Ibitaramo by’urwenya ‘Seka Live’ byasubukuwe

  • NTAWITONDA JEAN CLAUDE
  • Gicurasi 17, 2022
  • Hashize imyaka 2
Image

Ibitaramo bya ‘Seka Live’ byasubukuwe nyuma yuko byakomwe mu nkokora n’icyorezo cya COVID-19 cyashegeshe Isi, icy’uyu mwaka cyatumiwemo abanyamahanga ndetse n’abanyempano b’Abanyarwanda baba abakizamuka ndetse n’abubatse izina mu gutera urwenya mu Rwanda.

Umunyarwenya Nkusi Arthur uyobora Arthur Nation ari na yo itegura ibi bitaramo, yavuze ko abakunzi b’urwenya bazaza ari benshi kuko bahishiwe byinshi amatwi yabo atigeze yumva.

Mu kiganiro yagiranye n’Imvaho Nshya, Nkusi yagize ati: “Twari rumaze igihe kigera ku myaka itatu tudakora kubera icyorezo cya COVID-19, ubu rero ni umwanya mwiza wo kunezeza abantu, cyane ko hari benshi ubu bari baraheranwe n’agahinda gakabije batewe na COVID-19, ni umwanya mwiza rero bakaza kuruhuka mu mutima no mu bitekerezo.”

Yakomeje avuga ko muri iki gitaramo kizaba ku wa 29 Gicurasi hari abanyarwenya mpuzamahanga yatumiye, ndetse n’Abanyarwanda bafite impano abato azaha amahirwe yo kwigaragaza no kubafasha kuzamura impano zabo ndetse n’abandi bamaze kubaka izina mu Rwanda.

Biteganyijwe ko Nkusi Arthur azataramana n’abandi banyarwenya barimo; Carl Joshua wo muri Zimbabwe, Japhet na Etienne bazwi muri Bigomba guhinduka, Nimu Roger, Merci n’abanyarwenya bashya bamaze iminsi bigaragaza mu bitaramo byiswe ‘Merci & Gen Z’.

Hari abandi banyarwenya bataratangazwa, aho igitaramo kizabera ndetse n’ikiguzi cy’itike yo kwinjira bizatangazwa mu minsi iri imbere.

Ibyo wamenya ku cyamamare mu gutera urwenya Loyiso Madinga wo muri Africa y’Epfo utumiwe bwa kabiri muri ibi bitaramo, dore ko izina rye rimaze gusakara muri Afurika yose ndetse no ku Isi.

Madinga asanzwe ari umunyarwenya, umukinnyi n’umwanditsi wa filime akaba n’umushyushyarugamba ukomeye ku rwego rw’Afurika, aho afatwa nk’umwe mu bazamuye Ibendera ry’Igihugu cye mu ruhando mpuzamahanga mu bijyanye no gusetsa.

Yavutse mu 1987, akaba amaze imyaka irenga icumi mu mwuga wo gusetsa abantu mu birori bitandukanye. Uyu mugabo yavukiye mu muryango wifashije, Se yari umuganga mu gihe nyina adakunze kugarukwaho cyane.

Inshuro nyinshi mu biganiro n’abanyamakuru, Madinga ahamya ko yakuze arebera kuri Eddie Murphy mu mwuga ndetse bikaba byaramuteye imbaraga zo gushaka kuba umunyarwenya w’icyamamare ku Isi.

Izina rye ryarushijeho gukura mu 2019 ubwo yagaragaraga muri filime yiswe ’Comedians of the world’ yasohotse muri uwo mwaka iranamamara cyane, ndetse yanongeye kugaragara muri filime yiswe ’Queen Sono’ yasohotse mu 2020. Izi filime zombi zatambutse kuri Netflix.

Loyiso Madinga watumiwe muri Seka Live, ari mu banyarwenya bategerejwe gutaramira i Kigali
Nkusi Arthur Umunyarwenya uteura ibi bitaramo bya ‘Seka Live’
Carl wo muri Zimbabwe nawe yatumiwe muri iki gitaramo
Rusine Patrick ukunda gusetsa abantu asa n’umusinzi nawe ari mubazasusurutsa abazitabira Seka Live
  • NTAWITONDA JEAN CLAUDE
  • Gicurasi 17, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE