Igihugu gikomezwa no kubakira ku muco- Dr Bizimana

20 Ukwakira 2023 Saa 09:02

Yanditswe na Imvaho Nshya Ku ya 20 Ukwakira 2023 Saa 09:02 Umunota 1 wo gusoma

Igihugu gikomezwa no kubakira ku muco- Dr Bizimana

Minisiriti w’Ubumwe bw’Abanyarwanda n’Inshingano Mboneragihugu (MINUBUMWE) Dr Bizimana Jean Damascene, yifatanyije n’abayobozi n’abaturage bo mu Ntara y’Iburasirazuba mu biganiro ku ntambwe imaze guterwa mu kwimakaza Ubumwe n’Ubudaheranwa bw’Abanyarwanda, inzitizi zikigaragara n’ingamba zigomba gufatwa mu gushimangira Ubunyarwanda nk’isano ihuza Abanyarwanda bose.

Ni ibiganiro byabaye ku wa Kane tariki ya 19 Ukwakira 2023, yibutsa ko umuco ari ingenzi mu gutuma Igihugu gikomera.

Yagize ati: “Igihugu cyose kugira ngo gikomere cyubakira ku muco wacyo, ari yo mpamvu Abanyarwanda mu Cyerekezo 2050 biyemeje kubakira ku muco nyarwanda n’indangagaciro zawo. Ibi bigaragarira no mu mahitamo atatu bakoze yo kuba umwe, gukora neza inshingano no kureba kure”.

Minisitiri Dr Bizimana yasobanuye ibyaranze ubumwe bw’Abanyarwanda mu mateka y’Igihugu n’uburyo bwasenyutse bikozwe n’abakoloni n’abamisiyoneri binjije ingengabitekerezo ya mbatanye mbategeke mu Banyarwanda.

Yagaragaje ingaruka iyi politiki yateye u Rwanda kugeza kuri Jenoside yakorewe Abatutsi mu 1994, anerekana uburemere bw’ibikomere byatewe na yo n’ingamba zidasanzwe zashingiye ku ndangagaciro z’umuco nyarwanda harimo iy’ubudaheranwa mu kongera kubaka ubumwe bw’Abanyarwanda.

Yasabye ko muri uku kwezi k’Ubumwe n’Ubudaheranwa buri wese akwiye kwitekerezaho, akareba uruhare rwe mu gushimangira ubumwe bw’Abanyarwanda, ndetse mu biganiro abantu bakabwizanya ukuri ku nzitizi zigihari birinda kwibeshya ko Ubumwe bwagezweho 100%.

Dr Bizimana yashishikarije ababyeyi n’abarezi by’umwihariko kurushaho kumenya ibyasenye ubumwe bwacu mu mateka y’Igihugu ngo urubyiruko rukure rubizi kandi ruharanira kubaka u Rwanda rwa twese no kurinda ibyagezweho.

Yasoje asaba ko ibiganiro ku bumwe n’ubudaheranwa bigezwa mu midugudu yose, mu nzego z’imirimo, mu madini no ku miryango ishingiye ku myemerere kandi hakaganirwa ku nzitizi zigaragara aho abantu batuye cyangwa bakorera/bahurira zikibangamiye inzira y’ubumwe bw’Abanyarwanda.