Imiryango ibihumbi 340 yatangiye gufashwa kwikurwa mu bukene

  • ZIGAMA THEONESTE
  • Mutarama 6, 2024
  • Hashize amezi 5
Image

Minisiteri y’Ubutegetsi bw’Igihugu (MINALOC) yatangaje ko mu miryango miliyoni 1 n’ibihumbi 800 yo hirya no hino mu gihugu, ikeneye ubufasha bwo kugira ngo ikurwe mu bukene,muri yo igera ku bihumbi 340 ari yo yatangiye gufashwa.

Iyo Minisiteri ivuga ko mu gufasha iyi miryango hakoreshwa uburyo bwo kubahindurira imyumvire yo kumva ko ubukene atari karande ko bazafashwa bakageza igihe bagacuka.

Minisitiri w’Ubutegetsi bw’Igihugu Musabyimana Jean Claude, yavuze ko mu gufasha baganira n’imiryango uko bakwikura mu bukene.

Yagize ati: “Aho tuvugana n’ingo tuti uri mu bukene yego! Urubyemera ko uburimo ariko wemera nanone ko ubukene atari karande, ko bukira,twumvikana ngo ariko ni gute twafatanya kugira ngo tubutere ishoti? Twamara kuvugana tugahana gahunda yo kuvuga ngo noneho wowe urakora ibi natwe turagufasha ibi n’ibi”.

Imibare ya MINALOC igaragaza ko ubu hari imiryango ibihumbi 340 irimo gufashwa kwikura mu bukene ndetse ko buri Karere gafite imihigo n’imibare y’abaturage kagoma kwitaho.

Iyo Minisiteri ivuga ko uko uburyo bwo gufasha buboneka imibare y’abahabwa ubufasha bwo kwikura mu bukene bagenda biyongera.

Kuri ubu, habaruwe ingo zigera kuri miliyoni 1 n’ibihumbi 800 zikeneye gufashwa gukurwa mu bukene kandi byitezwe ko ingo zose zikenewe zizagerwaho bigendanye n’ubushobozi buhari.

MINALOC ivuga ko muri uku guherekezwa mu kwikura mu bukene,buri rugo rusinya amasezerano y’imyaka ibiri rukaba rushobora kuba rwafasha abandi cyangwa se rushobora gucuka.

Icyakora MINALOC igaragaza ko umuturage adashoboye kwikura mu bukene muri iyo myaka ibiri bakomeza kumusindagiza kugira ngo na we yikure mu bukene nk’abandi.

Minisitiri Musabyimana agaragaza ko hari bamwe mu bakene bariho bishingiye ku myumvire yabo.

Ati: “Icya mbere ni imyumvire iganisha ku myitwarire […] hari umuntu usanga afite imyumvire atanibaza impamvu afite ubukene, akumva ko ari ko bimeze, akabyakira.

Ni yo mpamvu muri iyi gahunda ikintu cya mbere duheraho ni ukuganira n’abantu, tukumva imyumvire yabo ku bukene, imeze ite? Ese ni gute yahinduka noneho tukareba ni gute twahindura imyitwarire iganisha ku bukene?
Yakomeje agira ati: “Iyo uri mu bukene ukumva ko nta kintu bikubwiye, ukorera amafaranga ukumva ko ntacyo wayamaza uretse wenda kuyanywera, ugasanga umuntu akorera amafaranga nta kindi ayamaza uretse gusinda no guteza umutekano muke.

Ni byo hari imyitwarire ufite iganisha kuba warabaye umusinzi, uwo iyo aramutse yemeye guhindura n’imyitwarire yari afite, byanze bikunze atera imbere”.

  • ZIGAMA THEONESTE
  • Mutarama 6, 2024
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE