Ikigega Nzahurabukungu cy’u Rwanda kigiye kongerwamo miliyari 150frw

  • NTAWITONDA JEAN CLAUDE
  • Werurwe 17, 2022
  • Hashize imyaka 2
Image

Guverinoma y’u Rwanda yatangaje ko mu Kigega Nzahurabukungu  (Economic Recovery Fund) cyashyizweho mu kuzahura  ubukungu bwashegeshwe na Covid-19, igiye kongeramo miliyari 150 z’amafaranga y’u Rwanda kandi imikorere yacyo igakomeza kuvugururwa kuko byagaragaye ko cyagize akamaro gakomeye.

Iki kigega ni kimwe mu ngamba Leta y’u Rwanda yafashe mu guhangana n’ingaruka z’iki cyorezo haba mu mibereho y’abaturage, mu buzima ndetse n’ubukungu. Cyashyizweho kugira ngo gitabare inzego z’ubukungu z’abikorera zagizweho ingaruka n’icyorezo ku buryo bw’umwihariko.

Mu kiganiro n’abanyamakuru cyo ku wa 16 Werurwe 2022, Minisitiri w’Intebe Dr. Ngirente Edouard, yasobanuye ko iki kigega kigitangira  cyashyizwemo miliyari 100 z’amafaranga y’u Rwanda agenda asaranganywa hashingiwe ku nzego zari zarahungabanyijwe cyane na kiriya cyorezo.

Ati: “Dutangira  twashyizemo miliyari 100 z’amafaranga y’u Rwanda, ayo mafaranga tureba ukuntu tuyagabanya inzego ( Sectors) dukurikije izababaraga cyane muri icyo gihe, twahereye ku mahoteli, ubu rero twasanze byaragize akamaro  dufata umwanzuro wo kongera ikigega”.

Yasobanuye ko mu minsi mike iri imbere  bazamurika ku mugaragaro icyiciro cya kabiri cy’iki kigega kugira ngo abaturage bumve ko kigikomeza.

Minisitiri w’Intebe Dr. Ngirente yakomeje agira ati: “… n’imikorere yacyo yaravuguruwe, buriya ikintu iyo kigitangira… twari no muri Covid, hari abatarakigezeho neza, ndetse nta n’ubwo twacyamamaje uko bikwiye  ariko uko Covid igenda igabanyuka tuzacyamamaza kurushaho abantu babashe kukigeraho”.

Yanasobanuye impamvu hashyizweho umwihariko mu gufasha amahoteli. Ati: “Iyo tuvuze guteza imbere amahoteli, bamwe bumva ko ari amahoteli gusa dufashije, ariko buriya kugira ngo ubuhinzi butere imbere ni uko amahoteli agurira abahinzi. Iyo dufasha amahoteli tuba tugira ngo dufashe isoko ry’abahinzi bacu babone aho bagurisha”.

Yatanze ingero z’uko nko mu gihe cya Guma mu Rugo, amahoteli na resitora bidakora  habayeho ikibazo cy’ isoko ku bahinzi n’aborozi kuko bari babuze aho bagurisha umusaruro wabo.

 Minisitiri w’Imari n’Igenamigambi, Dr. Ndagijimana Uzziel, na we yavuze ko ubukerarugendo bumaze guhagarara COVID-19  igitangira amahoteli menshi yari afite ibibazo biremereye adakora kandi afite n’imyenda muri za banki.

Yagaragaje ko miliyari zigera kuri 42 z’amafaranga y’u Rwanda  zafashije amahoteli agera ku 139 mu gihugu, ashobora koroherezwa umwenda yishyura buhoro buhoro, ndetse ahabwa n’igihe cy’imyaka itatu kugira ngo uko ubuzima bugenda bugaruka azabashe kuva mu myenda.

Minisitiri w’Imari n’Igenamigambi, Dr. Ndagijimana Uzziel

Urundi rwego rwafashijwe ni urwo gutwara abantu n’ibintu mu buryo bwa rusange kuko na bo batakoraga cyangwa banakora bagatwara abantu bakeya  bahana intera hirindwa ikwirakwizwa ry’iki cyorezo.

Ati: “Ikindi ni uko igiciro cy’ingendo cyagumye hasi, ibyo na byo byatumaga bahomba. Byasabaga ko Leta ibafasha, bafashijwe kuvugurura imyenda bari bafite mu mabanki ku buryo miliyari 7,7 zafashije mu myenda igera kuri 56”.

Minisitiri w’Imari n’Igenamigambi yakomeje avuga ko  abari muri urwo rwego bahawe n’ubufasha bw’amafaranga agera kuri miliyari 11 asimbura ibyo batakaje mu murimo wabo.

Urwego rw’uburezi na rwo rwarafashijwe, amashuri ya Leta yo yakomeje kubona ingengo y’imari agahemba abakozi, ariko ayigenga yahuye n’ikibazo kuko amafaranga ava mu babyeyi  kandi muri biriya bihe abanyeshuri ntibigaga.

Aya mashuri na yo yafashijwe mu kugabanya uburemere bw’imyenda yari afite ku buryo byatwaye amafaranga miliyari hafi 13, ku mashuri agera ku 116.

 Amafaranga agera kuri miliyari 11 yakoreshejwe mu gufasha izindi nzego kugira ngo zishobore kubona ayo zikoresha umunsi ku munsi.  Yafashije amasosiyete agera ku 156.

 Amasosiyete mato cyane n’ibigo biciriritse bigera ku 5852 na byo byahawe amafaranga asaga miliyari 6.

Minisitiri w’Imari n’Igenamigambi, Dr. Ndagijimana Uzziel, ati: “Ikigega cyarafashije cyane  kandi mu bikorwa bitandukanye; ari abogosha, ari abacura, ababaza, ari abafite bare na resitora, abafite amaduka mato,…”

Yakomeje avuga ko Leta yafashe icyemezo cyo kongera amafaranga mu kigega binyuze mu nguzanyo yatse kandi yagura n’ibikorwa bigomba gufashwa. Ariya mafaranga yavuzwe haruguru agiye kongerwamo azafasha abashoramari bashyashya cyangwa abashaka kwagura ibyo bakoraga.

 Hari kandi miliyari 100 z’amafaranga y’u Rwanda  zizakomeza gufasha ziriya nzego zafashijwe, ku buryo ikigega kigiye kuva kuri miliyari 100 kikagera  kuri miliyari 350 z’amafaranga y’u Rwanda.

Minisitiri w’Intebe Dr. Ngirente Edouard
  • NTAWITONDA JEAN CLAUDE
  • Werurwe 17, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE