Impamvu Perezida Kagame atakijya ku bibuga by’umupira w’amagaru

  • SHEMA IVAN
  • Mutarama 24, 2024
  • Hashize amezi 4
Image

Perezida wa Repubulika Paul Kagame yongeye kugaruka ku mico mibi iba mu mupira w’amaguru mu Rwanda, avuga ko ari na byo bituma atakijya kuri sitade, asaba Minisiteri ya Siporo gukurikirana ibibazo bihari bigakemuka.

Ibi Umukuru w’Igihugu yabigarutseho kuri uyu wa Gatatu tariki 24 Mutarama 2024, ku munsi wa kabiri w’Inama y’Igihugu y’Umushyikirano ibaye ku nshuro ya 19, ubwo yasabwaga kongera kugaruka kujya aza gufana amakipe yo mu Rwanda.

Umunyabigwi mu mupira w’amaguru mu Rwanda, Jimmy Mulisa, akaba n’Umutoza wungirije w’Amavubi witabiriye iyi nama, yasabye ko hashyirwa imbaraga mu marushanwa y’umupira w’amaguru n’indi mikino mu mashuri kugira ngo bifashe mu gutegura impano z’abato.

Mulisa wakiniye APR FC n’Ikipe y’Igihugu igihe kirekire, yasabye Umukuru w’Igihugu gusubira muri za sitade gushyigikira amakipe yo mu Rwanda.

Yagize ati: “Kera wazaga kudufana, tugiye kujya no muri sitade nziza, turagusaba ko wakongera ukagaruka.”

Perezida Kagame asubiza Jimmy Mulisa, yavuze ko impamvu atagikunda kujya bibuga by’umupira w’amaguru ari uko bajya mundagu na ruswa.

Yagize ati: “Ndabyumva ibyo bansaba ariko nanjye mfite ibyo mbasaba… icyatumye kenshi ngabanya kujyayo (kuri sitade) ni bo byaturutseho. Ibintu by’imikino by’amarushanwa bigenda bikajyamo ruswa, bikajyamo amarozi ibyo bintu biraciritse njye ntabwo nabijyamo. Ni ho byageze mbivaho ibintu nka biriya ntabwo bari bakwiriye kuba babyihanganira.”

Ku kibazo kijyanye n’amarushanwa muri siporo, kwitabira umupira w’amaguru Perezida Kagame yasabye ko abashinzwe siporo bakwiriye kubirebaho ku buryo bakora icyatuma siporo itera imbere.

Perezida Kagame ku munsi wa kabiri w’Inama y’Umushyikirano 2024

Yagize ati: “N’ubundi ni byo bashinzwe.”

Yavuze ko atajya mu bintu birimo ruswa n’amarozi, ko ari na yo mpamvu yahagaritse kujya ku kibuga. Ati: “Ikindi gituma Umukuru w’Igihugu atakijya ku bibuga by’umupira w’amagaru harimo no kuba buri muntu wese yigira umuyobozi. 

Yagize ati: “Mbahe urugero rumwe, kera najyaga njya kureba umupira, icyo gihe Bihozagara ni we wari Minisitiri wa Siporo… icyo gihe hari umutoza wavaga mu Burasirazuba bw’u Burayi, nigeze no kumubona yigisha ikipe ya Ghana. Icyo gihe ni we wari hano.”

“Njya kubareba, mu biganiro abantu bavuga ibyo bashaka kuvuga, hanyuma ageze aho mu ijambo rye, aravuga ati mfite ikintu kimwe nshaka kubabwira, ati ikibazo kiri hano, ntabwo njye mwantumiye gutoza iyi kipe murampemba ariko ntabwo nshaka kujya ntwara amafaranga y’ubusa kuko nta kazi mfite.”

Perezida Kagame avuga ko uyu mutoza yashimangiye ko “Icyo mvuga ni uko hano utureba iyi kipe na njye umutoza, uko utureba, twese turi abatoza. Icyo yashakaga kuvuga, buri mukinnyi wese afite ibyo avuga ashaka ko bikurikizwa mu mikino no mu marushanwa kuri iyo kipe y’Igihugu cy’u Rwanda. Ati rero njye mwampemberaga kuba umutoza, ati ariko n’aba bakinnyi buri umwe ni umutoza.”

Umukuru w’Igihugu yavuze ko niba ibyo bikiriho, byaba ari ikibazo aho umukinnyi wese ahinduka umutoza kandi ko ari cyo cyatumye uwo mutoza asezera. Ati: “Nanjye ni yo mpamvu nasezeye”.

Perezida Kagame yasoje asaba Minisiteri ya Siporo gushyira imikino ku murongo, bityo ko nibigenda neza azasubira ku kibuga.

Ati: “Umunsi byahindutse wenda nzajyayo ariko ndabifuriza ineza kandi ndibwira ko Minisiteri ibishinzwe ikwiye kuba ibikurikirana, umupira w’amaguru ugatera imbere kandi tuzamushyigikira.”

Muri rusange, Perezida Kagame aheruka kureba umukino w’Ikipe y’Igihugu Amavubi kuri Sitade Amahoro mu 2016, mu mikino y’Igikombe cy’Afurika cy’Abakina Imbere mu Gihugu (CHAN) yabereye mu Rwanda.

  • SHEMA IVAN
  • Mutarama 24, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE