Igikombe cy’Intwari: Police FC yasezereye Rayon Sports, isanga APR FC kuri finali

  • SHEMA IVAN
  • Mutarama 28, 2024
  • Hashize ibyumweru 3
Image

Police FC yasezereye Rayon Sports muri kimwe cya kabiri 1/2 cy’Igikombe cy’Intwari iyitsinze Penaliti 4-3 nyuma yuko amakipe yombi anganyije igitego kimwe kuri kimwe mu minota 90 y’umukino.

Uyu mukino wabaye ku mugoroba wo kuri iki Cyumweru tariki 28 Mutarama 2024, kuri Kigali Pele Stadium.

Amakipe yombi yatangiye asatirana ku mpande zombi buri kipe igera ku izamu.

Ku munota wa gatanu Police yabonye uburyo bwo gufungura amazamu ku mupira Peter Agblevor yinjiranye acenze abakinnyi babiri ba Rayon Sports, awutanze kuri Niyonsaba Eric ateye ishoti rijya hejuru y’izamu.

Rayon Sports yagarutse mu mukino ku munota wa 14′ ku mupira Muhire Kevin yahawe ari inyuma y’urubuga rw’amahina, ateye ishoti rikomeye rifatwa na Rukundo Onesime.

Rayon Sports yongeye kubona ubundi buryo bwo gufungura bw’igitego nyuma yaho Bugingo Hakim yatunguye Umunyezamu Rukundo Onesime ari inyuma y’urubuga rw’amahina, ateye  ishoti rikomeye rinyura hejuru y’izamu.

Mbere y’uko igice cya mbere kirangira ku munota wa 40, Tuyisenge Arsene wa Rayon Sports yahawe umupira ari mu ruhande rw’iburyo, awuhinduye ufatwa neza na Rukundo Onesime usimbutse, agwa hasi awufite mu biganza.

Igice cya mbere cyarangiye amakipe yombi anganyije ubusa ku busa

Mu gice cya kabiri Police FC yatangiye isatira izamu rya Rayon Sports binyuze ku mupira mwiza Hakizimana Muhadjiri yahawe ari inyuma y’urubuga rw’amahina, ateye ishoti rikomeye ryo hasi, Umunyezamu Ndiaye Khadime awushyira muri koruneri.

Ku munota wa 55 Rayon Sports yafunguye amazamu kuri Coup-Franc nziza yatewe na Luvumbu Nzinga Heritier nyuma y’ikosa ryakozwe na Bigirimana Abeddy.

Nyuma yo gutsindwa igitego Police FC yasatiriye izamu maze ku munota 62 ibona’ Coup-Franc nziza nyuma yuko Peter Agblevor yari akiniwe nabi na Mitima Isaac inyuma y’urubuga rw’amahina.

Hakizimana Muhadjiri yahannye ikosa, Umunyezamu Ndiaye akuramo umupira ujya muri koruneri.

Ku munota wa 69 Police FC yabonye igitego cyo kwishyura ku mupira Savio Nshuti yahinduye ukurwaho  nabi na Bugingo, awihera Peter Agblevor ahita uwuboneza mu izamu.

Ku munota wa 78 Rayon Sports yabonye uburyo bwo gutsinda igitego cya kabiri ku mupira Luvumbu yacomekeye  Bugingo Hakim ibumoso, ateye ishoti rikomeye rishyirwa muri koruneri na Rukundo Onesime.

Ku munota wa 85 Police FC yabonye Coup-Franc nyuma y’ikosa ryari rikorewe Adedy Bigirima.

Hakizimana Muhadjiri yahannye ikosa, akubita umupira mu rukuta mbere y’uko umugarukira awushyira hanze.

Iminota 90 y’umukino yarangiye amakipe yombi anganyije igitego kimwe kuri kimwe.

Hahise hitabazwa Penaliti maze Police FC itsinda Penaliti 4-3 za Rayon Sports.

Penaliti ebyiri za Rayon Sports zahushijwe na Charles Bbaale na Mitima Isaac mu gihe ku ruhande rwa Police FC ari Moses Seruyide.

Umukino wa nyuma uzahuza APR FC na Police FC tariki 1 Gashyantare 2024 , saa kumi n’ebyiri kuri Kigali Pele Stadium.

Mbere yaho hazaba umukino wa nyuma mu bagore uzahuza Rayon Sports WFC na AS Kigali WFC saa cyenda z’amanywa.

Ikipe izegukana igikombe mu bagabo izahabwa miliyoni 6 z’amafanga y’u Rwanda mu gihe mu bagore izahabwa miliyoni 4 z’amafanga y’u Rwanda.

Insanganyamatsiko y’Umunsi w’Intwari 2024 iragira iti “Ubutwari mu Banyarwanda, Agaciro Kacu”.

  • SHEMA IVAN
  • Mutarama 28, 2024
  • Hashize ibyumweru 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE