Igikombe Cy’Amahoro: Interforce yatsinze Rayon Sports ariko irasezererwa

  • SHEMA IVAN
  • Mutarama 23, 2024
  • Hashize amezi 4
Image

Interforce FC Yatsinze Rayon Sports ibitego 2-1, ariko isezererwa ku giteranyo cy’ibitego 5-2 mu mikino ibiri ya 1/8 cy’Igikombe cy’Amahoro.

Uyu mukino wabaye ku mugoroba wo kuri uyu wa Kabiri tariki 23 Mutarama 2024, kuri Kigali Pele Stadium.

Umukino ubanza warangiye Rayon sports itsinze interforce Ibitego 4-0.

Uyu mukino watangiye utuje amakipe yombi ntayisatira indi cyane.

Ku munota wa 18′ Rayon Sport yabonye uburyo bw’igitego ku mupira Alseny Camara yahawe ari inyuma y’urubuga rw’amahina, ateye ishoti rishyirwa muri koruneri n’Umunyezamu Moriah.

Umupira wasubijwe mu kibuga na Ganijuru, Mucyo Didier akinishije umutwe, ujya hejuru y’izamu.

Rayon sports yakinaga neza muri iyo minota yongeye kubona amahirwe yo gutsinda igitego ku mupira Ojera yacomekeye Youssef Rharb wacenze myugariro wa Interforce yinjira mu rubuga rw’amahina, ateye ishoti risubizwa inyuma n’Umunyezamu Irankunda Moriah  wigaragazaga cyane muri iyo minota ibanza.

Ku munota wa 30′ Interforce yafunguye amazamu kuri penaliti yatsinzwe na Kapiteni Mugisha nyuma y’uko Mucyo Didier Junior yari agushije mugenzi we Ishimwe Claude, mu rubuga rw’amahina.

Rayon Sports yabonye amahirwe yo kwishyura igitego ku munota wa 33 ku mupira Ndekwe Felix yinjiranye ku ruhande rw’iburyo yihuta cyane, ateye ishoti rikomeye rishyirwa muri koruneri n’umuzamu Irankunda Moriah.

Mbere y’uko igice cya mbere kirangira ku munota wa 40′, Rayon Sports yabonye amahirwe yo kwishyura ku ishoti rikomeye Joackiam Ojera yateye rifata igiti cy’izamu rivamo, Ndekwe asonzemo, Umunyezamu Moriah akuramo umupira usiganiwe n’abakinnyi ba Rayon Sports mbere y’uko Mvuyekure awutera ujya  hejuru y’izamu.

Igice cya mbere cyarangiye Interforce itsinze Rayon sports igitego 1-0.

Mu gice cya kabiri Interforce yakomeje gukina neza ishaka uko yakongera umubare w’ibitego.

Ku munota wa 54′ Interforce yabonye amahirwe yo gutsinda igitego cya kabiri ku mupira Cyuzuzo Elysee yinjiranye mu rubuga rw’amahina anyuze iburyo, ateye ishoti rifatwa neza n’umuzamu Khadime Ndiaye.

Nyuma y’iminota ibiri gusa Interforce yabonye igitego cya kabiri cyatsinzwe na Mugisha Irakoze ku mupira yatereye mu ruhande rw’iburyo, Umunyezamu Khadime ntiyabasha kuwuhagarika ujya mu rushundura.

Nyuma yo gutsindwa Ibitego bibiri, Rayon Sports yahise ikora impinduka hinjiramo Luvumbu, Muhire Kevin na Iraguha Hadji, basimbuye Camara, Youssef na Ndekwe Felix.

Ku munota wa 70′ Rayon Sports yabonye Penaliti nyuma yaho Joackiam Ojera agushijwe mu rubuga rw’amahina na Kamanzi Aboubakar, umusifuzi yatanze Penaliti uyu Munya-Uganda ayiteye, Umunyezamu Irankunda Moriah ayikuramo.

Ku munota wa 82 ‘Rayon Sports yabonye igitego cya mbere cyatsinzwe na Iraguha Hadji ku mupira yaherejwe na Muhire Kevin mu rubuga rw’amahina.

Nyuma yo kubona igitego kimwe muri bibiri yari yatsinzwe, Rayon Sports yakomeje gusatira cyane ishaka igitego cyo kwishyura ba myugariro ba Interforce bihagararaho ari na ko nayo inyuzamo igasatira.

Umukino warangiye Interforce FC itsinze Rayon Sports ibitego 2-1, ariko isezererwa ku giteranyo cy’ibitego 5-2 mu mikino ibiri ya 1/8 cy’Igikombe cy’Amahoro.

Muri 1/4, Rayon Sports izahura n’ikipe izakomeza hagati ya Musanze FC na Vision FC.

Undi mukino wabaye uyu munsi Kiyovu Sports yatsinze Girilla FC ibitego 3-1, ndetse bingana ibitego 3-3 mu mikino ibiri ya 1/8, byatumye isezererwa ku itegeko ry’igitego cyo hanze.

Indi mikino yo kwishyura ya 1/8 iteganyijwe ku wa Gatatu tariki 24 Mutarama 2024.

Musanze izakira Vision FC saa cyenda kuri Sitade Ubworoherane

Marine izakira Bugesera FC saa cyenda kuri Sitade Umuganda

Mukura Victory Sports izakira ADDAX FC saa cyenda kuri stade Mpuzamahanga ya Huye

Muhazi United izakira Gasogi United saa cyenda kuri stade ya Ngoma

Police FC izakira Kamonyi FC saa cyenda kuri Kigali Pele Stadium

APR FC izakira As Kigali saa kumi n’ebyiri kuri Kigali Pele Stadium

  • SHEMA IVAN
  • Mutarama 23, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE