Ibyo wamenya kuri stade esheshatu zizakinirwaho Igikombe cy’Afurika cya 2023

  • SHEMA IVAN
  • Mutarama 10, 2024
  • Hashize amezi 4
Image

Mu gihe habura iminsi itatu ngo Côte d’Ivoire yakire imikino ya nyuma y’Igikombe cy’Afurika cy’umupira w’amaguru cya 2023, imyiteguro yo kucyakira irimo kugana ku musozo n’ibibuga bizakinirwaho byamaze gushyirwa ku murongo.

Muri iyi nkuru, Imvaho Nshya igiye kubatembereza Stade esheshatu zizakira iyi mikino ziri mu mijyi itanu izakinirwamo iri rushanwa rigiye kuba ku nshuro ya 34 kuva mu 1957.

Alassane Ouattara d’Ebimpé

Alassane Ouattara d’Ebimpé ni ikibuga giherereye mu Majyaruguru y’umurwa mukuru w’iki gihugu, Abidjan. Ni stade Olempike izajya iberaho imikino yose ya nyuma y’Igikombe cy’Afurika ndetse ni ho hazakinira Itsinda A, Côte d’Ivoire iherereyemo hamwe na Nigeria, Guinée Equatoriale na Guinée Bissau.

Iki kibuga cyuzuye ndetse kinatahwa mu 2020 gitwaye akayabo ka miliyoni 257 z’amadolari y’Amerika. Ni stade yitiriwe Perezida w’iki gihugu, Alassane Ouattara. Iri muri stade nini muri Afurika kuko yakira abantu ibihumbi 60 kandi bicaye neza.

Stade Félix Houphouët-Boigny

Félix Houphouët-Boigny ni stade yitiriwe uwabaye Perezida w’iki gihugu wa mbere, Félix Houphouët-Boigny, benshi bakunze kuyita ’Le Félici’a. Iki ni cyo kibuga gikunze gukinirwaho imikino ikomeye y’Ikipe y’Igihugu ya Côte d’Ivoire. Ivugururwa ryayo ryatwaye miliyoni 109,7 z’amadolari y’Amerika.

Si umupira w’amaguru ikinirwaho gusa kuko kiberaho indi mikino nka Rugby no gusiganwa ku maguru.

Ni stade ya kabiri nini muri iki gihugu, ikaba yarubatswe mu 1952 ariko ikaba yaravuguruwe inshuro nyinshi harimo mu 2009, 2017 na 2023 yitegura kwakira CAN 2023. Kuri ubu, ishobora kwakira abantu ibihumbi 50 bicaye neza.

Muri CAN 2023, iyi stade izifashishwa n’amakipe yo mu Itsinda B arimo Misiri, Ghana, Cap-Vert na Mozambique.

Stade Charles Konan Banny de Yamoussoukro

Charles Konan Banny Stadium ni ikibuga kimaze umwaka umwe cyubatswe mu mujyi utuwe cyane muri Côte d’Ivoire wa Yamoussoukro, ikaba ishobora kujyamo abantu ibihumbi 20.

Iyi na yo yitiriwe Umunyapolitiki Charles Konan Banny wabaye Minisitiri w’Intebe kugeza mu 2007 ariko akaza kwitaba Imana mu 2021. Imirimo yo kuyubaka yatwaye miliyoni 76 z’amadolari y’Amerika.

Muri iki gikombe cy’Afurika, izakinirwaho n’ibihugu biri mu Itsinda C ari byo Sénégal, Cameroun, Guinée na Gambia.

Stade de la Paix

Stade de la Paix ni ikibuga gikunze gukoreshwa cyane mu mikino ariko ikaba ishobora no kwakira ibirori n’ibitaramo bitandukanye muri iki gihugu aho iherereye mu Mujyi wa Bouaké. Uyu ni umujyi wa kabiri muri Côte d’Ivoire.

Iyi stade ishobora kwakira abantu ibihumbi 40, yubatswe mu 1984 mu gihe yatangiye kuvugururwa kuva mu 2020.

Kugeza muri uyu mwaka yarimo ikorerwamo imirimo ya nyuma yo kuyisana no kuyagura, yatwaye miliyoni 90,7 z’amadolari y’Amerika.

Muri CAN 2023, Stade de la Paix izakinirwaho n’Itsinda D ririmo Algérie, Burkina Faso, Mauritania na Angola.

Stade Amadou Gon Coulibaly

Amadou Gon Coulibaly ni imwe muri stade nshya zubakiwe kwakira Igikombe cy’Afurika, ikaba yaruzuye mu Ugushyingo 2023 itwaye miliyoni 81,6 z’amadolari y’Amerika. Yashyizwe i Korhogo, mu majyaruguru ya Côte d’Ivoire.

Iyi Stade yitiriwe uwahoze ari Minisitiri w’Intebe muri iki gihugu, Amadou Gon Coulibaly, witabye Imana mu 2020, irimo imyanya ibihumbi 20 by’abashobora gukurikirana imikino iberamo.

Mu Gikombe cy’Afurika, izifashishwa n’amakipe yo mu Itsinda E arimo Tunisia, Mali, Afurika y’Epfo na Namibia.

Stade Laurent Pokou

Laurent Pokou ni Stade nshya yafunguye imiryango tariki 9 Nzeri 2023 ndetse igahita initirirwa uwahoze ari Rutahizamu w’ikipe y’igihugu ya cote d’Ivoire ‘’Les Eléphants’’, Laurent Pokou, witabye Imana mu 2016 afite imyaka 69.

Stade Laurent Pokou yubatswe mu mujyi wa San Pedro, ishobora kwakira abantu ibihumbi 20 bicaye neza. Yuzuye itwaye akayabo ka miliyoni 67 z’amadolari y’Amerika.

izakinirwaho n’Itsinda F ririmo Maroc, Repubulika Iharanira Demokarasi ya Congo, Zambia na Tanzania.

  • SHEMA IVAN
  • Mutarama 10, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE