Iki Cyumweru kirasiga Rayon Sports ibonye umutoza mushya – Uwayezu Jean Fidèle

  • SHEMA IVAN
  • Mutarama 15, 2024
  • Hashize amezi 2
Image

Perezida wa Rayon Sports, Uwayezu Jean Fidèle, yatangaje ko bateganya kubona umutoza mushya muri iki cyumweru, Mohamed Wade agasubirana inshingano zo kuba Umutoza Wungirije.

Ibi yabitangaje mu kiganiro n’abanyamakuru cyabaye, kuri uyu wa Mbere tariki 15 Mutarama 2024 ku biro bikuru by’iyi kipe.

Uwayezu yavuze ko iki cyumweru cyirangira ikipe ifite umutoza mushya usimbura Mohamed wade.
Yagize ati’’ Iki cyumweru kirarangira Rayon sports ifite Umutoza mukuru mushya, Mohamed Wade akomeze nk’umutoza wungirije’’.

Iki cyemezo cyo gushaka umutoza mushya gifashwe nyuma yo gutakariza icyizere Mohamed Wade wari waragizwe umutoza mukuru bitewe no gutsindwa umukino w’umunsi wa 16 wa shampiyona na Gasogi United ibitego 2-1.

Amakuru agera ku Imvaho Nshya aravuga ko iyi kipe yatangiye ibiganiro n’abatoza batandukanye barimo Ndayizeye Jimmy usazwe ari umutoza wa Le Messager Ngozi yo mu Burundi.

Muri iki kiganiro Perezida wa Rayon Sports Uwayezu, yasabye imbabazi abafana nyuma yo gutsindwa na Gasogi United, abasaba kudacika intege kuko Shampiyona itararangira.

Yagize ati “Nitwatangiye igice cya Kabiri cya shampiyona neza kuko twaratsizwe, ndasaba imbabazi abafana ba Rayon Sports ku bw’uko twitwaye kandi ntibacike intege’’.

Kugeza ubu, ku utonde rwa Shampiyona ku munsi wa 16, Rayon Sports ni iya Kane n’amanota 27 irushwa na APR FC ya Mbere amanota Atandatu mu gihe Ikipe y’Ingabo itarakina umukino w’Umunsi wa 16 yari kwakiramo Marines FC kuri iki cyumweru tariki 14 Mutarama 2024 wagizwe ikirarane kubera ko yari yitabiriye irushwana rya Mapinduzi Cup 2024 muri Leta ya Zanzibar.

  • SHEMA IVAN
  • Mutarama 15, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE