Iburengerazuba: Ikiraro gihuza Nyamasheke na Karongi cyongeye kuba nyabagendwa

  • BAHUWIYONGERA SYLVESTRE
  • Mutarama 26, 2024
  • Hashize amezi 4
Image

Nyuma y’uko mu cyumweru gishize tariki ya 20 Mutarama, Imvaho Nshya yasohoye inkuru yavugaga ko abaturage bo mu Karere ka Nyamasheke n’abo mu Karere ka Karongi babangamiwe no kuba ikiraro cyahuzaga utwo Turere cyaracitse bikabangamira imigenderanire, ubu cyasanwe.

Ni ikiraro kiri ku mugezi wa Ruhinamavi uhuza Umudugudu wa Giti, mu Murenge wa Mahembe, Akarere ka Nyamasheke n’Umudugudu wa Mataba, Umurenge wa Gishyita mu Karere ka Karongi.

Abagituriye ku mpande zombi bavuga ko ari ingirakamaro cyane mu migenderanire, cyane ko abaturage b’Umurenge wa Mahembe bahaca bajya kwivuza cyangwa kugemurira ababo mu bitaro bya Mugonero muri Karongi, n’abaturua mu Karere ka Karongi bakagikoresha baza mu isoko rya Mugonero i Nyamasheke, kimwe n’abagikoresha mu zindi ngendo.

Icyo kiraro kinafasha kandi abanyeshuri b’Imirenge ya Gishyita na Twumba muri Karongi biga mu ishuri ribanza rya Giti na GS Mugonero muri Nyamasheke.

Iyo nkuru yasohotse ku wa 20 Mutarama abaturage batakamba ngo gikorwe, Guverineri w’Intara y’Iburengerazuba Dushimimana Lambert akabizeza ko hagiye kuba bashatswe igisubizo cyihutirwa cyatuma ubuzima bw’abagikoresha bukomeza igihe hategerejwe igisubizo kirambye, ubu noneho baravuga ko icyo gisubizo cyihutirwa cyabonetse ikiraro ari nyabagendwa.

Yabwiye Imvaho Nshya ati: “Cyari giteye impungenge kuko cyari  cyabujije imigenderanire y’imirenge yombi y’utwo Turere. Byari ngombwa ko gisanwa vuba vuba.’’

Nubwo cyasanwe cyongeye gushyirwaho ibiti nka mbere abaturage baracyagaragaza impungenge bakifuza ko harebwa uko bazashyirwaho igikomeye.

Muhayimana François ati: “Kirakozwe turabishimye, ariko biriya nyine ni ibyo kwifashisha by’igihe gito n’ubundi uko imvura igwa ari nyinshi inateza Ibiza bidasanzwe, biriya biti bishobora kuzongera kugwamo n’ubundi ibibazo bikavuka.  Nibanatekereze ibiramba, batumare impungenge duhorana.”

Umuyobozi w’ishuri ribanza rya Giti Mukandanga Marie Josée, na we yagize ati: “Impungenge twari dufite z’abana baturuka i Karongi bashoboraga kutaza kwiga igihe umugezi wakuzura, n’uburyo bazaga bagenda mu mazi, bamwe ababyeyi babo bakarinda kubaheka mu mugongo babambutsa ngo baze kwiga cyangwa gutaha, zo zibaye zishize ubu barahanyura neza nta kibazo.’’

Yungamo mu ry’abandi ,avuga ko biriya byakozwe n’abaturage, bitaramba hakwiye  gukorwa mu buryo butanga icyizere, kuko ari na byo bagiye basaba na mbere y’uko kiriya bari bashyizeho gicika, ariko ubwo ubuyobozi bw’Intara bubyibereyemo afite icyizere.

Ibyo bavuga na Guverineri Dushimimana Lambert arabyemera n’ibyo bifuza akabibizeza.

Ati: “Ni byiza ko dushaka igisubizo kirambye aho guhita twimura abo bana kuko na byo byadusaba kureba niba aho bakwimurirwa hari ibyumba by’amashuri bihagije. Ibiti birasaza cyane mu bihe by’imvura. Icy’ingenzi ni ukwihutira gutuma imigenderanire ikomeza, hanashakwa igisubizo kirambye, haba ikiraro cyo mu kirere cyangwa igikozwe mu bundi buryo.”

Yabwiye abaturage ko abayobozi bazakomeza gukora ibishoboka kugira ngo imigenderanire ikomeze.

  • BAHUWIYONGERA SYLVESTRE
  • Mutarama 26, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE