Imbamutima z’abivurizaga amaso i Kabgayi begerejwe serivisi i Kigeme

  • Imvaho Nshya
  • Ukwakira 1, 2023
  • Hashize amezi 8
Image

Bamwe mu bari barwaye indwara y’amaso yitwa “Ishaza” ,mu Mirenge itandukanye y’Akarere ka Nyamagabe, barashimira Ibitaro bya Kabgayi bivura amaso byongeye kubasubiza ubuzima bwo kureba nyuma yo kumara igihe kirekire ku kirago kubera ko bitaboroheraga gutega berekeza mu Karere ka Muhanga.

Ibitaro bya Kabgayi bivura amaso byegereje abo baturage serivisi ku bufatanye n’Ibitaro bya Kigeme bikorera mu Murenge wa Gasaka mu Karere ka Nyamagabe.

Urayeneza Annonciata w’imyaka 65, avuga ko bari baramusuzumye indwara y’Ishaza yemeje ko amaze iminsi myinshi atabonaga bikamugora kwitorera ibishyimbo agiye kubitera cyangwa agiye kubiteka none yabazwe amaso abiri none bamupfukuye atangira kubona.

Yagize ati: “Ma;ze igihe baransuzumye ko ndwaye indwara y’Ishaza itanatumaga mbasha kureba ariko nyuma yo kubagwa ijisho rya mbere ndimo kubona ndetse nashobora no gutora ibishyimbo kuko ndimo kubona bivuze ko ntacyo ntakora kandi ntacyo nashoboraga kubona”.

Yongeraho ko iyi serivisi basangaga i Kabgayi bakwiye kuyegerezwa bakayiherwa ku Bitaro bya Kigeme ndetse no ku Kitabi ntibakomeze kuryama mu rugo kuko kujya i Kabgayi bisaba amafaranga menshi.

Yagize ati: “Rwose turishimye cyane kuko ibitaro bya Kabgayi byaje kuduhera serivisi iwacu ku Kigeme ariko nkanjye mva ku Kitabi, dukwiriye guhabwa izi serivisi kuko twajyaga kuzaka kure i Kabgayi bikadusaba amafaranga menshi kandi hari n’abandi bataragerwaho bagifite ubushobozi buke batabasha kugera i Kabgayi cyangwa i Butare”.

Munyandinda Martin avuga ko akomoka mu Murenge wa Tare, mu Kagali ka Kaganza mu Mudugudu wa Bivumu; avuga ko amaze imyaka 2 atabasha kubona ariko ijisho rya mbere ryabazwe rirareba neza.

Avuga ko mbere yo kubagwa atabashaga kugira icyo yikorera ku buryo umugore ari we wahingaga  we ntabe yabasha no gucyura itungo ryaziritswe.

Yagize ati: “Maze  imyaka igera kuri 2 ntabasha kureba ariko nyuma yo kubagwa ndareba neza rwose kuko mbere yuko mbagwa nagendaga nkoresheje agakoni nkicara ahantu hamwe ndetse ugasanga uwaza mu rugo ntamubona agatwara icyo ashaka. Nambaraga imyenda simenye niba yanduye cyangwa itanduye kuko sinabibonaga ugasanga ndetse ahaziritswe itungo ntapfa kuhabona ariko ndimo ndabona neza cyane mbese ngarutse ibumuntu”.

Umuyobozi w’Ibikorwa by’Ubuvuzi mu Bitaro bya Kigeme, Dr Jerome Mfitumukiza avuga ko ku bufatanye n’Ibitaro bya Kabgayi bivura amaso bavura abaturage bagera ku 100 bari bararwaye Ishaza kandi iki gikorwa cyagenze neza kinaje gikurikira ikindi cyabaye mu mezi 4 ashize aho hari havuwe abagera ku 120.

Akomeza avuga ko ubusanzwe abajyaga bashaka serivisi z’ubuvuzi bajyaga kwivuza i Kabgayi cyangwa ku bitaro bya Kaminuza i Butare, bityo rero barafashijwe kuko bakoraga ingendo ndende kandi rimwe na rimwe zikenera ubushobozi bwinshi bamwe batagiraga.

Muri ibyo bikorwa kandi Ibyo bitaro byanakoranye na RSSB ifasha kwishyura serivisi abarwayi bahabwa kandi ngo birashimishije cyane.

Ati: “Ni byo hari benshi bafite ibibazo bikwiye gukemurwa ariko abarwayi bakwiye kujya baza kwa muganga uburwayi bukiri ku kigero cyo hasi kuko hari igihe baza bakererewe ugasanga ubuvuzi bahawe buje amazi yararenze inkombe bakwiye kujya baza hakiri kare.”

Inzego z’ubuzima zikunze kwibutsa abarwayi ko bakwiye kujya bagana amavuriro hakiri kare ariko usanga batarabasha kubyumva bamwe bakavuga ko bahugira mu miriro yabo ya buri munsi.

AKIMANA JEAN DE DIEU

  • Imvaho Nshya
  • Ukwakira 1, 2023
  • Hashize amezi 8
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE