Ikibazo cy’abaganga batera ikinya kiracyari ingorabahizi

  • Imvaho Nshya
  • Ugushyingo 4, 2023
  • Hashize amezi 7
Image

Dr Muhumu Samuel, inzobere mu gutera ikinya, yavuze ko mu Rwanda hari ikibazo cy’ubuke bw’abatera ikinya. Byagarutsweho mu kiganiro ‘Waramutse Rwanda’ gitambuka kuri Televiziyo y’u Rwanda.

Ikibazo cy’ubuke bw’abatera ikinya, cyagarutsweho na Dr Yamuragiye Assumpta, umwarimu akaba n’umuyobozi w’ishami ry’abiga ikinya muri Kaminuza y’u Rwanda.

Dr Muhumu Samuel asobanura ko ikinya ari uburyo bwo kuvura bugamije gufasha umurwayi mu gihe agiye kubagwa.

Avuga ko kubagwa bitashoboka mu gihe umurwayi adahawe ikinya kuko ngo gifasha umurwayi kutababara mu gihe arimo kubagwa.

Ikinya gifasha umurwayi gusinzira no kutareba ibikorwa mu gihe arimo kubagwa ibyo ngo bigatuma aba ari mu mutuzo mu gihe arimo kubagwa.

Ati: “Icyo ukora ni ukugira ngo mu gihe cyo kubagwa umurwayi akurikiranwe atagira ikibazo icyo ari cyo cyose”.

Ufite ububasha bwo gutera ikinya, ni umuganga wabyize kuko ngo abatera ikinya bisaba ko baba bafite ubumenyi bwihariye akaba ari yo mpamvu ntawatera ikinya atarabyize.

Dr Muhumu avuga ko inzobere mu kinya ari zo zivura indembe mu gihe zifite ububabare.

Dr Assumpta Yamuragiye, umwarimu muri Kaminuza y’u Rwanda mu ishami ryigisha ikinya, ahamya ko abanyeshuri ari bakeya mu mwuga w’ikinya agereranyije n’umubare ukenewe.

Agaragaza ko hari abatazi ikinya kuko n’iyo abanyeshuri basaba ngo ntibaba babizi.

Akomeza agira ati “Buhoro buhoro uko tugenda tubibakangurira, n’ishami ry’ikinya bagenda babyumva bakajyamo”.

Haracyariho inzira ndende kugira ngo bakore ubukangurambaga n’ubuvugizi kugira ngo abantu bamenye ikinya icyo ari cyo, bamenye n’ubyize icyo azakora.

Ati “Abatera ikinya hanze baracyari bake cyane. Kuva Kaminuza y’u Rwanda yatangiza ishami ry’abiga ikinya, abamaze kurangiza bagera kuri 553.

Ariko wareba hanze ugasanga abari mu mwuga bakora baragera kuri 333 ushyizemo abakora mu mavuriro ya Leta n’ayigenga, wareba n’uko ibitaro bingana ugasanga baracyari bake cyane”.

Avuga ko akazi k’ikinya ari kenshi kuko n’ugeze muri uwo mwuga agasanga amafaranga ari make bitewe n’ingufu umwuga ubasaba, bamwe bahitamo kwigendera.

Akomeza agira ati “Haracyarimo imbogamizi zo kubona uburyo bwo gukomeza cyane cyane muri icyo cyiciro bakabura aho bakomereza amasomo ngo babone ikiciro cya gatatu cya Kaminuza kugira ngo bazamure umushahara, bagahitamo kwigendera bakajya kwiga indi myuga ishamikiye ku buvuzi”.

Nshimyumukiza Elise Mathieu, umunyeshuri mu ishami ry’ikinya muri Kaminuza y’u Rwanda, avuga ko guhitamo kwiga ikinya yabishishikarijwe n’umwarimu wamwigishaga mu mashuri yisumbuye.

Na we ashimangira ko hari benshi bari bazi ko umwuga w’ikinya wigishwa muri Kaminuza y’u Rwanda.

Asobanura uko yisanze agiye kwiga ikinya. Ati “Umwarimu wanjye yari abizi arandeba aravuga ngo namenya gutera ikinya nanjye ndagenda nkora ubushakashatsi menya uko bikorwa mbona ni ibintu byiza cyane, ndabikunda”.

Dr Muhumu avuga ko ikibazo cy’ubuke bw’abaganga b’inzobere mu kinya na Minisiteri y’Ubuzima ikizi.

Avuga ko mu 2021 mu gihugu hari abaganga 40 b’inzobere mu kinya, ubu ngo abaganga b’inzobere bahari babarirwa hagati ya 40 na 50. Ati “Nanone ni bake cyane”.

Ibi ngo bigira ingaruka ku baganga batera ikinya kuko ubuke bwabo butuma bashobora gukora amasaha menshi bagataha bananiwe ntibitume bashobora gukora izindi nshingano nko guhugura, kwigisha no gukora ubushakashatsi.

Raporo y’Ishyirahamwe ry’abakora umurimo wo gutera ikinya ku Isi (WFSA) yagaragaje ko muri Afurika y’Iburasirazuba abarwayi benshi bakeneye kubagwa batabona serivisi z’ikinya uko bikwiye bitewe n’ubuke bw’abaganga babikora.

Iyi raporo yakozwe mu 2015/2016 ivuga ko mu bihugu byo munsi y’ubutayu bwa Sahara harimo n’u Rwanda, umuganga umwe utera ikinya abarirwa abantu 100,000.

Ni mu gihe mu bihugu byateye imbere hari abatera ikinya nibura 20 ku bantu 100,000. Gutera ikinya kandi bigabanya imfu nyinshi n’ubumuga buterwa no kubagwa.

KAYITARE JEAN PAUL

  • Imvaho Nshya
  • Ugushyingo 4, 2023
  • Hashize amezi 7
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE