Imbamutima za Munyaneza Francine, umwe mu Ntwari 10 z’Afurika mu Bucuruzi

  • NTAWITONDA JEAN CLAUDE
  • Ukwakira 5, 2022
  • Hashize imyaka 2
Image

Mu mpera z’icyumweru gishize, ni bwo hatangajwe ba rwiyemezamirimo 10 batoranyijwe mu basaga 21,000 bahatanye baturutse mu bihugu 54 by’Afurika, aho abo bageze mu cya kabiri bakaba bagomba gusaranganya igihembo cya miliyoni 1.5 (amafaranga y’u Rwanda asaga miliyari 1.5).

Ayo marushanwa ngarukamwaka y’ibigo byahize ibindi mu gushakira abatuye Afurika imibereho myiza yiswe Africa’ Business Heroes (ABH), ni gahunda yateguwe ikanaterwa inkunga n’Umuryango Jack Ma Foundation ndetse na Alibaba Philantrhopy, by’umuherwe w’Umushinwa Jack Ma.

Biteganyijwe ko uzahiga abandi mu cyiciro cya nyuma azatwara amadolari y’Amerika ibihumbi 300, ni ukuvuga amafaranga y’u Rwanda asaga miliyoni 312, we n’abandi bakazifashisha ayo babonye mu kurushaho kwagura ubucuruzi bwe no kurushaho gusakaza ibicuruzwa bye.

Munyaneza Francine ni we Munyarwanda wenyine waje mu batoranyijwe mu majonjora ya kimwe cya kabiri yatangajwe ku ya 30 Nzeri 2022, mu muhango witabiriwe n’abasaga 100 wabereye muri Kigali Convention Center.

Yashinze ikigo cy’ubucuruzi Munyax Eco gitanga serivisi zigezweho mu rwego rw’ingufu kuva mu mwaka wa 2013, none ubu kimaze kuba ubukombe kubera ibicuruzwa byacyo bizigama ingufu kandi bitangiza ibidukikije akwirakwiza ku isoko ry’u Rwanda no ku mugabane w’Afurika.

Ibyo bikoresho birimo ibishyushya amazi bikoresheje ingufu zitangwa n’imirasire y’izuba (Water Heaters), ibikoresho bitanga ingufu z’amashanyarazi akomoka ku mirasire y’izuba (solar modules), amatara arondereze ingufu z’amashanyarazi, amatara ashyirwa ku mihanda akoresha imirasire y’izuba, byose bifasha mu guhuza ubucuruzi bwunguka no kurengera ibidukikije.

Munyaneza yagaragaje imbamutima nyuma yo gutoranywa, ashimira gahunda ya Africa’s Business Hero (ABH) itegura ayo marushanwa, by’umwihariko n’abakozi ba Munyax Eco bagaragaje itandukaniro mu myaka 11 iki kigo kimaze gishinzwe.

Yagize ati: “Ntewe ishema no guhagararira urugero rwiza rw’ikoreshwa ry’ingufu zitangiza ibidukikije, no kwimakaza iterambere ry’umugore mu Rwanda. Ndashimira kandi Ikigo Get Invest, Umuryango Opes Lcef, Signify Foundation na U.S. African Development Foundation (USADF) biduhora hafi.”

Abo bari kumwe kuri uru rutonde, harimo Flavien Kouatcha Simo wo muri Cameroon akaba ayoboye Ikigo Save Our Agriculture Sarl, Amena Elsaie ukomoka mu Misiri akaba yarashinze Ikigo Helm Consulting, Nadia Gamal El Din wo mu Misiri washinze akaba n’Umuyobozi Mukuru wa Rahet Bally, Amadou Daffe wo muri Ethiopia uyobora akaba n’umwe mu bashinze Gebeya Inc. na Prince Agbata wo muri Ghana uyobora akaba ari mu bashinze Coliba Waste Management Services Limited.

Abandi ni Mr. Tesh Mbaabu, wo muri Kenya washinze akaba n’Umuyobozi wa Marketforce Technologies, Shona Mcdonald washinze akaba n’Umuyobozi Mukuru wa Shonaquip Social Enterprise muri Afurika y’Epfo, Elmarie Pereira umwe mu bashinze akaba n’Umuyobozi w’Agateganyo wa  Memeza Shout (PTY) Ltd muri Afurika y’Epfo, ndetse na Elia Timotheo washinze akaba n’Umuyobozi wa East Africa Fruits Co. muri Tanzania.

Abageze ku cyiciro cya nyuma cy’amarushanwa bitezweho kubera urugero rwiza abandi ba rwiyemezamirimo bato muri Afurika

Ubucuruzi bwabo bwibanda ku nzego zitandukanye zirimo ubuhinzi, ubujyanama mu bucuruzi, ingufu, kubungabunga ibidukikije, ubuvuzi, Ikoranabuhanga mu itangazamakuru n’isakazabumenyi (ICT) ndetse n’ubucuruzi bwo kudandaza.

Abo ba rwiyemezamirimo bahize abandi bahuje ikintu kimwe cyo kwiyemeza guharanira impinduka nziza mu miryango baturukamo, harimo gushyigikira ibyiciro byasigaye inyuma, kwagura ubucuruzi bwifashisha ikoranabuhanga muri Afurika ndetse no kwifashisha iryo koranabuhanga mu kunoza ubuhinzi buto n’ubuciriritse.

Jason Pau, Umuyobozi Nshingwabikorwa wa Gahunda Mpuzamahanga mu Muryango Jack Ma Foundation, yagize ati: “ABH iracyashikamye ku gushyira imbaraga mu gutahura, gushyigikira no kumurikira ba rwiyemezamirimo barimo kugaragaza impinduka nziza mu miryango bakomokamo. Muri uyu mwaka w’amarushanwa ya ABH, twashimishijwe n’uko abitabiriye biyongereye mu nzego zitandukanye n’impinduka bagaragaza mu gushyigikira ubukungu burimo kwiyubaka nyuma y’icyorezo.”

Yakomeje ahamya ko abageze muri kimwe cya kabiri bazabera urugero rwiza ba rwiyemezamirimo bagenzi babo ku Mugabane w’Afurika. Ati: “Bose turabifuriza amahirwe masa mu marushanwa ya nyuma azaba mu Gushyingo.

Birame Sock, Washinze akaba n’Umuyobozi w’Ikigo Kwely Inc, ni umwe mu bakemurampaka bakoze amajonjora yatoranyije 10 bahize abandi.

Yagize ati: “kwihangira umurimo ni umusingi ukomeye w’iterambere ry’ubukungu n’iry’abaturage muri Afurika. Amarushanwa ya ABH atanga urubuga ku bucuruzi bukirimo kwiyubaka, yo kugaragaza ibisubizo bahatanira gutanga mu gukemura ibibazo Bihari mu nzira zitanga umusaruro, zigezweho, ziramba kandi zongera agaciro.”

Ubwo hatangazwaga abo 10 bageze mu cyiciro cya nyuma cy’amarushanwa, ABH yanatangaje itsinda riyihagarariye i Kigali mu Rwanda mu rwego rwo kurushaho kunoza imikoranire yayo na ba rwiyemezamirimo basaga 100,000 b’abanyamuryango ku mugabane w’Afurika.

Umuyobozi ushinzwe ubufatanye n’imishinga mu marushanwa ya ABH says Zahra Baitie-Boateng, na we yongeyeho ati: “ABH yinjiye mu marushanwa yayo ya kane, twanyuzwe n’uburyo ushyigikiwe na ba rwiyemezamirimo b’Abanyafurika ndetse n’abafatanyabikorwa b’ingenzi batuma umuryango wa ABH ugeze kuri iyi ntambwe.”

Yakomeje agira ati: “Kuri ubu kuba tugize icyicaro i Kigali, Umujyi ukomeje kugaragaza ubuzima no guhanga udushya, turi hafi cyane ya ba rwiyemezamirimo b’Abanyafurika dukorera kandi ubu turi mu mwanya mwiza wo kurushaho kubaka umuryango w’ubucuruzi ukorana neza habyazwa umusaruro ubunararibonye no kuba dufite abafatanyabikorwa mpuzamahanga by’umwihariko twishimiye kuba icyicaro gikuru cyacu kibarizwa mu Nyubako ya Norrsken, ahabarizwa uruhererekane rwa ba rwiyemezamirimo, abategura imishinga, abayitangiza n’abayitera inkunga.”

Amarushanwa ya ABH agamije kugaragaza, gushyigikira no gutera inkunga abafite impano zo guhanga imirimo n’udushya dutandukanye ku mugabane w’Afurika. Intero y’ayo marushanwa iragira iti: “Ni igihe cy’Afurika”, ikaba itera imbaraga ba rwoyemezamirimo bakomeje kurebera Afurika mu yindi ndorerwamo igamije kubaka ibyiza kandi biramba, n’ubucuruzi butagira n’umwe buheza mu gihe kizaza.

Biteganyijwe ko mu myaka 10 ABH izaba imaze guhemba ba rwiyemezamirimo b’Abanyafurika 100, ibyo bikaba byiyongera ku mahugurwa, n’inkunga z’uburyo butandukanye iyo gahunda itanga mu kurushaho kubaka uruhererekane rw’ubucuruzi no guhanga udushya dukemura ibibazo byugarije Afurika.

Munyax Eco imaze gutanga imashini zishyushya amazi zikoresheje imirasire y’izuba zikabakaba 1000
  • NTAWITONDA JEAN CLAUDE
  • Ukwakira 5, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE