IGP Dan Munyuza yahaye impanuro abapolisi bitegura kujya muri UNMISS

  • Imvaho Nshya
  • Mata 17, 2022
  • Hashize imyaka 2
Image

Mu gitondo cyo ku wa Gatandatu  taliki ya 16 Mata  2022, ku cyicaro gikuru cya Polisi y’u Rwanda giherereye ku Kacyiru , Umuyobozi Mukuru wa Polisi y’u Rwanda, Inspector General of Police (IGP) Dan Munyuza, yaganirije abapolisi 240  bitegura kujya mu gihugu cya Sudani y’Epfo mu ntara ya Upper Nile ahitwa Malakal, mu butumwa bw’Umuryango w’Abibumbye, bugamije kubungabunga amahoro muri icyo gihugu.

IGP Munyuza yabibukije ko bagomba kuzirikana ko bagiye bahagarariye u Rwanda, abasaba kuzitwara neza bakagera ikirenge mu cya bagenzi babo bagiye gusimbura ndetse bakanarenzaho.

Yagize ati “Mbere yo guhagararira Polisi y’u Rwanda muzirikane ko mugiye muhagarariye u Rwanda n’Abanyarwanda muri rusange, mugomba guharanira ko isura y’igihugu cyacu ihora igaragara neza mu mahanga.”

IGP Munyuza yakomeje abasaba kuzarangwa n’ikinyabupfura no gukora kinyamwuga nk’uko bisanzwe biranga Polisi y’u Rwanda.

Ati : “Murasabwa kuzakora akazi kabajyanye neza kandi kinyamwuga nk’uko bisanzwe bibaranga. Yababwiye ko akazi bagiyemo kabasaba imbaraga bitewe n’imiterere yako, bityo  kugira ngo babashe kugakora neza bibasaba kurangwa n’imyitwarire  myiza, ikinyabupfura n’ubunyamwuga nk’uko bisanzwe biranga Polisi y’u Rwanda.”

IGP Munyuza yakomeje abasaba kuzarangwa no kubahana hagati yabo ndetse no kubaha abandi baturuka mu bindi bihugu bazahurira mu butumwa bwo kubungabunga amahoro bagaharanira gushyira mu bikorwa amahugurwa bahawe.

Iri tsinda (RWAFPU1-7) riyobowe na Senior Superintendent of Police (SSP) Prudence Ngendahimana biteganyijwe ko rizahaguruka ejo ku kibuga cy’indege ryerekeza muri Sudani y’epfo aho rizasimbura irindi ryari rimaze umwaka mu butumwa bw’amahoro muri icyo gihugu.

  • Imvaho Nshya
  • Mata 17, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE