Imyiteguro y’Igihembwe cy’ihinga 2024 A irarimbanyije

  • Imvaho Nshya
  • Kanama 22, 2023
  • Hashize amezi 9
Image

Umuhindo uregereje, abahinzi batangiye gutegura imirima, imirimo igeze kure, hakaba hari icyizere ko igihembwe cy’ihinga 2024 A kizagenda neza, bahinga ubutaka, bategura imbuto n’inyongeramusaruro kugira ngo bihaze banasagurire amasoko, biteze imbere.

Ubu butumwa bwatanzwe n’Umuyobozi Wungirije Florence Uwamahoro ushinzwe Iterambere ry’ubuhinzi, ubwo yatangaje ko imyiteguro y’igihembwe cy’ihinga ihagaze neza, ku buryo hamaze gutegurwa imirima ndetse n’ibindi bijyanye no kongera umusaruro.

Yagize ati: “Twamaze gukorana n’Inzego z’ibanze ubuso bwarateguwe ndetse bwiyongereyeho 0,6% ugereranyije n’ubwo umwaka ushize mu gihembwe cya A cy’ihinga. Abahinzi bariteguye utegura abahinzi gutegura inirima, inyongeramusaruro, ifumbire.

Ku bijyanye no Iki gihembwe gikurikiye icyaranzwe n’izuba mu gihe kirekire kuko imvura yacitse kare, yavuze ko hari gahunda zafashwe zigamije gukemura icyo kibazo, abahinzi bagezwaho ibikoresho bibafasha kuhira, kubagezaho imbuto ku gihe n’inyogeramusaruro byarorohejwe bikorwa mu ikoranabuhanga kandi byanabegerejwe aho batuye.

Yagize ati: “Iki gihembwe gikurikiye igihembwe cy’imvura yacitse kare, hari ibihingwa biteze nk’ibigori mu Burasirazuba. Ku bishyimbo hoherejwe imashini zabafashije kuhira cyane cyane aho byendaga kwera baravomerera. Muri iki gihembwe, hashyizwemo imbaraga nyinshi n’ubufatanye bw’inzego zitandukanye ngo imvura iramutse iguye duhite duhinga.

Kwagura ubuso bijyanye kandi no guhangana n’ingaruka z’ibihe, ibikorwa remezo byongerwa byo kuhira kandi bigatangwa kuri nkunganire, umuhinzi yishyura 50% Leta nayo ikamutangira 50 ngo bashobore kuhira ndetse no ku misozi”.

Yakomeje asobanura ko buri gace gafite ibihingwa byatoranyjwe bijyanye naho muri iki gihembwe bakaba hazahingwa imyumbati mu Ntara y’Amajyepfo, ibishyimbo n’ibirayi mu Majyaruguru.

Ku bijyanye n’indwara yibasiye imyumbati, yavuze ko biterwa ahanini n’imihindagurikire y’ibihe iteza impinduka ku kirere bikazana indwara, indiririzi bigasaba kongera imbaraga mu bushakashatsi, hagashakwa ubundi bwoko kandi birakorwa , haboneka abatubura imbuto kuko tubaha imbuto y’ibanze, irahari yatubuwe mu Mayaga mu Ntara y’Amajyepfo yihanganira iyo kabore.


Ikindi abahinzi bagirwa inamayo kudahita basubiza igihingwa mu murima cyahunzwemo kuko byorohereza uruhererekane rw’indwara, si byiza guhita usubizamo imyumbati basabwa kuba barabanje guhingamo ibindi cyangwa se iyo mbuto nshya y’ imyumbati igahingwa ahatarahinzwe imyumbati.

Umuhinzi wo mu Karere ka Kamonyi, Neza yavuze ko Umuhindo w’ubushize watsemo izuba, ariko ubu abona imvura ishobora kuzagwa neza, bikaba bitanga icyizere cyo kweza.

Yagize ati: “Mfite icyizere cy’uko umuhindo uzaba mwiza, mba mbona mu kirere harimo imvura, ndetse no kuba abahinzi dusigaye twiyandikisha hakiri kare tukagaragaza ibyo tuzakenera ariimbuto y’idobanure, amafumbire,… ibyo bituma umuntu aterera igihe, bikaba byatuma umuntu abona umusaruro mwiza”.

Hari nkunganire ku bihingwa nk’ibigori, soya, ingano, aho Leta yunganira ku mbuto n’ifumbire no ku bihingwa 9 byatoranyijwe, aho ifumbire ya DAP yunganiwe kuri 42% umuhinzi agasabwa gutanga amafaranga y’u Rwanda 752, NPK ku muceri, ibirayi, urutoki, imbutoyaguraga 1266, none ubu umuhinzi atanga amafaranga y’u Rwanda 654, ku bigori, ingano n’umuceri kuri nkunganire umuhinzi yishyura 640 ku kilo aho kuba 965.

Leta ikomeje gutanga Nkunganire, abahinzi basabwa kuzikoresha neza kimwe no kwitabira gukoresha hybride.

Uruhare rw’abahinzi ni ukugaragaza ibyo bakeneye, imbuto, ifumbire kugira ngo bibagereho hakiri kare, hashyizweho uburyo bw’ikoranabuhanga, Smart Nkunganire ahifashishwa *774# ubundi hagakurikizwa amabwiriza, abahinzi bagafashwa kwiyandikisha bafashwa n’Abajyanama b’ubuhinzi n’ubworozi, abacuruza imbuto n’inyongeramusaruro, Inzego z’ibanze bifashishije telefone, mu gihe mbere impapuro zatindaga.

Yanditswe na NYIRANEZA JUDITH

  • Imvaho Nshya
  • Kanama 22, 2023
  • Hashize amezi 9
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE