Iburengerazuba: Dore impamvu Intara itesheje umuhigo w’umusoro weguriwe Uturere

  • NTAWITONDA JEAN CLAUDE
  • Ukwakira 15, 2022
  • Hashize imyaka 2
Image

Intara y’Iburengerazuba yinjije umusoro wa miliyari 11.1 umwaka ushize wa 2021/2022. Ubuyobozi bw’Ikigo cy’Imisoro n’Amahoro (RRA) bwatangaje ko bwakusanyije miliyari 11.1 y’umusoro wakomotse mu Ntara y’Iburengerazuba.

Ni mu gihe iyi Ntara yari yihaye intego yo kwinjiza miliyari 12.6 umwaka ushize.  

Habitegeko François, Guverineri w’Intara y’Iburengerazuba, asobanura ko iyi ntara itageze ku ntego kubera impamvu z’ibibazo by’amage u Rwanda ruvuyemo by’icyorezo cya COVID-19.

Ibi byagarutsweho ubwo Ikigo cy’Imisoro n’Amahoro cyashimiraga abasora mu Karere ka Rutsiro mu Ntara y’Iburengerazuba.

Guverineri Habitegeko yavuze ati : “Imisoro yeguriwe Inzego z’ibanze, ni imisoro ituruka ku bucuruzi buto buto bukorerwa mu karere kandi ubwo bucuruzi ahanini cyane bwisabiwe n’icyo cyorezo.

Inshuro nyinshi abaturage bari muri guma mu rugo, ngira ngo nabashimire uburyo babyitwayemo kuko icya mbere ni ubuzima”.

Akomeza agira ati “Ubwo rero twitwaye neza tukabasha kugihashya, ubuyobozi bwacu bukaduha inkingo tukikingiza ubu noneho dushobora gukora tukazamura za nzego zari zaragizweho ingaruka.

Inzego z’amahoteli, amaresitora, inzego z’ubwikorezi izo zose zagizweho n’ingaruka zikomeye n’icyorezo cya COVID-19”.

Ubuyobozi bw’Intara y’Iburengerazuba buvuga ko busabwa gushyiramo imbaraga kandi ko Inzego z’ibanze zizakomeza kuba hafi abacuruzi n’abikorera kugira ngo ubukungu buzahuke bityo n’iyi misoro ibashe kwinjira.

Komiseri Mukuru w’Ikigo k’Imisoro n’Amahoro, Ruganintwari Bizimana Pascal, avuga ko imisoro RRA yasabwe kwinjiza, intego yayigezeho uretse imisoro y’Inzego z’ibanze iki kigo kitashoboye kugeraho kubera impamvu z’icyorezo cya COVID-19.

Komiseri Mukuru wa RRA, Ruganintwari Bizimana Pascal yerekanye ko gukusanya imisoro 2021-2022 byagenze neza muri rusange (Foto RRA)

Akomeza avuga ko ku bijyaye no gukusanya imisoro muri rusange byagenze neza kubera ko ibitaragenze neza hari ibisobanuro bijyanye n’ingaruka z’icyorezo cya COVID-19.

Perezida w’Urugaga rw’Abikorera mu Ntara y’Iburengerazuba, Nkurunziza Ernest, asobanura ko mu misoro y’Uturere miliyari 12 Intara y’Iburengerazuba yagombaga kwinjiza, yinjije miliyari 11.1.

Nkurunziza na we ashimangira ko kutagera ku ntego bihaye byatewe n’icyorezo cya COVID-19.

Agira ati “Iyo urebye ikinyuranyo ntabwo ari kinini cyane kuko ni 0.9% kandi ibihe tuvuyemo ntabwo byari byoroheye abikorera.

Icyorezo cya COVID-19 cyatumye imirimo imwe n’imwe ihagarara ku buryo n’ubu tugihura n’ingaruka zacyo, nkaba numva kiriya kinyuranyo kitatera ubwoba, nizeye ko mu myaka itaha hari icyizere ko ibintu bizaba byarahindutse”.

FIBO MULTI-ACTIVITIES LTD umwe mu basora neza washimiwe na RRA. Ni Sosiyete ifite inzu y’ubucuruzi mu karere ka Ngororero (Foto RRA)
  • NTAWITONDA JEAN CLAUDE
  • Ukwakira 15, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE