Igiciro gihanitse cy’ingendo z’indege ni imbogamizi muri Afurika- Perezida Kagame

  • Imvaho Nshya
  • Ugushyingo 3, 2023
  • Hashize amezi 7
Image

Kugenda mu ndege ku mugabane w’Afurika bihenze cyane kurusha ku yindi migabane yose ku Isi, bikaba bigira ingaruka zikomeye ku bukerarugendo bukorerwa kuri uyu Mugabane ufite ibyiza nyaburanga byinshi.

Perezida wa Repubulika y’u Rwanda Paul Kagame, yakomoje ku mbogamizi z’igiciro gihanitse cy’ingendo zihanitse zo mu kirere ku bukerarugendo bukorerwa kuri uyu Mugabane, ubwo yatangizaga Inama y’Ihuriro ry’Abakora mu rwego rw’Ubukerarugendo ku Isi (WTTC) iteraniye i Kigali guhera ku wa Gatatu.

Ni inama ibaye ku nshuro yayo ya 23, ariko akaba ari yo ya mbere ibereye ku mugabane w’Afurika.

Perezida Kagame yagize ati: “Ku rwego rw’Isi, urwego rw’ubukerarugendo rwongeye kwiyubaka bikomeye. Ariko ikiguzi gihanitse cy’ingendo zo mu kirere zerekeza muri Afurika n’iz’imbere muri Afurika kiracyari imbogamizi.”

Impuguke mu bwikorezi bwo mu kirere zivuga ko imisoro ihanitse icibwa indege zikorera ku mugabane w’Afurika n’igiciro cy’amavuta zinywa kiba kiri hejuru ni zo mpamvu ziri hejuru y’izindi mu gutuma igiciro cy’indege cyikubye inshuro zirenze enye.

Urugero, urugendo rw’indege rw’amasaha atatu ruva i Berlin mu Budage rwerekeza muri Istanbul muri Turikiya rwishyurwa amadolari y’Amerika 150, ni ukuvuga amafaranga y’u Rwanda akabakaba 186,000.

Urwo rugendo rw’ibilometero 1,450 rujya kungana n’uruturuka i Kinshasa muri Repubulika Iharanira Demokarasi ya Congo (RDC) rwerekeza i Lagos muri Nigeria rungana n’ibilometero 1,785, rwishyuzwa amadolari y’Amerika agera kuri 850, ni ukuvuga amafaranga y’u Rwanda asaga miliyoni imwe.

Izindi ngingo zifatwa nk’izituma ibiciro bitumbagira harimo kuba buri gihugu kiba gifite sosiyete y’indege imwe yihariye isoko, ibyerekezo birebire cyane kubera ko Afurika ari ngari kandi imijyi igezweho ifite ibibuga by’indege ikiri mike.

Haza kandi umutekano muke mu bihugu bimwe na bimwe ndetse n’ubushake buke bwa Politiki mu gushakira umuti iki kibazo.

Perezida Kagame yakomoje ku mushinga w’Umuryango w’Afurika Yunze Ubumwe (AU) wo gushyiraho Isoko Rusange ry’Ubwikorezi bwo mu Kirere (Single African Air Transport Market/SAATM) wemerera sosiyete z’indege zo muri Afurika gukorera mu bihugu byose nta nkomyi, nk’igisubizo kirambye cyagabanya ibiciro.

Yagize ati: “Ishyirwa mu bikorwa ry’Isoko Rusange ry’Ubwikorezi bwo mu Kirere ni umushinga w’ingenzi ukwiye kwihutishwa.”

Uyu mushinga ni wo uza imbere muri gahunda y’Icyerekezo 2063, aho ubwikorezi bwo mu kirere muri Afurika bwose bwahurizwa hamwe, buri sosiyete ikaba ifite uburenganzira bwo gutwara abagenzi muri buri gihugu nta zindi mbogamizi zibayeho.

Amasezerano ya Yamoussoukro ni yo yemeje bwa mbere ishyirwaho ry’uwo mushinga, akaba yaremerejwe mu Nteko Rusange ya AU yo mu mwaka wa 2015, ndetse uza no gutangizwa ku mugaragaro n’Abakuru b’Ibihugu na Guverinoma byo ku Mugabane w’Afurika muri Mutarama 2018.

Yvonne Manzi Makolo, Umuyobozi Mukuru wa Sosiyete Nyarwanda ikora ingendo zo mu kirere RwandAir, na we yashimangiye ko Isoko Rusange ry’Ubwikorezi bwo mu Kirere rikeneye kwihutishwa, asaba ibihugu by’Afurika gushyira mu bikorwa Politiki zo gufungurira ikirere sosiyete zose z’Afurika.

U Rwanda rwakuriyeho Visa Abanyafurika bose

Perezida Kagame yaboneyeho no kwibutsa ko mu gukuraho imbogamizi z’imingenderanire hagati y’Abanyafurika, u Rwanda rwakuyeho Visa ku baturage bose baturuka kuri uyu Mugabane.

Yagize ati: “Reka tureke kwihenda, buri Munyafurika ashobora gutega indege aza mu Rwanda igihe cyose abishakiye, kandi ntacyo azishyuzwa kugira ngo yinjire mu gihugu cyacu. Ntidukwiye kubura icyerekezo cy’isoko rusange ry’umugabane wacu.”

Yanavuze kandi ko Abanyafurika ari bo bagize ahazaza h’ubukerarugendo mpuzamahanga ku Isi mu gihe ubukungu bw’ibihugu byo ku mugabane buzakomeza gutera imbere ku muvuduko wo hejuru.

Yaboneyeho gusaba ibihugu by’Afurika gukorana bya hafi mu guharanira iterambere ry’Afurika nk’icyerekezo cya mbere cy’ubukerarugendo mpuzamahanga.

NTAWITONDA JEAN CLAUDE

  • Imvaho Nshya
  • Ugushyingo 3, 2023
  • Hashize amezi 7
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE