Iburengerazuba: ubutaka bugera ku 389 958 ntibwanditse kuri ba nyirabwo

  • NYIRANEZA JUDITH
  • Ukuboza 28, 2023
  • Hashize amezi 2
Image

Intara y’Iburengerazuba ibarurwamo ubutaka bugera ku 389 958 butarandikwa kuri ba nyirabwo, Ubuyobozi bw’Intara bikaba bushishikariza abaturage kubwandikisha.

Ibi byagarutsweho mu nama yabereye ku Biro by’Intara y’Iburengerazuba kuri uyu wa Kane tariki ya 28 Ukuboza 2023 itegura igikorwa cyo gufasha abantu batandikishije ubutaka bwabo kwihutira kubwandikisha.

Ni inama Guverineri w’Intara y’Iburengerazuba Dushimimana Lambert ari kumwe n’intumwa z’Ikigo cy’Igihugu gishinzwe imikoreshereze y’Ubutaka bakoranye inama n’abayobozi b’Uturere, inzego z’umutekano mu rwego rwo gutanga umurongo ku gikorwa cyo gufasha abaturage kwandikisha ubutaka bwabo butanditse.

Imibare y’Ikigo cy’Igihugu gishinzwe imikoreshereze y’ubutaka igaragaza ko muri iyo ntara igizwe n’uturere 7 hari ubutaka bugera ku 389 958 butanditse kuri ba nyirabwo.

Nk’uko byasobanuwe muri iyi nama, hagizwe hati: “Mu Gihugu hari imitungo itanditse igera kuri 1 467 357 aho mu Turere tugize Intara y’Iburengerazuba ikihariye igera ku 389 958”.

Nk’uko byagenze no mu zindi ntara zabanje ndetse n’Umujyi wa Kigali, ni inama yitabiriwe n’inzego zitandukanye zose zizafasha kugira ngo icyo gikorwa kizagende neza kandi kirangire mu gihe cyateganyijwe.

Ubuyobozi bw’Uturere bukaba bwasabwe gukangurira abaturage kubyitabira bandikisha ubutaka bwabo.

Zimwe mu mpamvu z’ingenzi zituma uyu munsi hari ubutaka butanditse kuri ba nyirabwo harimo nko kudasobanukirwa akamaro kabyo, amakimbirane mu miryango, kwanga kubwandikisha ngo batazabutangira imisoro, ubutaka bw’imwe mu miryango yazimye muri Jenoside yakorewe Abatutsi mu 1994, …

Iki gikorwa cyo kwandika ubutaka butanditse mu Turere tugize Intara y’Iburengerazuba kizatangira ku wa 03 Mutarama 2024, aho kizamara ibyumweru bibiri.

  • NYIRANEZA JUDITH
  • Ukuboza 28, 2023
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE