Igituma u Rwanda rudahaza isoko ry’inyama ryagutse mu mahanga

  • NTAWITONDA JEAN CLAUDE
  • Gicurasi 17, 2022
  • Hashize imyaka 2
Image

Inyama ni kimwe mu bicuruzwa bikunzwe cyane ku isoko ry’u Rwanda, aho bamwe bazifata nk’imbonekarimwe barya mu bihe bidasanzwe no mu birori n’iminsi mikuru, bitewe n’uburyo ubusanzwe usanga ikilo cyazo kiba kiri ku giciro gihanitse.

Mu gihe ba nyirazo bashobora kuzikumbura, ni nde watekereza ko mu mahanga hari abahora agatima karehareha bategereje kubona indege ikaruruka ibazaniye inyama zo mu rw’Imisozi 1000?

Imwe mu nkuru zishimishije ni uko u Rwanda rwohereza inyama mu bihugu by’abaturanyi nka Repubulika Iharanira Demokarasi ya Congo (RDC), Congo Brazzaville, Gabon ndetse n’ibyo muri Aziya n’i Burayi birimo Qatar na Oman.

Gusa ku rundi ruhande, byaba ari akaga kuba u Rwanda rushobora kubona inyama zihagije ariko ubuziranenge bw’amatungo, amabagiro n’uburyo bwo gutwaramo inyama bikaba bitagera ku bipimo bikenewe ku isoko mpuzamahanga.

Minisiteri y’Ubucuruzi n’Inganda (MINICOM) ivuga ko u Rwanda rufite amahirwe y’isoko rinini ry’inyama ariko usanga amatungo menshi atwarwa mu mahanga akiri mazima kubera ubushobozi budahagije bwo kuyabaga no kuyatunganya mu buryo bwubahirije amabwiriza y’ubuziranenge ku rwego mpuzamahanga.

Karangwa Cassien, Umuyobozi Ushinzwe Ibikorwa by’Ubucuruzi muri MINICOM, yabwiye itangazamakuru ko mu mahanga hoherejwe amatungo mazima cyane kurusha inyama zoherejwe zibazwe.

Yanavuze kandi ko inyama u Rwanda rwohereza mu mahanga zibazwe ziba ziri mu byiciro bibiri ari byo izabagiwe mu Gihugu ndetse n’izitumizwa mu mahanga zikongera koherezwa mu bindi bihugu (re-export).

Yasobanuye ko mu nyama zibazwe u Rwanda rwohereza mu mahanga mu mwaka ari zo mu Gihugu zingana n’ibilo 255,034 mu gihe izitumizwa zikongera koherezwa ku isoko ryo mu mahanga ni ibilo 415,253, bigatuma ingano y’inyama u Rwanda rwohereza mu mahanga ku mwaka zigera ku bilo 670,287.

Ku bijyanye n’amatungo yoherezwa mu mahanga atabaze yaba ari inka, ingurube, ihene, intama, inkwavu, inkoko, n’ayandi, nko mu mwaka wa 2019 u Rwanda rwohereje ibilo 4,397,095 by’amatungo mazima, mu 2020 rwohereza inyama zitabaze zingana n’ibilo 6,079, 903  naho mu 2021 zigera ku bilo 8,694,447.

Karangwa ati: “Murumva ko turamutse duteje imbere ibijyanye n’amabagiro, uburyo bwo gufata inyama neza no kuzohereza hanze iyi mibare amatungo mazima yoherezwa hanze ishobora kumanuka tukongera umubare w’inyama zibaze twohereza hanze.”

Yaboneyeho kugaragaza ko mu gihe amatungo agurishijwe atabazwe u Rwanda ruba ruhomba kuko iyo inyama zibagiwe mu Gihugu bitanga imirimo ku banyagihugu, impu zakuwe ku matungo na zo zikabyazwa umusaruro wihariye.

Abanyarwanda batangiye gusobanurirwa ubuziranenge bw’inyama

Guhera kuri uyu wa Kane taliki ya 17 Gicurasi, MINICOM ifatanyije n’Ikigo cy’Igihugu gishinzwe Ubugenzuzi bw’ Ubuziranenge, Ihiganwa mu bucuruzi no kurengera Umuguzi (RICA), Ikigo cy’Igihugu gishinzwe guteza imbere Ubuhinzi n’Ubworozi (RAB) n’abandi bafatanyabikorwa, batangije ubukangurambaga bugamije kwimakaza ubuziranenge bw’inyama mu Rwanda.

Guharanira ubuzirangenge bw’inyama mu Rwanda bivuze kunoza uruhererekane nyongeragaciro ku nyama, ari na byo bikenewe mu kongera ubuziranenge bw’inyama ziribwa mu Rwanda ndetse n’izicuruzwa ku isoko mpuzamahanga.

MINICOM ivuga ko ubu bukangurambaga bwatangijwe mu rwego rwo guharanira ko uruhererekane nyongeragaciro ku nyama rwarushaho kunozwa bityo inyama ziribwa mu Gihugu kimwe n’izoherezwa mu mahanga, zikiyongera kandi zikaba zujuje ubuziranenge bukenewe.

Mu gihe ubworozi bw’amatungo agenewe kubagwa ndetse n’ubucuruzi bw’inyama bikozwe kinyamwuga, ikibazo cy’inyama zatumizwaga mu mahanga kizakemuka ahubwo Igihugu kibe cyihagije ari na ko gisagurira n’amasoko.

Umuyobozi wa RICA Uwumukiza Beatrice, mu kiganiro n’abanyamakuru cyabaye kuri uyu wa Kabiri yavuze ko mu rwego rwo kunoza imikorere muri uru rwego hashyizweho amategeko ngengamikorere, n’amabwiriza, hanyuma hatangira kurebwa uko abantu babyubahiriza.

Yavuze ko ubukangurambaga bw’ukwezi bwatangiye gukorwa bugamije gusangiza Abanyarwanda amakuru ku bijyanye n’iyubahirizwa ry’amabwiriza y’ubuziranenge kugira ngo inyama bagura mu mabagiro atandukanye zibe zujuje ubuziranenge ku buryo zidashobora kubatera indwara n’ibindi bibazo by’ubuzima.

Leta y’u Rwanda yihaye intego yo kugeza umusaruro w’inyama zibagwa ku mwaka mu gihugu kuri toni 215,058 bitarenze mu mwaka wa 2024 hakaba hari icyizere cy’uko iyo ntego izagerwaho bitewe n’uko nko mu mwaka ushize wa 2021 uwo musaruro w’inyama wageze kuri toni 185,989.

Uko imyaka ihita ni ko amatungo agenda yiyongera n’umusaruro w’inyama ukiyongera, cyane ko nko mu mwaka wa 2012 umusaruro w’inyama wabonetse wabarirwaga muri toni 76,830 gusa.

  • NTAWITONDA JEAN CLAUDE
  • Gicurasi 17, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE