Iburasirazuba: Hagaragajwe uko umutekano uhagaze 

  • Imvaho Nshya
  • Mata 23, 2022
  • Hashize imyaka 2
Image

Inzego z’Umutekano mu Ntara y’Iburasirazuba zitangaza ko umutekano w’Intara umeze neza ariko hagaragazwa bimwe mu bishobora kuwubangamira. 

Umuyobozi wa Polisi mu ntara y’Iburasirazuba CP Emmanuel Hatari asobanura ko umutekano ureberwa mu kugira umwanzi kandi ngo iyi ntara nta mwanzi ifite, no kuba umuturage atekanye.

Yabigarutseho kuri uyu wa Gatanu taliki 22 Mata 2022 mu kiganiro cyahawe urubyiruko rw’abakorerabushake ruri mu mahugurwa mu ishuri rya Polisi i Gishari.

Iki kiganiro cyagarukaga ku ishusho y’umutekano mu Ntara y’Iburasirazuba n’uruhare rw’urubyiruko rw’abakorerabushake mu kuwusigasira.

Urubyiruko rusabwa imbaraga nyinshi kugira ngo abaturage babeho batekanye.

CP Hatari yagize ati “Umuturage ntiyatekana yaraye hanze kandi ntiyatekana yararanye n’amatungo.

CP Hatari E. Umuyobozi wa Polisi mu Ntara y’Iburasirazuba (uwa 2 iburyo), Nyombayire Richard Umuyobozi w’Abinjira n’Abasohoka, Rutaro Herbert Umuyobozi wa RIB na Gasana Richard Meya wa Gatsibo

Gutekana kwa mbere ni ukuba wahaze uryama ugasinzira. Uruhare rw’abakorerabushake ni ugukumira ibyaha. Birasaba gushyiramo imbaraga, kwigisha abaturage n’urubyiruko rugenzi rwanyu”.

Ashimira uruhare rw’urubyiruko mu gihe cya Covid19, akarusaba kwigisha abaturage bagahindura imyumvire ntibakomeze kugira umwanda.

Ati: “Icyo nababwira ni uko umuturage nagira umwanda azarwara, azasonza, dukwiye guhindura imyumvire y’abaturage bacu”. 

Umuyobozi w’Urwego rw’Ubugenzacyaha (RIB) mu Ntara y’Iburasirazuba Rutaro Herbert, asobanura ko zimwe mu nshingano za RIB ari ugukumira, gutahura no kugenza ibyaha.

Yerekana ko ibyaha biza ku isonga mu Ntara y’Iburasirazuba ari ugukubita no gukomeretsa, ubujura bukomeye n’ubworoheje, gusambanya abana n’ibiyobyabwenge.

Rutaro avuga ko ugiye gukora ibi byaha akenshi abanza gufata ibiyobyabwenge. 

Kimwe nk’ahandi hose mu gihugu, ubuyobozi bwa RIB mu Ntara y’Iburasirazuba buvuga ko hakigaragara ikibazo cy’amakimbirane yo mu miryango.

Rutaro yagize ati: “Igitera ibi byaha byose navuze, ubusinzi bukabije, ibiyobyabwenge, umujinya, kutamenya uburemere bw’ibyaha n’amategeko abahana”.

Yasabye urubyiruko rw’abakorerabushake gukora ubukangurambaga bugamije kwigisha abaturage. 

Umuyobozi w’Urwego rw’Abinjira n’Abasohoka mu gihugu Nyombayire Richard, avuga ko zimwe mu nshingano z’uru rwego harimo no gukumira ibyaha biva ku mupaka bitaragera mu gihugu.

Yasabye urubyiruko rw’abakorerabushake kwirinda kugirana ibiganiro n’uwo ari we wese baba baziranye cyangwa bataziranye.

Ati: “Ni byiza ko mwajya mugira amakenga, abinjira mu gihugu nukubitondera”.

Yatanze urugero rw’umupadiri wagiye muri kamwe mu Turere tugize Intara y’Iburasirazuba agafata abana agatangira kubapfura ingohe kugira ngo ajye kuzikorera ibizamini bya DNA ngo azamenye umuhutu n’umututsi.

Umuyobozi w’Akarere ka Gatsibo Richard Gasana, agaragaza ko ari inshingano z’abayobozi gukoresha urubyiruko by’umwihariko urw’abakorerabushake.

Agaciro k’imirimo y’amaboko urubyiruko rw’abakorerabushake rumaze gukora mu Ntara y’Iburasirazuba, CP Hatari avuga ko kabarirwa muri miliyoni zisaga 296. 

  • Imvaho Nshya
  • Mata 23, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE