Imyuka iva muri Afurika si yo ihumanya ikirere-Perezida Kagame

  • NTAWITONDA JEAN CLAUDE
  • Gicurasi 17, 2022
  • Hashize imyaka 2
Image

Umugabane w’Afurika ufite inshingano zo gutanga umusanzu mu guhangana n’ingaruka z’imihindagurikire y’ikirere, cyane ko ari cyo kiza giteje inkeke kurusha ibindi mu kinyejana cya 21 bitewe n’uko ibibazo byinshi bigishamikiyeho uhereye ku byorezo ukageza no ku biza by’amoko atandukanye.

Perezida wa Repubulika y’u Rwanda Paul Kagame, yongeye gusaba ubufatanye bw’ibihugu byose mu guhangana n’imihindagurikire y’ikirere ishamikiye ku ikoreshwa ry’ingufu zangiza ibidukikije kubera ibyuka bihumanya biva mu nganda, ibinyabiziga ndetse no mu bikoresho byo mu ngo nk’ibyuma bikonjesha n’ibindi.

Mu muhango wo gufungura inama mpuzamahanga yiga ku kugeza ingufu kuri bose iteraniye i Kigali guhera kuri uyu wa Kabiri kugeza ku wa Kane, Perezida Kagame yavuze ko nubwo Afurika isabwa kuba umwe mu batanga ibisubizo atariyo nyirabayazana w’ingaruka z’ibibazo byugarije Isi bishamikiye ku mihindagurikire y’Ikirere.

Yagize ati: “Ibyo bikwiye kujyana no gukusanya inkunga yisumbuye igenerwa bihugu bikiri mu nzira y’amajyambere, hagamijwe guhangana n’imihindagurikire y’ikirere nk’uko bikubiye mu masezerano mpuzamahanga. Afurika ntishobora kwikorera uyu mutwaro yonyine cyane ko ibyuka yohereza mu kirere atari byo byateje ikibazo cy’imihindagurikire y’ikirere. Ariko rero, Afurika izaba kimwe mu bisubizo.”

Ubushakashatsi bwagaragaje ko u Bushinwa, Leta Zunze Ubumwe z’Amerika (USA), Umuryango w’Ubumwe bw’u Burayi (EU), u Buhinde, u Burusiya, u Buyapani, Brazil, Indonesia, Iran na Canada ari byo bihugu 10 biza imbere mu kohereza imyuka ihumanya ikirere kuko byoherezayo kimwe cya kabiri.

U Bushinwa, USA na EU ubwabyo bigira uruhare rungana na 41.5% mu gihe ibihugu bya nyuma 100 byiganjemo iby’Afurika byose hamwe byohereza mu kirere ingano ya 3.6%.

Perezida Kagame yakomeje agaragaza ingero z’uburyo Afurika yatangiye gutanga bimwe mu bisubizo mu guhangana n’imihindagurikire y’ikirere binyuze mu gushyiraho Ikigo Nyafurika cy’Icyitegererezo mu gutunganya ingufu zikonjesha, cyatangijwe mu mwaka wa 2020 ku bufatanye bwa Leta y’u Rwanda n’iy’u Bwongereza, n’Ishami ry’Umuryango w’Abibumbye ryita ku Bidukikije.

Yavuze ko icyo kigo kiri mu bikorwa bifatika bifasha u Rwanda n’Afurika kugera ku ntego zikubiye mu masezerano ya Montreal yerekeye imyuka yangiza akayunguruzo k’izuba yavugururiwe i Kigali mu mwaka wa 2016.

Ayo masezerano yakomeje kubungabungwa mu mugambi wo gukumira ibyuka bituruka mu byuma bikonjesha (hydrofluorocarcons/ HCFCs na hydrofluorocarbons/HFCs) hagamijwe kubungabunga akayunguruzo k’izuba no kurengera ibidukikije.

Ivugururwa ry’amasezerano ni imwe mu ntambwe ikomeye Isi yateye mu rwego rwo kugabanya ubushyuhe kugera munsi ya dogere 2 nk’uko byemejwe mu nama yabereye i Paris mu Bufaransa mu mwaka wa 2015.

Perezida Kagame yavuze ko uretse kuba icyo kigo gikomeje kugira uruhare mu guhindura imikoreshereze y’imyuka ikonjesha, kizanagira uruhare rukomeye mu kubika imiti n’inkingo bikenera gukoneshwa.

Iyi nama iteraniye muri Kigali Convention Center

Yakomeje ashimangira ko ibyo byose bikeneye ubufatanye buhoraho, agira ati: “ Dufite inshingano duhuriyeho zo guharanira ko ibikorwa byacu bihura n’intego twihaye. Itsinda ry’abafatanyabikorwa batandukanye bitabiriye iyi nama, ni igihamya cy’urwego rw’ubufatanye bukenewe mu kugera ku byo twiyemeje gukorera imiryango yacu n’umubumbe wacu.”

Hakenewe imicungire irambye y’ingufu muri Afurika

Intego ya 7 y’Intego z’Iterambere Rirambye (SDGs) zashyizweho n’Inteko Rusange y’Umuryango w’Abibumye mu mwaka wa 2015, ishimangira ko bitarenze mu 2030, abantu batuye Isi bose bakwiye kuzaba bagezweho n’ingufu zihendutse, zizewe, ziramba kandi zijyanye n’igihe.”

Ibyo ngo bikwiye kugerwaho binyuze mu bufatanye mpuzamahanga mu koroshya ubushakashatsi no gukwirakwiza ikoranabuhanga ryihuse mu kubyaza umusaruro ingufu zisubira, kunoza imikoreshereze yazo no gukoresha ibikomoka kuri Peteroli mu buryo butangiza ibidukikije, kwimakaza ishoramari mu bikorwa remezo by’ingufu n’ikoranabuhanga ritanga ingufu zisukuye.

Perezida Kagame yavuze ko nubwo mu myaka isaga icumi ishize hari byinshi byagezweho, icyorezo cya COVID-19 cyaje kibisubiza inyuma ibindi biradindira.

Ati: “Icyorezo cya COVID-19 cyasubije inyuma ibyinshi mu byari byagezweho. Uyu munsi muri Afurika, abaturage basaga kimwe cya kabiri cya miliyari ntibaragerwaho n’amashanyarazi. Iki cyuho cyo kubura ingufu, cyahuriranye n’ikibazo cy’imihindagurikire y’Ikirere, cyibasiye umugabane wacu by’umwihariko.”

Yakomeje ashimangira ko kwimukira ku ngufu zisubira ari ingenzi, ari na yo mpamvu korohereza abashoramari bikwiye guhabwa ingufu nyinshi kugira ngo batange umusanzu wabo mu kubaka ibikorwa remezo muri urwo rwego.

Yakomeje agaragaza uburyo Afurika ishobora kugera ku ngufu zigera kuri bose, mu buryo buhendutse kandi butangiza ibidukikije. Muri ubwo buryo harimo kwagura ikoranabuhanga mu kongera ingufu zidafatira ku ngomero , kunoza politiki igenga imicungire y’ingufu mu buryo burambye no kubaka ibigo bikomeye kandi bishoboye gucunga ingufu zikusanywa.

Ati: “Hakenewe ibigo bicunga ingufu bikomeye kuko ari ingenzi mu guharanira gukwiza izo ngufu ku giciro kibereye buri wese. Bikeneye gucungwa kinyamwuga kandi bikanaterwa inkunga.”

Muri iyi nama y’iminsi itatu izasoza ku wa Kane taliki ya 19 Gicurasi, Perezida Kagame yibukije guhuza gahunda z’iterambere rirambye n’imishinga igamije kwigobotora ingaruka z’icyorezo cya COVID-19 bishobora gutanga umusaruro mu rugendo rwo kwimukira ku ngufu zitangiza ibidukikije.

Yanavuze ko ukwo kwimuka gukwiye kujyana n’intego z’iterambere by’umwihariko ku mugabane w’Afurika, no guharanira ko nta n’umwe usigara inyuma.

Iyo nama yahuje abayobozi b’imiryango n’ibigo mpuzamahanga n’abahagarariye urubyiruko rwaturutse mu bihugu bitandukanye rwiyemeje guhuza imbaraga mu guharanira kugera ku ngufu zisukuye (zitangiza ibidukikije).

  • NTAWITONDA JEAN CLAUDE
  • Gicurasi 17, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE