Igihugu nticyatungana kidatanga ubutabera- Perezida Kagame

  • Imvaho Nshya
  • Ugushyingo 14, 2023
  • Hashize amezi 6
Image

Perezida wa Repubulika y’u Rwanda Paul Kagame, yibukije ko ntawuri hejuru y’amategeko, abantu bose bangana, kandi ko Igihugu kitabaho kidatanga ubutabera.

Ni ubutumwa yatanze ubwo yakiraga indahiro z’abacamanza baherutse gushyirwa mu myanya n’Umunyamabanga Mukuru wungirije w’Urwego rw’Igihugu rw’Ubugenzacyaha (RIB).

Abarahiye ni abacamanza mu Rukiko rw’Ikirenga Jean Bosco Kazungu na Isabelle Kalihangabo, abacamanza mu Rukiko rw’Ubujurire ari bo Angeline Rutazana na Xavier Ndahayo, Perezida w’Urukiko Rukuru Jean Pierre Habarurema n’Umunyamabanga Mukuru wungirije wa RIB Madamu Consolee Kamarampaka.

Yagize ati: “Igihugu nticyatungana kidafite gutanga ubutabera ku Munyarwanda uwo ari we wese. Amateka yacu turayazi, ibyagiye bibura bijyanye nubwo butabera ndetse bikagira n’ingaruka kuri Politiki y’Igihugu, bikagira ingaruka ku buzima bw’Abanyarwanda ibyo ndibwira ko tubizi bihagije, uburyo bigombna kuba byaravuyemo ibyo twize byinshi byatuma turushaho gukorera Igihugu cyacu neza n’Abanyarwanda bakagira ubuzima bakwiye”.

Uru rwego ni urwo hejuru ndetse rubanza mu zindi nzego harimo ibijyanye n’ubutabera ibyo bindi byose bigeza ku Banyarwanda.

Ati: “Ubutabera ni ngombwa kuri buri muntu wese, icyo binatubwira ni uko buriya imbere y’amategeko, mu butabera twese dukwiye kuba tungana ku buryo ntawurenga amategeko muri twe twese kugira ngo ubutabera bushoboke”.

Umukuru w’Igihugu yashimiye abo barahiye yibutsa ko icyangombwa ari ibiba bikubiye muri iyo ndahiro nk’inshingano byibutsa akazi karemereye abayobozi baba bafitiye igihugu.

Ati: “Abantu rero baba bashinzwe imirimo nk’iyongiyo bagomba gukurikirana kugira ngo ibyo byose bigerweho, ni akazi karemereye bidasubirwaho. Muri ibyo rero twibuka ko abari mu Nzego zitandukanye zo gutanga ubutabera batwibutsa ko ntawuri hejuru y’amategeko ndetse na bo ubwabo ntibari hejuru y’amategeko mu buryo bwo gutanga ubutabera, uri mu butabera icyo na cyo agomba kukibuka”.

Perezida Kagame kandi yavuze ko amakosa ajaya ahinduka ibyaha, ariko ko hagenderewe kubigabanya.

Ati: “Navuze amateka ariko hari n’ibindi bikorwa ariko tukabyumva ko mu buzima bw’abantu, mu mibereho y’abantu, ntabwo ibintu byose binoga uko bikwiriye hari abantu bakora amakosa ndetse amwe agahinduka ibyaha. Ariko iteka tuganisha ko twagabanya ibiba bitabereye abantu cyangwa bitabereyei mico cyangwa ubuzima bw’abantu”.

 Yongeyeho ati: “Ibindi rero na byo byaba ari politiki mbi, imyumvire mibi ibyo ni uguhora tubirwanya biba bikwiye. Iyo ufite ubushobozi nk’ubwo, aho ari wowe uca urubanza, gukurikirana ibyaha, ari wowe ubigenzura uko bikwiye ugomba kuba ari we wa mbere mu kugaragaza ko ibyo ubyubahiriza”.

Umukuru w’Igihugu yagarutse ku kuba umuntu aba atagomba kureba ku nyungu ze bwite, gusa cyangwa se iz’inshuri ze, ahubwo ari ugukorera mu nyungu z’Igihugu.

Ati: “Ntabwo wajya guca urubanza cyangwa mu bindi bikurikirana gushyira ibintu mu buryo ngo urebe inyungu zawe cyangwa z’inshuti zawe cyangwa iz’umuryango wawe cyangwa ushyire imbere inyungu zawe, ngo abe ariho uhera.

Muri izi nzego, buri wese ni inshuti yawe, buri wese ni umuryango wawe, ni byo bituma iyo ubireba utyo biduha ko abantu baringanira imbere y’amategeko cyangwa se mu kugezwaho ubutabera”.

Yongeyeho ati: “Ibi rero ndabivuga ariko nzi ko namwe mwese muzi uburemere bwabyo, ni ukugira ngo tujye twibutsa gusa kugira ngo twe kubusanya na byo kuko bifite  ingaruka zirenze ndetse amakosa akorwa ahandi, ibi rero ni ibyo tugomba kwitomdera.”

Mu gusoza, yashimiye abarahiye kandi abizeza imikoranire myiza ishoboka yose, bityo igihugu kikaba ari cyo gikwiriye kubigiramo inyungu ndetse bikagaragara mu ntambwe iterwa igana imbere.

NYIRANEZA JUDITH

  • Imvaho Nshya
  • Ugushyingo 14, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE