Impamvu RIB isaka umuntu cyangwa inyubako mu iperereza bitagombye urushya rw’inkiko

  • ZIGAMA THEONESTE
  • Mutarama 4, 2024
  • Hashize amezi 2
Image

Urwego rw’Igihugu rw’Ubugenzacyaha RIB rwasobanuye impamvu zifatika ziteganywa n’itegeko ari zo zituma rushobora gusaka umuntu ukekwaho cyangwa inyubako ahakekwa icyaha rutitwaje inyandiko y’urukiko.

Dr Murangira B.Thierry, Umuvugizi wa RIB yatangarije RBA ko hari impamvu zikomeye zituma abagenzacyaha  bakora iperereza bakoresheje uburyo bwo gusaka kubera impamvu zitandukanye.

Yagize ati: “Impamvu zifatika zituma ukekwaho icyaha kirimo gukorwa cyangwa kigiye gukorwa cyangwa hari ibimenyetso byerekana ko mu nyubako hari ibintu byakoreshejwe mu gukora icyaha cyangwa gikenewe ku mpamvu z’iperereza, cyangwa n’aho mu gihe bigaraga ko uwo muntu wakoze icyaha ko ari aho hantu kandi agomba gufatwa.”

RIB ivuga ko ibyo byateganyijwe mu irengayobora ryateganyijwe n’itegeko.

Ubundi iri hame rivuga ko mu gushaka umuntu cyangwa mu nyubako hashobora kuba hafitanye isano n’amakuru ashakwa, bigomba gukorwa hashingiwe ku ruhushya rwo gusaka.

Dr Murangira yatanze urugero ko ubugenzacyaha bushobora guhabwa amakuru atuma rutangira gusaka nta ruhushya buhawe.

Ati: “Ubugenzacyaha bushobora kumenya cyangwa guhabwa amakuru ko hari umuntu utwaye ibiyobyabwenge mu modoka runaka, bakaba bajya guhagarika iyo modoka bakayisaka, cyangwa se umuntu bakeka ko afite intwaro, cyangwa se umuntu wihishe ubutabera cyangwa yihishe mu nyubako runaka, cyangwa se uwatorotse ubutabera”.

Dr Murangira kandi yashimangiye ko izi ari impamvu zishingirwaho RIB isaka umuntu itagombye gusaba uburenganzira zidakoreshwa mu Rwanda gusa ko zikoreshwa no mu bindi bihugu bitandukanye.

Ku cyo kuba gusaka bishobora gufatwa nko kuvogera umuntu kandi Itegeko Nshinga rivuga ko umuntu ari ntavogerwa, Dr Murangira yasobanuye ko bikorwa mu nyungu z’ubutabera kandi ari zo nyungu za rubanda.

Kuri iyo ngingo kandi umuvigizi wa RIB avuga ko uwakorewe isaka akabona hari ibidakurikije amategeko ashobora kugana inkiko kugira ngo yerekane ko hari uburenganzira bwe bwahungabanyijwe .

Ingingo ya 76 mu gika cyayo cya kabiri cy’itegeko ryerekeye imiburanishirize y’imanza z’inshinjabyaha, riha umucamanza ububasha bwo gusuzuma ibikozwe mu gihe cy’iperereza bitubahirije amategeko, iyo asuzuma ikirego ku ifunga n’ifungurwa.

Iyo ngingo na none iteganya ko umucamanza, uburanisha imanza ku ifungwa ry’agateganyo afite inshingano zo gusuzuma niba mu bihe by’ifunga, uburebanganzira bw’ukurikiranyweho icyaha bwarubahirijwe mu gihe cy’iperereza.

Ku bibaza niba umukozi wa RIB ashobora kugendera ku mpamvu zifatika mu gusaka umuntu akaba yabikora mu nyungu ze bwite, Umuvugizi wa RIB Murangira yavuze ko uwo bigaragayeho abihanirwa hisunzwe amategeko.

  • ZIGAMA THEONESTE
  • Mutarama 4, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE