Imodoka y’uruganda rwabujijwe gukora imiheha yafatiwemo amakarito 500

  • NTAWITONDA JEAN CLAUDE
  • Mata 20, 2022
  • Hashize imyaka 2
Image

Uruganda NBG rwari rwarambuwe ububasha bwo gukora imiheha rukimukira ku gukora inzoga z’ibyotsi (Liquor) rushobora gucibwa akayabo ka miliyoni 20 z’amafaranga y’u Rwanda ruramutse ruhamwe n’isubiracyaha cyo gukora no gukwirakwiza imiheha ya Pulasitiki ikoreshwa rimwe.

Ni nyuma y’aho imodoka y’urwo ruganda ifatiwe mu Karere ka Kayonza ipakiye amakarito 500 y’iyo miheha ya Pulasitiki yaciwe mu Rwanda nk’uko biteganywa n’Itegeko No 17/2019 ryo ku wa 10/08/2019 ryerekeye kubuza ikorwa, itumizwa mu mahanga, ikoreshwa n’icuruzwa ry’amasashe n’ibikoresho bikozwe muri pulasitiki bikoreshwa inshuro imwe.

Umugore witwa Felicienne wari muri iyo modoka amaze gucakirwa n’Ishami rya Polisi y’u Rwanda rishinzwe kurwanya magendu yavuze ko iyo miheha yari ayikuye mu bubiko afite mu Mujyi wa Kigali akaba yari agiye kuyicuruza muri iki gihe yatangiye guhenda kuko itakiboneka mu maduka bitewe n’uko itemewe.

Abajijwe impamvu yari ayitwaye mu modoka y’uruganda rutari urwe kandi rwigeze gukora imiheha, uwo mudamu wabanje kubwira abaturage ko atwaye inzoga zikorwa n’uruganda NBG yasubije ko asanzwe aruranguriza inzoga kuko nyuma yo kubuzwa gukora imiheha rwimukiye ku gukora inzoga z’ibyotsi.

Kugira ngo hamenyekane ko iyo modoka isanzwe itwara inzoga ikaba iriho n’ibirango byemeza ko itwaye inzoga, itsinda ry’abapolisi ryari ririmo kubikurikirana ryagenzuye ibyo imodoka itwaye basanga imbere harimo amakarito 500 y’imiheha.

Umuyobozi w’Ishami rishinzwe Iyubahirizwategeko ry’ibidukikije mu Kigo cy’Igihugu gishinzwe kwita ku Bidukikije (REMA) Akimpaye Beatha, yagize ati: “Ntabwo harimo inzoga ahubwo harimo imiheha. Imiheha, amasashe n’ibindi bikoresho bikozwe muri Pulasitiki bikoreshwa inshuro imwe byaraciwe mu Rwanda ntibyemewe.

Uru ruganda niruhamwa no gukora icyaha rushobora gucibwa miliyoni 20 frw kubera ko bizaba bibaye isubiracyaha

Felicienne uvuga ko iyo miheha yari yarayiranguye ku ruganda rwa NBG mu kwezi kwa Mutarama 2022, akaba yari afite ububiko bwayo  ategereje ko agaciro kayo kiyongera kuko iyo ikintu giciwe gihindutse magendu abantu batangira kwishyira mu mitwe ko kigiye guhenda cyane.

Yavuze ko hakurikiyeho iperereza kugira ngo hamenyekane niba koko uyu mudamu ari we wacuruzaga iyo miheha cyangwa akaba yari atumwe n’uruganda NBG kuko n’iyo modoka yari itwawe n’umushoferi w’urwo ruganda.

Akimpaye yakomeje agira ati: “Bitewe n’ibyo umudamu avuga, hagomba gushakishwa amakuru hagakorwa ubusesenguzi bwimbitse kugira ngo hamenyekane nyir’igikorwa cyangwa se uwahamwa n’ibyaha.”

Nibigaragara ko ari igikorwa cya NBG, itegeko rivuga ko iyo bigaragaraye ko hari uruganda rukora ibikoresho bicibwa na rya tegeko acibwa amafaranga y’u Rwanda miliyoni 10 ndetse na bya bikoresho akabinyagwa.

Iyo bigaragaye ko ari isubiracyaha itegeko ritganya ko igihano cyikuba kabiri, ari na yo mpamvu uru ruganda rushobora gucibwa amafaranga asaga  miliyoni 20 kuko  no muri Mutarama rwari rwongeye gufarirwa mu byaha nk’ibi hamwe n’urundi ruganda rwitwa Holly Land.

Icyo gihe inganda zombi zafatanywe imiheha iranyagwa ndetse zinacibwa miliyoni 10 kuri buri rumwe nk’uko biteganywa n’itegeko.

Mu kwezi kwa Mutarama na bwo urwo ruganda kimwe n’urundi ruganda rwakoraga imiheha rwitwa Holly Land nanone bafatanywe iyo miheha, iyafashwe irafatirwa ariko banacibwa n’ubundi miliyoni 10 buri ruganda nk’uko biteganywa n’itegeko.

Nibiramuka bigaragaye ko icyaha ari icy’uwo mudamu Felicienne nanone itegeko riteganya ko umuntu uranguza acibwa amafaranga y’u Rwanda 700,000 na bya bicuruzwa bikanyagwa.

Iyi modoka isanzwe itwara inzoga ni yo yafatiwemo imiheha
  • NTAWITONDA JEAN CLAUDE
  • Mata 20, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE