Impuruza ku rurimi rw’Ikinyarwanda rudakoreshwa mu nyandiko

  • KAMALIZA AGNES
  • Gashyantare 21, 2024
  • Hashize amezi 2
Image

Ubushakashatsi bwakozwe n’Inteko y’Umuco bugaragaza ko ururimi rw’Ikinyarwanda rukoreshwa gake  cyane ku byapa ndetse n’izindi nyandiko kuko iyo rutavangiye rukoreshwa ku kigero cya 15%.

Ni mu gihe Ikinyarwanda aho gikoreshwa kivanzwe n’izindi ndimi kiri kuri 48%.

Ni ibyatangajwe bivuye muri raporo y’ubushakashatsi bwakozwe ku iturana ry’indimi mu Mujyi wa Kigali, kuri uyu wa 21 Gashyantare 2024 hanamurikwa inkoranyamagambo y’Ikinyarwanda y’Ubukungu n’Imari.

Musabeyezu Theogene, ushinzwe ubushakashatsi ku iyigandimi nyamubano n’ubuvanganzo mu Nteko y’Umuco, avuga ko ubu bushakashatsi bwakozwe hibandwa ku byanditse birimo ibyapa byo mu muhanda ndetse n’izindi nyandiko, bugaragaza ko Ikinyarwanda cyonyine gikoreshwa ku kigero cya 15%.

Ati: “Dukora ubu bushakashatsi twashakaga kumenya uko indimi zituranye n’Ikinyarwanda zikoreshwa muri Kigali cyane cyane ku byapa kugira ngo iyo shusho idufashe gukora ingamba tugendeye ku byo twakuye mu bushakashatsi. Twasanze Ikinyarwanda aho gikoreshwa cyonyine gikoreshwa kuri 15%, wagikubira hamwe n’izindi ndimi ukagisanga kuri 48%.”

Musabeyezu yongeyeho ko ururimi rw’Ikinyarwanda rutazazimira burundu kuko ari ndengamipaka kandi rukaba ruvugwa ku kigero cya 99%.

Masozera Robert, Intebe y’Inteko y’Umuco, agaragaza ko nubwo Ikinyarwanda gituranye n’izindi ndimi zikoreshwa mu Rwanda zirimo Icyongereza, Igifaransa n’Igiswahili, bikwiye ko kiza ku isonga kuko hari icyuho mu mikoreshereze yacyo kandi bibangamiye Abanyarwanda.

Ati: “Ururimi rw’Ikinyarwanda ruvugwa n’Abanyarwanda ariko iyo ugiye mu mikoreshereze cyane ahantu hahurira abantu benshi ntabwo ruhabwa umwanya rukwiye. Byagaragaye ko aho rukoreshwa rwonyine ari 15%, bigaraza ko serivisi zidatangwa mu rurimi Abanyarwanda basanzuramo kandi si ko byagakwiye kugenda.”

Bamwe mu baganiriye n’Imvaho Nshya bagaragaza ko babangamirwa n’ibyapa bibayobora ndetse n’ahatangirwa serivisi kuko biba byanditse mu ndimi badasobanukiwe.

Mujyanama Gideon ati: “Akenshi iyo ngiye nko mu Mujyi mbona nk’inzu z’ubucuruzi ariko kuko mba nzi ibikorerwamo sinsoma ibyapa biziranga, harimo ibyo wasoma ntubimenye. Ubwo rero nk’umuntu uhaje ari ubwa mbere atazi izo ndimi z’amahanga urumva ko kuhamenya byamugora”.

Mujawamariya Jack nawe ati: “Biracyagoye kuko iyo urebye ibyapa haba ibimanikwa ku mihanda, ku nzu z’ubucuruzi ndetse n’ahandi, ibyinshi biri mu Cyongereza bagiye bandikaho indimi zose byadufasha.”

Intebe y’Inteko Masozera,  agaragaza ko ubu bushakashatsi  bwakozwe buje butabaza ngo harebwe icyakorwa.

Ati: “Minisiteri y’Ubumwe bw’Abanyarwanda n’Inshingano Mboneragihugu irateganya gushyiraho amabwiriza agenga imikoreshereze y’indimi , ariko by’umwihariko uburyo Ikinyanrwanda cyashyirwa ku isonga mu nzego zitandukanye”.

  • KAMALIZA AGNES
  • Gashyantare 21, 2024
  • Hashize amezi 2
TANGA IGITEKEREZO
Lg says:
Gashyantare 22, 2024 at 7:05 am

Nibyo kandi balimo namakosa akururira abantu akaga aho ujya bakaguha inyandiko zanditse mucyongereza ntacyo uzi ugasinya naho usinyiye ibintu utazi hashira igihe bikagukururira ingorane umuntu inyandiko ahabwa asaba service zigomba kuba murulimi azi byanze bikunze ngo asinyire ibyo yasomye naho baraguha ngo sinya aha ejo bati dore ahowasinye kandi utali usobanukiwe ibyanditsemo aha halimo ikosa rikomeye ntabwo abanyarwanda bose bize icyongereza bajye babaza umuntu mbere yo kumusinyisha izo nyandiko nuburenganzira bwumuturage budakuka agomba guhabwa ibitazamukururira ibibazo nyuma

MARINE says:
Gashyantare 22, 2024 at 12:20 pm

Iyo umuntu avuze ikinyarwanda mu ruhame, bamwe baramuseka, sinzi icyo tuzakora rero.

Andika igitekerezo

AMATEGEKO AGENGA IYANDIKA RY'IGITEKEREZO CYAWE