Imipaka yo ku butaka yakomorewe, gukora amasaha 24 ku yandi byagarutse…

  • Imvaho Nshya
  • Werurwe 5, 2022
  • Hashize imyaka 2
Image

Inama y’Abaminisitiri yateranye ku itariki ya 4 Werurwe 2022 yashyizeho ingamba nshya zigomba gukurikizwa mu guhangana n’icyorezo cya COVID-19 ndetse amasaha y’ingendo yongera kugezwa kuri 24 kuri 24 ibintu byari bimaze imyaka hafi 2.

Mu myanzuro y’Inama y’Abaminisitiri yateranye ku wa Gatanu tariki ya 4 Werurwe yafatiwemo ibyemezo bitandukanye birimo ko ibikorwa byinshi bizakomeza gukora amasaha 24 ku yandi mu gihe byari bimaze iminsi bifungwa saa sita z’ijoro.

Mu gihe habura iminsi icyenda gusa ngo imyaka ibiri yuzure habonetse umurwayi wa mbere wa COVID-19 mu Rwanda ibintu birasa n’ibitangiye gusubira mu buryo kuko imikorere yongeye kuba nkuko byari bimeze mbere yaho.

Nubwo bimeze bityo ariko hari ibikorwa bitemerewe gukora amasaha yose birimo nk’ibirebana n’ibitaramo by’umuziki, kubyina, konseri, utubari, ibirori byo kwiyakira n’imikino y’amahirwe byo bizajya bifungwa Saa munani z’ijoro.

Kugeza ubu kandi imodoka zitwara abagenzi mu buryo bwa rusange zakomoreweho kuko zongerewe umubare w’abantu zatwaraga kuko zemerewe gutwara abantu bangana n’ubushobozi bwazo bicaye, ndetse na 75% ku bahagaze.

Ibikorwa birimo ibibera mu nsengero, utubari, restaurant, gym, stade zakira imikino yose, pisine n’inyubako za massage byemerewe gukora kandi bikakira abantu bangana n’ubushobozi bw’aho bibera nubwo ababyitabira bagomba kuba barikingije mu buryo bwuzuye.

Kuri iyi nshuro ariko abana bato bafite nibura guhera ku myaka 12 kumanura bo ntibasabwa kwerekana icyangombwa cy’uko bakingiwe.

Kwikingiza mu buryo bwuzuye byabaye itegeko

Inama y’abaminisitiri yafashe icyemezo ko abitabirira ibikorwa by’ikiriyo bagomba kuba barakingiwe mu buryo bwuzuye kimwe n’abitabira inama n’andi makoraniro hakiyongeraho kwerekana icyemezo cy’uko bapimwe COVID-19 mu masaha atarenze 48.

Abamotari n’abanyonzi bategetswe kuba barakingiwe COVID-19 mu buryo bwuzuye, utabikoze agahanwa kugira ngo akazi ke gakomeze mu mutuzo.

Ibikorwa by’abikorera ndetse n’inzego za Leta byemerewe kwakira abakozi bangana n’ubushobozi bw’aho bakorera ndetse Minisiteri y’Ubuzima yahawe uburenganzira bwo gufunga inyubako yaba iy’abikorera na Leta, mu gihe cyose igaragayemo umubare munini w’abarwaye COVID-19.

Ibikorwa by’ubukerarugendo bizakomeza hubahirizwa amabwiriza yo kwirinda ikwirakwira rya Covid-19. Ibikorwa birimo hoteli, abayobora n’abatwara ba mukerarugendo bose bemerewe gusubukura ibikorwa byabo.

Uretse ibyemezo birebana ahanini n’ingamba zo kwirinda COVID-19 byatangiye no gukurikizwa kuri uyu wa Gatandatu ariko hafashwe n’icyemezo cyari gitegerejwe n’abenshi cyo gufungura imipaka y’u Rwanda yo ku butaka, bizatangira kubahirizwa ku itariki 7 Werurwe.

Abagenzi binjira ku mipaka yo ku butaka bashobora kuzajya basuzumwa Covid-19 mu gihe bibaye ngombwa mbere yo kwinjira mu Gihugu.

Imipaka y’u Rwanda yo kubutaka yari imaze igihe ifunze yitezweho kuzamura ubuhahirane hagati y’ibihugu by’ibituranyi birimo Uganda, u Burundi ari nayo itegerejwe na Benshi kureba koko niba ku wa Mbere tariki 7 Werurwe 2022 abagenzi bazatangira kwambuka bava cyangwa berekeza muri ibyo bihugu.

Ibi bishobora kuba igisubizo no ku birebana n’ubucuruzi bwambukiranya imipaka cyane ko ku ruhande rw’u Rwanda ibiciro by’ibiribwa ku isoko byazamutse cyane mu buryo buteje impungenge bitewe n’iryo tumbagira rya hato na hato.

Umupaka w’u Rwanda na Uganda wa Gatuna, wafunzwe ku mpamvu zishingiye ku bibazo ibihugu byombi byagiranye birimo no kuba abanyarwanda barafatwaga nabi muri icyo gihugu bashinjwa kuba intasi gusa umubano w’ibi bihugu uri kuzahuka nyuma y’ibiganiro byahuje impande zombi mu bihe binyuranye.

Abagenzi binjira n’abasohoka mu Rwanda banyuze ku Kibuga Mpuzamahanga cya Kigali bagomba kuba bafite icyemezo cy’uko bipimishije COVID-19 (PCR test) mu gihe cy’amasaha 72 mbere y’uko bahaguruka. Abanyarwanda bose bava mu Gihugu bagomba kuba barikingije COVID-19.

Abaturage bashishikarijwe gukomeza kwitabira ibikorwa byo kwikingiza ndetse no gukomeza kubahiriza amabwiriza yo kwirinda ikwirakwira rya COVID-19.

Kugeza ubu u Rwanda rumaze gukingira 60% by’abaturage barwo mu buryo bwuzuye. Urebye kuri raporo Ngarukamunsi ya MINISANTE igaragaza uko abantu bari kwandura COVID-19 n’amakuru ayerekeyeho ubona ko ari indwara isa n’igenda igabanyuka mu buryo bukomeye cyane ko mu minsi irindwi ishinze habonetse abarwayi bashya 65 barimo barindwi gusa bari mu bitaro n’umwe uheruka kwicwa nayo.

  • Imvaho Nshya
  • Werurwe 5, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE