Impinduka n’udushya mu gutegura Manifesto ya FPR Inkotanyi y’imyaka 5

  • Imvaho Nshya
  • Ugushyingo 13, 2023
  • Hashize amezi 6
Image

Abanyamuryango ba FPR Inkotanyi bari basanzwe bategura imigambi (Manifesto) y’imyaka irindwi, kuri ubu bakomeje imyiteguro yo gutegura imigambi y’imyaka itanu hashingiwe ku byo Umuryango uteganya kugeza  ku Banyarwanda mu byiciro binyuranye by’ubuzima bw’Igihugu.

Izo mpinduka kandi zirajyana n’udushya twahanzwe mu gutanga ibitekerezo Abanyarwanda batavunitse. Byagarutsweho ku Cyumweru tariki ya 12 Ugushyingo 2023, mu Nteko Rusange y’Umuryango FPR-Inkotanyi mu Ntara y’Iburasirazuba yabereye mu Karere ka Kayonza.

Muri iyo Nteko Rusange, habereyemo igikorwa cy’amatora yo gusimbuza abatakiri mu myanya batorowe mu matora y’abagize inzego z’Umuryango yabaye mu mwaka wa 2019, n’abari mu nzibacyuho.

Abanyamuryango ba FPR Inkotanyi bo mu Ntara y’Iburasirazuba basabwe kubyaza umusaruro amahirwe yo gutanga ibitekerezo bizifashishwa muri Manifesto y’Umuryango bizatangira gutangwa kuva ku rwego rw’Umudugudu kugeza ku rwego rw’Intara.

Kalenzi John, Umuyobozi w’umuryango FPR Inkotanyi mu Ntara y’Iburasirazuba, yavuze ko abanyamuryango  bakwiye gutanga ibitekerezo bizifashishwa muri Manifesto y’imyaka itanu bitandukanye n’uko byakozwe mu myaka ishize.

Yagize ati: “Turi gusoza Manifesto y’Umuryango y’imyaka irindwi ariko ubu turi gutegura uburyo tuzakira ibitekerezo bizifashishwa muri Manifesto y’imyaka itanu, mbere twari twateguye irindwi ariko ubu ni itanu na byo ni bishya kuko Umuryango FPR-Inkotanyi ugiramo guhanga udushya.

Ibyo bikorwa rero bizaba mu buryo butandukanye nkuko twabikoze mu bihe byatambutse kuko twajyaga ku Mudugudu abanyamuryango bakavuga ibyifuzo bikandikwa bikajya mu makarito bikajya mu Kagari, mu Murenge, mu Karere bikaza no ku Ntara bikagera no ku rwego rw’Igihugu.”

Yashimangiye ko Perezida wa Repubulika akaba n’Umuyobozi Mukuru w’Umuryango  FPR Inkotanyi Paul Kagame, n’abo bafatanya bahora barajwe ishinga n’ibiteza imbere Abanyarwanda bahanga ibishya bibunganira mu byo bakora, ari na yo mpamvu  ubu ibyo bikorwa bizaba hifashishijwe uburyo bw’ikoranabuhanga.

Kalenzi John yakomeje agira ati: “Ku bantu babizi neza bazi ko Chairman w’Umuryango ashyira imbere ikoranabuhanga ndetse akaba ashishikariza abanyamuryango kuryitabira kandi abishishikariza Abanyafurika n’abatuye Isi bose kwitabira ikoranabuhanga kuko rifasha kugera ku bintu byinshi n’abantu benshi mu buryo bwihuse kandi bworoshye tudatakaje igihe. Ni yo mpamvu Manifesto izategurwa hifashishijwe ikoranabuhanga bihereye ku banyamuryango n’ibitekezo bafite no gushyira mu bikorwa ibyifuzo byabo.

Uburyo gukoresha ikoranabuhanga mu gutegura Manifesto bizakorwa

Umuyobozi w’Umuryango FPR Inkotanyi mu Ntara y’Iburasirazuba, Kalenzi John, yasobanuye ko igikorwa cyo guhugura abanyamuryango mu buryo bwo gukoresha ikoranabuhanga cyatangiye bityo kikaba kizagezwa no ku banyamuryango kugera ku Mudugudu.

Yagize ati: “Ku rwego rw’Igihugu guhera tariki 10 Ugushyingo 2023 twakoze inama ku rwego rw’Igihugu tuganira kuri icyo gikorwa uko kizakorwa kandi ibyo byararangiye bityo hakaba hagiye gukurikiraho ku itariki 13 Ugushyingo 2023 bizaba ku rwego rw’Intara, ku ya 14 Ugushyingo 2023 bibe ku rwego rw’Akarere, 15 Ugushyingo 2023 ku rwego rw’Umurenge, kuri 16 ku rwego rw’Akagari kandi amateka agaragaza ko icyo FPR Inkotanyi yiyemeje ikigeraho nta nkomyi. Bityo tukaba twizeye ko na byo tuzabigeraho bitewe n’ubwitange abanyamuryango bagaragaza.”

Yakomeje avuga ko uburyo bw’ikoranabuhanga butazakoreshwa ku rwego rw’Umudugudu kuko ho hazaterana Inteko yaguye y’Umudugudu abanyamuryango bagatanga ibyifuzo bizajya muri Manifesto izakurikira.

Kalenzi yagize ati: “Abanyamuryango ba FPR Inkotanyi ku rwego rw’Umudugudu bazateranira mu Nteko yaguye bashyire hamwe ibitekerezo n’ibyifuzo, babitange byandikwe ku rupapuro kandi buri Mudugudu uzabishyikiriza urwego rw’Akagari kuko bizagera ku Mukuru w’Igihugu Paul Kagame, akuremo ibizajya muri Manifesto y’imyaka itanu.”

Ibyifuzo n’ibitekezo bizajyanwa ku Kagari bikaba bizandikwa uko byaje bigashyirwa mu ikoranabuhanga n’abagize Komite yaguye y’Akagari, iyo Komite na yo ikaba yemerewe gutanga ibitekerezo bibiri muri buri nkingi bitagaragajwe n’Imidugudu barebye mu bitekerezo bitari bisanzwe muri Manifesto iri kugana ku musozo.

Ibi kandi ni ko bizajya bikorwa kuva ku rwego rw’Akagari kugeza ku Ntara.

Bamwe mu banyamuryango ba FPR Inkotanyi bo mu Ntara y’Iburasirazuba bavuga ko hakwiye kongerwa imbaraga mu kwimakaza serivisi zihabwa abaturage kuko ubushakashatsi bw’Urwego rw’Igihugu rw’Imiyoborere (RGB) mu Turere 10 tuza inyuma harimo Akarere ka Kayonza ka 30, Gatsibo iba iya 27, Bugesera iya 25 n’utundi tw’Intara y’Iburasirazuba turi ku myanya idashimishije.

Ingabire Aline uturuka mu Murenge wa Rwempasha mu Karere ka Nyagatare, yagize ati: “Hakwiye gushyirwa imbaraga mu batanga serivisi mu Nzego z’ibanze kuva ku Mudugudu, kuko biragaragara ko serivisi zidatangwa neza bituma Uturere two mu Ntara yacu tuza mu myanya iri inyuma. Hari ibiro usanga iwacu bifunze cyangwa na serivisi zidatangwa neza.”

Inteko Rusange yabereyemo ibikorwa by’amatora yo  kuzuza Inzego z’Umuryango aho Kalenzi John yatorewe kuba Chairperson (Umuyobozi Mukuru) w’Umuryango FPR Inkotanyi mu Ntara y’Iburasirazuba; Dr Jeanne Nyirahabimana atorerwa kuba Visi Chairperson.

Hatowe kandi n’indi myanya itandukanye muri Komite Nyobozi y’Umuryango ku rwego rw’Intara no mu byiciro byihariye by’abagore n’urubyiruko bishamikiye ku Muryango FPR Inkotanyi.

NSHIMIYIMANA FAUSTIN

  • Imvaho Nshya
  • Ugushyingo 13, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE