Ibiro bishinzwe inyungu za Canada mu Rwanda bigiye guhindurwa Ambasade

  • NTAWITONDA JEAN CLAUDE
  • Kamena 23, 2022
  • Hashize imyaka 2
Image

Minisitiri w’Ububanyi n’Amahanga wa Canada Mélanie Joly, yatangaje ko biteguye ibiro bishinzwe inyungu za Canada biri i Kigali bigiye guhindurwamo Ambasade mu rwego rwo kurushaho kwimakaza ubutwererane bw’ibihugu byombi mu nzego zitandukanye.

Ibyo biro bikorera mu Kiyovu mu Mujyi wa Kigali bisanzwe bishinzwe inyungu za Canada mu Rwanda n’u Burundi biyobowe na François Quenneville-Dumont, wagize ati: “Iyi ni inkuru nziza ku Rwanda na Canada.”

Iyi Ambasade (High Commission) izaba ifite inshingano zo guhuza ibikorwa by’ubutwererane na Dipolomasi hagati y’u Rwanda na Canada nk’ibihugu bihuriye mu Muryango w’Ibihugu bikoresha Ururimi rw’Icyongereza (Commonwealth).

Biteganyijwe ko iyo Ambasade izongera ububasha bushyigikira ubutwererane mu nzego zinyuranye hagati y’u Rwanda na Canada hashingiwe ku nyungu ibihugu byombi bihuriyeho ndetse n’ubutwererane bushingiye ku miryango mpuzamahanga byombi bibereye abanyamuryango.

Uretse Commonwealth, undi muryango w’ingenzi ibihugu byombi bihuriramo ni uwa La Francopfonie (OIF) uhuza ibihugu bikoresha Ururimi rw’Igifaransa uyobowe n’Umunyamabanga Mukuru w’Umunyarwandakazi, Madamu Louise Mushikiwabo.

Minisitiri Jolly yanatangaje kandi ko Igihugu cye kigiye gushyiraho Ambasade n’Ambasaderi Uhoraho ugihagarariye mu Muryango w’Afurika Yunze Ubumwe (AU) uzaba afite icyicaro i Addis Ababa muri Ethiopia.

Ibyo ngo bizafasha Guverinoma ya Canada kurushaho kunoza umubano n’ibihugu by’Afurika binyuze muri uwo muryango ari na ko ishyigikira imbaraga zirimo gushyirwa mu kwimakaza ubufatanye mu guhangana n’imbogamizi zihuriweho.

Yakomeje ashimangira ko kuba Canada igiye kugira abayihagarariye mu Rwanda no muri AU ari indi ntambwe ikomeye cyane mu kugera ku ntego igihugu cyihaye yo kwagura no gushyigikira ibikorwa byayo muri Afurika.

Minisitiri Joly yagize ati: “Iyo nkuru yatangajwe irashimangira ukwiyemeza kwa Canada mu kwagura ibikorwa byacu muri Afurika, kandi bizongerera imbaraga ubufatanye bwacu n’abayobozi bo ku mugabane mu kwihutisha imishinga duhuriyeho. Igihe kirageze ngo twongere inkunga yacu mu kubaka amahoro n’umutekano mu Karere.”

Canada yiteze ko muri uko kwagura ubufatanye izagira uruhare mu gutanga ibisubizo ku bibazo by’umutekano byo ku Mugabane w’Afurika.

Minisitiri w’Ububanyi n’Amahanga wa Canada uri i Kigali, aganira n’abanyamakuru
  • NTAWITONDA JEAN CLAUDE
  • Kamena 23, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE