Iburasirazuba: RRA yagaragaje impamvu yo kutinjiza imisoro yeguriwe Intara

  • NTAWITONDA JEAN CLAUDE
  • Ukwakira 24, 2022
  • Hashize umwaka 1
Image

Ikigo k’Imisoro n’Amahoro (RRA) cyatangaje ko mu mwaka wa 2021/2022 Intara y’Iburasirazuba yabonye umusaruro wakomotse mu Ntara by’umwihariko imisoro yeguriwe Uturere ingana na miliyari 34.9 mu mwaka wa 2021/2022, mu gihe iyi Ntara yagombaga kwinjiza miliyari  41.5.

Intara y’Iburasirazuba yashoboye kubona umusaruro wakomotse mu Ntara by’umwihariko imisoro y’ubutegetsi bwite bwa Leta ingana na miliyari 44.8 mu gihe yari yihaye intego yo kwinjiza miliyari 41.8 mu 2021/2022.

Batamuliza Hajara, Komiseri ushinzwe imisoro y’imbere mu gihugu muri RRA, yabigarutseho ubwo RRA yashimiraga abasora bo mu Ntara y’Iburasirazuba.

Komiseri Batamuliza yakomoje ku mitungo y’Uturere yagombaga kugurishwa itarashoboye kugurishwa ku mpamvu zitandukanye. Aha ni ho ahera asobanura impamvu Ntara y’Iburasirazuba itashoboye kugera ku ntego.

Yagize ati: “Hari ibindi bikorwa byari byarateganyijwe gukorwa muri uwo mwaka ariko bitakunze ku rwego rw’Inzego z’ibanze ibyo nabyo byabaye inzitizi.

Ingamba zihari mu guteganya gukusanya imisoro y’Inzego z’ibanze twabisubiyemo turabivugurura, ubu rero twizeye ko iyo mihigo tuzayigeraho 100% wenda tukanarenza”.

Yongeraho ko hari harimo ibirarane mbere, RRA itari yashoboye kwishyuza nkuko bikwiye, ubu ikaba irimo kunoza ibirarane kandi ngo birimo birishyuzwa.

Guverineri w’Intara y’Iburasurazuba, CG Gasana Emmanuel (Foto RRA)

Akomeza agira ati “Kubera icyorezo cya COVID-19 icyo gihe abaturage ntabwo bashoboye kwishyura ibirarane by’imisoro byari bihari.

Ingamba zihari ni uko turimo kwishyuza ibirarane ku buryo bufatika kandi urabona ko umusaruro urimo ugenda neza, muri uyu mwaka tukaba twizeye ko tuzagera ku ntego”.

CG Gasana K. Emmanuel, Guverineri w’Intara y’Iburasirazuba, agaragaza ko hari ibirimo gukorwa birimo n’ubukangurambaga kugira ngo imisoro yeguriwe Uturere ishobore kuzamuka.

Ati: “Hari ahantu dukwiye gushyiramo imbaraga nyinshi dukora ubukangurambaga, twegera abaturage bose. Icyo ni ikintu gikomeye cyane kugira ngo abaturage bumve neza uruhare bafite mu bibakorerwa cyangwa se uruhare rwabo mu gusora”.

Avuga ko Intara y’Iburasirazuba izakomeza gukumira magendu ku byambu bisaga 150 ku mupaka w’iy’Intara ukora mu Mirenge 23.

Nkurunziza Jean de Dieu, Perezida w’Urugaga rw’Abikorera mu Ntara y’Iburasirazuba, avuga ko hakiri urugendo akagaragaza ko hari ibibangamiye abikorera.

Asaba ko hakongerwa amahugurwa mu bijyanye n’ikoranabuhanga.

Yagize ati: “Ubona ko ikoranabuhanga rikwiye gushyirwamo imbaraga kandi rikava kuri Televiziyo rikagera mu Mirenge no mu Tugari bagakoresha za EBM na rya koranabuhanga turimo kugenda twinjiramo.

Ni yo mpamvu ayo mahugurwa y’ubukangurambaga bwahera hasi abarikoresha bakarimenya ku buryo butomoye”.

  • NTAWITONDA JEAN CLAUDE
  • Ukwakira 24, 2022
  • Hashize umwaka 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE