Impamvu Umujyi wa Kigali wahagaritse gukorera ibirori mu mahema

  • Imvaho Nshya
  • Nzeri 21, 2023
  • Hashize amezi 8
Image

Hashize iminsi Ubuyobozi bw’umujyi wa Kigali busabye abakorera ibirori bitandukanye mu mahema kubihagarika bagashaka ibyangombwa bibemerera gukora, byatumye benshi mu bari basanzwe bakora iri shoramari muri aya mahema babyinubira bavuga ko ari icyemezo cyabatunguye kandi kizabahombya.

Mu kiganiro n’itangazamakuru kuri uyu wa Kane taliki ya 21 Nzeri 2023, Ubuyobozi bw’Umujyi wa Kigali bwagaragaje impamvu bwafashe icyemezo cyo guhagarika gukorera ibirori mu mahema ko ari ukugira ngo hubahirizwe igishushanyo mbonera cy’umujyi.

Umuyobozi w’Umujyi wa Kigali Pudence Rubingisa, yavuze ko byakozwe kugira hubahirizwe igishushonyo mbonera cy’Umujyi wa Kigali bityo ukorera mu mahema akabikora yujuje ibisabwa.

Ati: “Icyari kigambiriwe muri iyi guhunda ni ukugira ngo hubahirizwe igishushanyo mbonera, ntabwo ari ukuvuga ngo Umujyi uciye Tente (Amahema) byumvikane neza. Iyo ugiye gushyiraho igikorwa gikorerwa muri Tente ubisabira uburenganzira, tente zose dufite ntabwo zikorerwamo ubukwe, ushobora kugira Tente ikajya yakira inama, icyo tureba ni ese wujuje ibisabwa? Ese ubufite ubwiherero bujyanye n’umubare w’abantu? Ese ufite ibikoresho byahangana n’inkongi y’umuriro?”

Yanasobanuye ko hari n’ubukangurambaga bwo kurwanya urusaku mu mujyi wa Kigali ,ko ari bwo bigitangira ko ari urugendo kandi bisaba ko abantu bagira ibyo bahuza.

Ku kibazo cy’uko aya mahema atabasha gushyirwamo ibigabanya urusaku kugira ngo bitabangamira abandi baturanye n’ahakorerwa ibirori, umujyi wa Kigali wavuze ko abantu barimo kwibutswa kutabangamira abantu.

Ati: “Nta cyanya dufite cy’ahakorera amahema,turashaka ko buri muntu wese amenya icyo ahakorera,kuko ntabwo twabona umwanya ngo hariya  hagenewe ubukwe.”

Ku kibazo cy’uko hari abatejwe igihombo n’uko Umujyi wa Kigali wasohoye itangazo ribuza abantu kongera kwakira ibirori mu mahema batabifitiye uburenganzira, Umuyobozi w’umujyi wa Kigali yavuze ko kuri uyu wa Gatanu hateganijwe  ibiganiro hagati y’umujyi wa Kigali n’abakora ibikorwa by’imyidagaduro  kugira ngo barebe imbogamizi zihari no kubikora hubahirijwe ibisabwa.

  • Imvaho Nshya
  • Nzeri 21, 2023
  • Hashize amezi 8
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE