Imiryango y’ingagi zo mu Rwanda yafunguriwe konti kuri Instagram

  • NTAWITONDA JEAN CLAUDE
  • Nzeri 27, 2022
  • Hashize imyaka 2
Image

 Urwego rushinzwe Iterambere (RDB) rubinyujije muri gahunda ya Visit Rwanda, rwatangije uburyo bushya bwo kwifashisha ikoranabuhanga mu kubungabunga no kurinda ingagi zo mu misozi bikanajyana no kurushaho guteza imbere no kumenyekanisha ubukerarugendo bw’u Rwanda. 

Ubwo buryo burimo kuba ingagi zo muri Pariki y’Igihugu y’Ibirunga ziri mu nyamaswa za mbere ku Isi zigiye gutunga konti zikora mu buryo buhoraho ku mbuga zirimo Instagram, Facebook n’izindi. 

Iyo gahunda yiswe Gorilla Gram, yitezweho gufasha abasura Pariki y’Igihugu y’Ibirunga n’u Rwanda muri rusange kutazisura gusa ahubwo bazajya bakomeza gukurikirana amakuru yazo kuri Instagram na Facebook. Ibyo bizajya bikorwa binyuze mu mafoto n’inkuru zanditse cyangwa z’amashusho zizajya zitangazwa kuri izo mbuga nkoranyambaga. 

U Rwanda rucumbikiye hejuru ya kimwe cya gatatu cy’ingagi zo mu misozi ku Isi, kandi imbaraga zishyirwa mu kubungabunga ubuzima bwazo zikomeje gutanga umusaruro ukomeye ku Gihugu, by’umwihariko ku baturiye Pariki. 

Mu myaka 12 ishize, ingagi zageze ku 1,063 zivuye kuri 480 zabarirwaga mu mwaka wa 2010. 

Binyuze muri gahunda zigamije gufasha izo nyamaswa kurushaho kororoka no kugira ubuzima buzira umuze, ingagi zo mu Rwanda zibaye inyamaswa za mbere z’ishyamba zigize imiryango ifite konti ku mbuga nkoranyambaga zikora neza zizagira uruhare mu koroshya ubushakashatsi, imicungire n’imigenzurire y’imibereho yazo. 

Binyuze mu mafoto n’amashusho bizajya bitangazwa kuri Instagram, abasura Pariki y’Igihugu y’Ibirunga bashobora gushakisha no kubona amakuru arambuye ku miryango bagiye gukoreramo uruzinduko. 

Bazajya bakoresha na “tags” zorohereza bagenzi babo b’abashakashatsi, abacunga umutekano wa Pariki n’abakurikirana ubuzima bw’ingagi kumenya gutandukanya imiryango binyuze mu mafoto n’amashusho azajya abikwa ku ikoranabuhanga mu buryo bugezweho. 

 Michaella Rugwizangoga, Umuyobozi w’Ishami ry’Ubukerarugendo muri RDB, yasobanuye byinshi kuri iyo gahunda ubwo hizihizwaga Umunsi Mpuzamahanga wahariwe Ubukerarugendo wateguwe ku bufatanye na MasterCard Foundation. 

Yagize ati: “Tunejejwe no gutangiza Gorilla Gram uyu munsi, ni agashya kagezweho mu rwego rw’ubukerarugendo no kubungabunga ibidukikije muri iki gihe rukomeje kwiyubaka ku Isi yose.”

 Yakomeje agira ati: “Binyuze muri  Gorilla Gram, turimo gufasha abakeraruhendo bakoresha ikoranabuhanga kuba bamwe mu bashyigikira gahunda yacu y’ubushakashatsi bushingiye ku baturage ku birebana n’ingagi, aho bazajya bakoresha urubuga rwa Instagram basangiza abandi inkuru zifasha mu bikorwa byacu bya buri munsi byi gukurikirana ubuzima n’imibereho y’ingagi kuri ubu ziri mu zugarijwe no gucika ku Isi.”

Yakomeje avuga ko ubu buri mushyitsi afite amahirwe yo gutanga umusanzu we muguharanira ko izo nyamaswa zikomeza kurindwa kandi zigakomeza kurumbukira muri Parki y’Igihugu y’Ibirunga na yo iri mu nzira zo kwagurwa. 

  • NTAWITONDA JEAN CLAUDE
  • Nzeri 27, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE