 27 y’Umuryango w’Abibumbye yiga ku ihindagurika ry’ikirere (COP27) yitezwe mu kwezi k’Ugushyingo ahitwa Sharm el-Sheikh mu Misiri.

Ni muri urwo rwego ubuyobozi bwa AGRA bwatangaje ko bwiyunze kuri gahunda “AIM for Climate” igamije guhanga udushya mu buhinzi duhangana n’imihindagurikire y’ikirere.

“AIM for Climate” ni gahunda yatangijwe muri COP26 yabereye i Glasgow ihuriweho na Leta Zunze Ubumwe z’Abarabu na Leta Zunze Ubumwe z’Amerika igamije kwihutisha ishoramari no gushyigikira ubuhinzi bwifashishije ikoranabuhanga no guhanga udushya mu kubungabunga uruhererekane rw’ibiribwa.

Mu nama y’Abaminisitiri yabereye i Dubai, gahunda ya AIM for Climate yagenewe intego ya miliyari 8 z’amadolari y’Amerika azakusanwa n’inzego za Leta ku bufatanye n’iz’abikorera zizifashishwa mu kwimakaza ikoranabuhanga mu buhinzi no mu kunoza udushya mu ruhererekane rw’ibiribwa.

Biteganyijwe ko iyo nkunga igomba kuba yakusanyijwe mbere y’uko Inama ya COP27 iterana mu Gushyingo 2022.

Harimo gukkusanywa inkunga izifashishwa mu guteza imbere ubuhinzi butanga umusaruro uhagije

Nk’umufatanyabikorwa w’iyo gahunda mu bijyanye no gutanga ubumenyi, AGRA ishyigikira intego mpuzamahanga zayo kandi irateganya kurema amahirwe ashyigikira ibihugu by’Afurika mu iterambere ry’ubuhinzi binyuze mu ishoramari no kunganira abahinzi baciriritse kwihanganira ingaruka z’imihindagurikire y’ikirere.

Ubu bufatanye buje bukurikira inama ubuyobozi bwa AGRA bwagiranye na Minisitiri wa UAE ushinzwe kurwanya Imihindagurikire y’Ikirere n’Ibidukikije Mariam Almheiri  ari na we wasobanuye byinshi kuri gahunda ya AIM for Climate n’intego yayo nyamukuru yo gutanga ibisubizo bihuza ubuhinzi n’ikirere.

Minisitiri Mariam Almheiri yahuye na Dr. Kalibata ndetse n’itsinda ry’abayobozi bo muri Guverinoma za Ethiopia, Ghana, Malawi, Nigeria, Tanzania na Uganda mu CYumweru cyahariwe Ubuhinzi, Ibiribwa n’Imibereho cyizihijwe mu Imurikagurisha Mpuzamahanga ryabereye i Dubai (Expo 2020 Dubai).

Dr. Kalibata yavuze ko hazakenerwa ubwitange n’ibikorwa bifatika kugira ngo abahinzi baciriritse babashe guhangana n’imihindagurikire y’ibihe.

Ati: “Hatagize igikorwa, ingaruka z’ihindagurika ry’ikirere zizatuma umusaruro w’ibihingwa byose ugabanyuka ku kigero cya 30% bitarenze mu 2050., mu gihe Ibiza biterwa n’imihindagurikire y’ikirere bishobora kuzatera ibihombo bituruka ku kubura ubuziranenge bw’umusaruro n’ingano yawo.”

Yakomeje avuga ko AGRA itewe ishema no kwiyunga kuri AIM for Climate nk’umufatanyabikorwa mu bijyanye n’ubumenyi no gufatanya n’abandi bafatanyabikorwa kwihutisha urugendo rwo gushaka ibisubizo bishingiye ku guhanga udushya.

Muri EXPO, Perezida wa AGRA yanagarutse ku mahirwe y’ingenzi ari mu bufatanye na Banki y’isi, Komite Mpuzamahanga ishinzwe Umutekano w’Ibiribwa, EAT Foundation, Umuryango Bill and Melinda Gates Foundation hamwe na Nourishing Africa byiyemeje gushyigikira ibihugu by’Afurika mu bijyanye no kubiha ubushobozzi bw’imari mu kubaka uruhererekane rw’ibiribwa.

Ati: “Intumbero yacu ni ugukorana bya hafi na Guverinoma zo muri Afurika tuzifasha kugera ku mahuriro akusanya ubushobozi bwihutisha ibyo ziyemeje mu guhindura uruhererekane rw’ibiribwa mu bihugu ndetse no kubuhinduramo ibikorwa bifatika. Harimo gushyiraho intumbero n’amavugurura agomba gushyirwa mu bikorwa.

Yongeyeho ati: “Hamwe n’abafatanyabikorwa bacu, AGRA yishimiye gutangiza Inama y’Ihuriro AGRF rizabera i Kigali mu Rwanda muri Nzeri 2022 mu gushyigikira gahunda yo kubaka imishinga yo gushyira mu bikorwa no guhuriza hamwe ijwi ry’Afurika ku mutekano w’ibiribwa n’ikirere rizatangazwa muri COP27 mu Misiri mu mpera z’uyu mwaka.”

Mu nama yo mu 2021, COP26, hagaragajwe ukwiyemeza mu kwimakaza imirire iboneye, guhanga udushya, gukoresha ingufu zisubira, guhangana n’ihindagurika ry’ikirere, ubucuruzi mpuzamahanga n’ishoramari hagamijwe kuzana impinduka mu ruhererekane rw’ibiribwa.

Hubakiwe ku jwi rimwe ry’Afurika ku ruhererekane rw’ibiribwa no ku nzira zirenga 30 zafasha kugera ku mpinduka zikenewe muri urwo ruhererekane ku mugabane w’Afurika, COP27 yitezweho kugaragaza ubuyobozi bukomeje kugaragaza umwihariko mu kugeza izo nzira ku rundi rwego.

  • NTAWITONDA JEAN CLAUDE
  • Werurwe 14, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE