Impunzi za Mahama zahawe ibikoresho byo kubika amazi

  • Imvaho Nshya
  • Werurwe 24, 2022
  • Hashize imyaka 2
Image

Impunzi zicumbikiwe mu Nkambi ya Mahama iherereye mu Karere ka Kirehe, mu Ntara y’Iburasirazuba bahawe amajerekani yo kuvomesha no kubikamo amazi, basabwa kongera isuku bakarushaho kwirinda indwara zituruka ku gukoresha amazi mabi.

Ni amajerekani 200 ya litiro 20 bahawe ubwo Ikigo Cya Ayateke Star Campany cyifatanyaga n’izi mpunzi kwizihiza Umunsi mpuzamahanga w’amazi uba buri taliki ya 22 Werurwe, kuri iyi nshuro insanganyamatsiko isaba buri wese gukura amazi ahashoboka hose no munsi y’ubutaka.

Impunzi zahawe ibi bikoresho zasabwe kubifata neza ari nako zongera isuku haba ku mubiri no ku mazi bakoresha. 

Ninahazwe Claudine, avuga ko nubwo amazi mu nkambi bayegerejwe ariko igihe bibaye ngombwa ko abura buri wese aba akeneye igikoresho cyo kuba yabitsemo ayo yavomye kugira ngo ataza kuyabura bikamusaba kujya kuyasaba.

Akomeza agira ati “Amazi hari igihe tuyabura bitewe n’ibyuma biba byapfuye. Ingaruka zo kuba amazi yabura ni uko abana bakirirwa bafite inzara, wabona n’izo mboga uri buteke ukaba ubuze hafi ya mazi kuko utayavomye ngo uyabike mu nzu yawe.”

Mukashema Francine nawe yagize ati “Icyiza gihari ni uko iyo atari mu bihe by’izuba ntabwo tujya tubura amazi cyane bikabije, niyo abuze abura muri cya gihe cy’izuba. Ayo kunywa ntabwo tugira uko tuyabika, ubuzima bw’impunzi uba ufite ijerekani imwe, ebyiri, andi ntubona aho kuyabika mu gihe tugeze muri rya zuba aho amazi ashobora kubura amasaha runaka. Bibaye byiza nk’uku tukabona twese amajerekani yo kuyashyiramo, nko muri cya gihe amazi yabuze ukaba ufite aho wayabitse mu nzu, byaba ari byiza cyane.”

Umuyobozi Mukuru wa Ayateke Star Company Ltd, Eng. Sebikwekwe yavuze ko ubusanzwe mu nkambi ya Mahama icumbikiye impunzi z’Abarundi n’Abakongomani zirenga ibihumbi 55 basanzwe batangamo amazi aturuka mu ruganda ruyungurura amazi y’Umugezi w’Akagera bahashinze kuva mu 2016 ku bufatanye na HCR.

Akomeza avuga ko kugira amazi ari kimwe ariko impunzi zikenera no kugira ibikoresho byo kubikamo ayo mazi kugira ngo bayakoreshe afite isuku.

Eng. Sebikwekwe uyobora Ayateke Star Company

Agira ati “Nk’uyu munsi twabahaye amajerekani 200 ariko kwari ukubyerekana kuri uyu munsi mpuzamahanga w’amazi naho amazi tuyabaha buri munsi. Ubundi buri kwezi tugira gahunda dufata tukabaha amajerekani, gusa na bo kubera ko HCR ibafasha ibinyujije mu bandi baterankunga babaha ubushobozi ku buryo batananirwa kwigurira ibindi bikoresho keretse abo bigaragaye ko bafite ibibazo bikomeye, ni bo biba ngombwa yuko dufatanya n’iyo miryango yindi tukabagurira ibikoresho”.

Impunzi zituye muri iyi nkambi zihabwa amazi ku buryo muri metero 50 haba hari ivomo rusange.

Umuyobozi ushinzwe Inkambi ya Mahama ku rwego rwa Minisiteri y’Ubutabazi, yavuze ko ubusanzwe mu bikoresho bagenerwa harimo n’amajerekani avuga ko abo zasazanye hazakorwa ubuvugizi bagahabwa izindi.

Ati “Icyo kirantangaje, bavuga ko badafite icyo bavomesha amazi, byaba ari uburangare bw’urugo ariko na bo ubwabo bagomba gutera intambwe rimwe na rimwe bakabyishakira kuko ntabwo ibintu byose bazabihabwa n’abaterankunga. Ku bo zasazanye, tuzakomeza dukore ubuvugizi ku babishinzwe turebe, niba ayo majerekani yaboneka, turebe n’abatayafite kuko ntabwo ari bose.”

Yasabye izo mpunzi gufata neza ibikorwa remezo kuko hari hamwe byamugaragariye ko robine z’amazi zangizwa mu buryo butandukanye.

  • Imvaho Nshya
  • Werurwe 24, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE