Imishwi yaturagiwe mu Rwanda yatangiye koherezwa mu mahanga

  • NTAWITONDA JEAN CLAUDE
  • Ukwakira 6, 2022
  • Hashize imyaka 2
Image

Mu myaka itagera ku 10 ishize, amoko y’inkoko yose yororerwaga mu Rwanda yabaga afite inkomoko mu mahanga ariko kuri ubu ibintu byarahindutse kuko amahanga ni yo asigaye atumiza imishwi y’inkoko zikomoka mu Rwanda.

Abahanga mu by’ubworozi bw’inkoko bavuga ko ubusanzwe u Rwanda rwatumizaga imishwi mu bihugu bitandukanye birimo nk’u Bubiligi mu Buholandi, mu Birwa bya Maurice n’ahandi.

Ariko guhera mu mwaka wa 2017 ni bwo abashoramari baturuka muri Leta Zunze Ubumwe z’Amerika bashoye imari yabo mu Rwanda bashinga ikigo ‘Uzima Chicken’ gituraga imishwi, kigacuruza amagi ndetse n’ibiryo by’inkoko.

Dr. Theoneste Sikubwabo, Umuyobozi Mukuru ushinzwe ubucuruzi n’iyamamazabikorwa mu Kigo Uzima Chicken, yavuze ko icyo kigo gituraga kikanakwiza ku isoko ry’u Rwanda hejuru ya 97% by’imishwi ikenewe mu gihugu, aho mu kwezi kibasha guturaga imishwi miliyoni 1.2.

Uretse gukwiza iyo mishwi n’amagi yo kurya mu Rwanda, Uzima Chicken yohereza 25% by’imishwi mu bihugu bitandukanye byiganjemo iby’Afurika birimo Ghana, Repubulika ya Santarafurika, Congo-Brazzaville, Repubulika Iharanira Demokarasi ya Congo (RDC) na Cameroun.

Dr. Sikubwabo, inzobere mu bworozi cyane cyane ubw’inkoko, yagize ati: “Ibyo ni ibihugu tumaze koherezamo imishwi ariko tugenda twagura amasoko dushaka n’ibindi bihugu twoherezamo. Dutangira mu mwaka wa 2017, aha mu gihugu murabizi neza ko hari ikibazo cy’imishwi, aho aborozi bayikuraga mu mahanga. Twaje rero dufite gahunda yo kuziba icyo cyuho, imishwi yose ikenewe mu Rwanda igatangirwa hano mu Gihugu, kandi ari ho yanaturagiwe.”

Yakomeje ashimangira ko bibasaba kongera umusaruro kugira ngo isoko ry’u Rwanda rirusheho kubona imishwi yo korora irimo iy’inkoko z’Inyama n’izitera amagi, ari na ko amagi akwizwa ku Banyarwanda bose muri gahunda yo guhangana n’imirire mibi ndetse n’igwingira rikiri kuri 33% by’abana bari munsi y’imyaka itanu.

Yavuze ko hejuru ya 75% by’ibicuruzwa byabo bikwizwa mu gihugu imbere, hanyuma hagari ya 20 na 25% bikaba ari byo byoherezwa mu mahanga. Ati: “Dufite intego y’uko intumbero twihaye yo guhangana n’imirire mibi igerwaho ariko no hanze tukazana n’ayo madovize ari na ko turinda ay’u Rwanda yajyanwaga mu mahanga agiye kugura inkoko, amagi n’ibiryo by’amatungo.”

Uzima Chicken ni kimwe mu bigo birindwi bifite amaturagiro y’imishwi, ariko ni yo yihariye isoo rinini. Minisiteri y’Ubuhinzi y‘Ubworozi (MINAGRI) itangaza ko imishwi ituragwa mu Rwanda ikiri mike cyane ugereranyije n’ikenewe.

Urundi ruganda rwatangiye kohereza imishwi mu mahanga ni Easy Hatch rukorera mu Karere ka Musanze. Na rwo rufite ubushobozi bwo guturaga imishwi 80,000 ku kwezi, ni ukuvuga 20,000 mu cyumweru.

Ellen Josiane Uwizera, Umuyobozi ushinzwe ubucuruzi muri Easy Hatch, yagize ati: “Easy Hatch ni ikigo kinini gifite ubushobozi bwo gutanga imishwi ibihumbi 20 ndetse n’ingano y’amagi umuntu wese yaba akeneye turayimuha nta kibazo.”

Yakomeje agira ati: “Twibanda mu Rwanda ariko n’ibihugu byo hanze na byo tujya tubijyanamo imishwi. Ubungubu tujyana muri Repubulika Iharanira Demokarasi ya Congo na Repubulika ya Santarafurika.”

Uburyo bwo gutwara imishwi mu mahanga buracyari ingorabahizi

Ibigo bituraga imishwi bikayohereza mu mahanga birasaba Leta y’u Rwanda gukemura ikibazo bizitira ku masoko, cyo kubura indege zitwara imishwi n’ibiryo n’ibiryo by’amatungo mu bihugu birimo abashoramari bayikeneye.

Uwineza yakomeje agira ati: “Kubona uburyo bwo gutwara imishwi yo kujya hanze ntabwo byoroshye kuko ushobora no gusanga wenda nk’indege igerayo nta yo ihaba cyangwa idashobora gutwara ingano yifuzwa, urumva ni imbogamizi biba byamaze kwica isoko.”

Dr. Sikubwabo wa Uzima Chicken na we yagize ati: “ Dufite ibicuruzwa n’abakiliya, ariko dushobora kuba dufite umukiliya ushaka imishwi 20,000 twakwegera RwandAir bakatubwira bati uwo mwanya ntabwo tuwufite, dufite uwatwara nibura imishwi 5,000. Ubwo rero ugasanga aho hantu harimo haradusubiza inyuma. Kuva umwaka utangiye tumaze kohereza mu mahanga imishwi 498,000 ariko byakagombye kuba byikubye inshuro zisaga ebyiri.”

Yakomeje avuga ko kubera ikibazo cy’uko nta ndege yihariye itwara imizigo ishobora gutwara imishwi yatumijwe n’abakeneye kuyororera hanze y’u Rwanda, bibagusha mu bihombo bikomeye kandi ari amahirwe mashya Igihugu cyaba kibonye yo kwagurira isoko mu mahanga.

Mu bihe byashize ngo hari n’abakiliya bo muri Ghana na Santarafurika basubijwe amafaranga yabo kubera ko imishwi batumije itigeze ibonerwa uburyo bwo kuyitwara kandi ihari.

Icyo kibazo bakimenyesheje MINAGRI, Ikigo cy’Igihugu gishinzwe iyoherezwa mu mahanga ry’umusaruro w’ubuhinzi n’ubworozi (NAEB) n’Urwego rw’Igihugu rw’Iterambere (RDB), bizezwa ko bitarenze uyu mwaka icyo kibazo kizaba cyakemutse kuko hazaba habonetse indege zitwara imizigo gusa (Cargo) ku buryo abatanga komande y’imishwi, amagi n’ibiryo by’amatungo babona ingano bifuza uko bayitumije.

Dr. Theoneste Sikubwabo, avuga ko Uzima Chicken yagura amasoko yayo hanze y’u Rwanda, izirikana guhaza Abanyarwanda ku magi cyangwa inyama z’inkoko
Abanyarwanda batandukanye bishimira korora imishwi yaturagiwe mu Rwanda
Ellen Josiane Uwizera na we, ahamya ko Easy Hatch ikomeje kwagurira amasoko yayo mu mahanga nubwo hakiri imbogamizi mu gutwara imishwi
  • NTAWITONDA JEAN CLAUDE
  • Ukwakira 6, 2022
  • Hashize imyaka 2
TANGA IGITEKEREZO
FLORIBERT says:
Ukwakira 10, 2022 at 1:56 pm

N’ ishema kugihugu cyacu u Rwanda. NAEB ifatanyije na (RDB) bafashwe ibi bigo kubona uburyo byageza umusaro wabyo mumahanga maze u Rwanda rube ku isonga. Ikindi bamwe muborozi bashidikanya k’ ubuziranenge bagitumiza imishwi mumahanga bayisize aha iwacu nibamenye ko ibi bigo imishwi bitanga ariyo kwizerwa.

Andika igitekerezo

AMATEGEKO AGENGA IYANDIKA RY'IGITEKEREZO CYAWE