Imirimo ikorerwa muri Gare nshya ya Rwamagana yabahinduriye ubuzima

  • NSHIMIYIMANA FAUSTIN
  • Ugushyingo 23, 2023
  • Hashize amezi 3
Image

Bamwe mu bakora imirimo yiganjemo koza imodoka, ubukarasi n’abakora muri resitoramuri Gare y’akarere ka Rwamagana, bavuga ko imibereho yabo yatangiye guhinduka aho batangiriye gukoreramo ibikorwa bibyara inyungu.

Muri Gare ya Rwamagana, bamwe mu bakora umurimo wo koza imodoka bavuga kuva aho yuzuriye mu mwaka wa 2022 byabafashije kubona aho bakorera bisanzuye, nubwo imiromo bakora hari abakiyifata nk’iciriritse kandi ibatunze n’imiryango yabo ikanabafasha kugera kuri byinshi.

Bihibindi Alexandre yagize ati: “Ibinamaba dukoreramo bifite ibikoresho bigezweho kandi n’inyubako dukoreramo ziradufasha kuko mu bihe by’imvura turakora cyangwa mu zuba. Bituma tubona inyungu kuko nkanjye ikinamba cyamfashije kubona uruhushya rwa burundu rwo gutwara imodoka (Permit) kandi bitunze n’umuryango wanjye. Ikinamba kiri ahantu hahurira abantu benshi kandi dushimira Leta ihora ishyira umuturage ku isonga.”

Nsengimana Theoneste na we woza imodoka, yagize ati: “Akazi nkora kantungiye umuryango kuko amafaranga nkura aha niyo dukoresha duhaha ndetse bikamfasha no kubona amafaranga y’ishuri kandi icyo umwana akeneye ku ishuri harimo imyambaro n’ibikoresho ndakibona. Nakoreraga mu bindi binamba biri inyuma ya gare ariko aha hari ibikoresho byiza kandi bigezweho bitworohereza gukora akazi kandi tukabona amafaranga aruta ayo twabonaga.”

Mukamanzi Elizabeth ukora umurimo wo guteka muri imwe muri resitora iri muri Gare, yavuze ko mu mezi atandatu ahamaze bimufasha kubona amafaranga yo kwishyura ishuri no gufasha umuryango we.

Muri Gare nshya ya Rwamagana harangwa ibikorwa bitandukanye

Yagize ati: “Inyungu nkura mu kazi nkora zituma mbona amafaranga yo kurihira abana banjye minerivali, ubwishingizi bwo kwivuza, amafaranga yo kwishyura inzu mbanamo n’umuryango wanjye kandi nkabona uko mbahahira. Kuba izi nyubako zihari biradufasha cyane kuko abakiriya b’ingeri zitandukanye baratugana, abagenzi baza muri gare aba ari benshi kandi by’umwihariko n’abaturuka mu bitaro baratugana ndetse n’abakorera mu biro baratugana.”

Umuyobozi w’Akarere ka Rwamagana Mbonyumuvunyi Radjab, yavuze ko abakora imirimo muri gare bafasha Akarere kuko baba biteza imbere n’imiryango yabo kandi bikagira n’inyungu ku gihugu.

Yagize ati: “Ibikorwa remezo byose bigira icyo bimarira abaturage kuba hari aho abaturage bategera imodoka bakabona n’izindi serivisi zaba izirimo ibyo bashobora kugura, serivisi z’Irembo, izo kubitsa no kubikura n’ibindi byose babonera hamwe muri gare mu gihe bategereje imodoka umwanya muto, hari icyo bibamarira. Kandi natwe nk’Akarere bidufasha mu bikorwa byinshi kuko abatanga n’abashaka izo serivisi batanga imisoro bityo igihugu kikahungukira. Imisoro ni yo yubaka ibindi bikorwa remezo birimo amashuri, amavuriro, imihanda n’ibindi nk’amazi n’amashanyarazi abaturage bakenera buri munsi. Bivuze ko batanga imisoro ikazabagarukira muri ubwo buryo.”

Ibice bibiri bya Gare ya Rwamagana byuzuye mu mwaka wa 2019, aho byari bigizwe n’aho imodoka zirenga 40 ziparika, imiryango 20 y’ubucuruzi, aho bakatira amatike ndetse n’aho abagenzi bategerereza imodokabyuzuye bitwaye miliyoni zisaga 670 z’amafaranga y’u Rwanda.

Ni mu gihe igice cya gatatu kigizwe n’ikinamba n’inzu z’ubucuruzi ziganjemo abakora za resitora byuzuye mu mwaka wa 2022.

NSHIMIYIMANA FAUSTIN

  • NSHIMIYIMANA FAUSTIN
  • Ugushyingo 23, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE