Iburengerazuba: Ikiraro gihuza Nyamasheke na Karongi cyaracitse bihagarika imigenderanire

  • BAHUWIYONGERA SYLVESTRE
  • Mutarama 20, 2024
  • Hashize ukwezi 1
Image

Umugezi wa Ruhinamavi waciye ikiraro gihuza Akarere ka Nyamasheke na Karongi bihagarika imigenderanire, ku buryo abaturage b’Imirenge ya Gishyita na Twumba mu Karere ka Karongi n’ab’Umurenge wa Mahembe mu Karere ka Nyamasheke batakigeneranira uko bikwiye.

Abo ni abakoresha ikiraro gihuza Umudugudu wa Giti muri Mahembe n’uwa Mataba muri Gishyita, by’umwihariko abanyeshuri bajya ku ishuri bambuka bavogagira muri uwo mugezi, bamwe bagahekwa ku mugongo n’ababyeyi babo cyangwa bagasiba ishuri.

Umwe muri abo baturage Muhayimana François yagize ati: “N’abanyeshuri baturuka mu Mirenge ya Karongi bajya kwiga mu ishuri ribanza rya Giti na GS Mugonero muri Mahembe, bibagora kujya ku ishuri kubera icyo kiraro cyacitse, kuhambuka bikabagora hakaba n’abahekwa n’ababyeyi babo.

Twanirwanyeho dugishyiraho ibiti by’inturusi, uko amazi y’umugezi wa Ruhinamavi ukinyuraho yagendaga yiyongera bitewe n’ubukana bw’imvura, haraguka harenga ibyo biti bigwamo nyuma bashyizeho n’ibya sipure bigwamo, ndetse hari n’uwanyereyeho yitura muri uwo mugezi.”

Yongeyeho ati: “Igihangayikishije cyane kurusha ibindi ni abana baturuka muri Karongi baza kwiga mu ishuri rishya ribanza rya Giti na GS Mugonero mu Murenge wa Mahembe, kuri ubu bambuka uwo mugezi   baca mu mazi, bavogagira n’amaguru,ku buryo imvura iguye ari nyinshi uwagerageza kuwambuka yagwamo akaba yanapfa.”

Umuyobozi w’ishuri ribanza rya Giti ryahashinzwe muri 2021, kugirango borohereze urugendo abana baturukaga mu Mirenge ya Gishyita na Twumba muri Karongi, bigaga muri GS Mugonero babazana aho hafi, Mukandanga Marie Josée yagaragaje impungenge zikomeye batewe n’iki kiraro.

Yagize ati: “Nk’ubuyobozi bw’ishuri ribanza rya Giti turahangayitse cyane kuko nk’ubu abana  baravogagira umugezi n’amaguru. Ibiti byari bitinze kiriya kiraro byaguyemo. Barayagendamo kuko imvura imaze iminsi mike itagwa amazi yagabanyutse. Iguye bari ku ishuri byabasaba kurara kandi ntaho twateganyije barara kandi ntibaba bagitashye.’’

Yongeyeho ati: “Kuko iyo iguye ari nyinshi amazi aba menshi cyane n’umuntu mukuru ntabe yahatambuka, bibaye nijoro, mugitondo ntibaba bakije kandi abaturuka muri ibyo bice biga hano ni hafi 50. Ikindi kidutera ubwoba ni uko n’ayo mazi tuvuga ko ari make, hasi ni ibibuye bisa, nk’umwana anyereye ku ibuye akagwamo ntiyagaruka. ‘’

Mukandanga anavuga ko uretse abanyeshuri, kinafasha cyane mu buhahirane hagati y’abaturage b’Uturere twombi, kikanafasha abaturage b’Imirenge ya Mahembe na Gihombo ya Nyamasheke bajya kwivuza ku bitaro bya Mugonero kuri Ngoma muri Karongi n’ababagemurira, aba Karongi barema isoko rya Mugonero muri Nyamasheke n’abandi bagikoresha mu ngendo zitandukanye za buri munsi.

Agaragaza impungenge kubuzima bw’abakoresha icyo kiraro bikadindiza iterambere ry’imiryango kuko hari ababyeyi bazinduka bahetse abana ngo babanze kubambutsa muri uwo mugezi bakanagaruka kubacyura banga ko batembana n’amazi.

Ati: “Hari n’ababyeyi baza bagaheka abana babo mu mugongo buri munsi baza ku ishuri, banataha, bakabambutsa uwo mugezi, hakanaba umwarimu uhigisha uturuka i Karongi, ugira na we abo aheka mu gitondo na nimugoroba abambutsa, ariko murumva ko igihe batakaza ari kinini cyane. Imvura yabaye nyinshi byo n’uwavuga ngo aragira uwo aheka yaba yikoraho.’’

Abona ikibazo gikwiye gukemurwa n’ubuyobozi bw’Intara y’Iburengerazuba, bukagikora mu buryo burambye.

Guverineri w’Intara y’Iburengerazuba,Dushimimana Lambert,yabwiye Imvaho Nshya ko yakivuganyeho n’ubuyobozi bw’Uturere twombi, ibyacyo biri mu nzira zo gukemuka.

Ati’’ Nasabye ubuyobozi bw’Uturere twombi kohereza itsinda duhuriyeho risuzuma icyahakorwa, cyatuma abakoresha kiriya kiraro ubuzima budahagarara.’’

  • BAHUWIYONGERA SYLVESTRE
  • Mutarama 20, 2024
  • Hashize ukwezi 1
TANGA IGITEKEREZO
Theodomir DUSINGIZIMANA says:
Mutarama 20, 2024 at 10:05 pm

Turashimira cyane iki kinyamakuru kidahwema kuba hafi intara yacu y,iburengerazuba.kandi iki kiraro ni ingenzi gusa tunasaba ababishinzwe ko hashyirwa ikiraro cyo mu kirere ok

Andika igitekerezo

AMATEGEKO AGENGA IYANDIKA RY'IGITEKEREZO CYAWE