Ibiribwa begerejwe ku mupaka byagabanyije ingendo zitemewe muri Uganda

  • Imvaho Nshya
  • Ukwakira 2, 2023
  • Hashize amezi 8
Image

Abatuye mu Mirenge ikora ku mipaka mu Turere duhana imbibe n’Igihugu cya Uganda barashimira Perezida wa Repubulika y’u Rwanda Paul Kagame wabegereje amaguriro y’ibicuruzwa bajyaga gukura muri Uganda, ubu abambukiraga ku mipaka itemewe bakaba baragabanyutse cyane.

By’umwihariko, abaturage bo mu Mirenge yo mu Karere ka Burera bavuga ko gahunda y’amaguriro y’ibicuruzwa Leta yashyizeho yabaruhuye ingendo ndetse n’umutekano wabo ukomeza kuba nta makemwa.

Nyuma yo kubona ko bamwe mu baturage bo mu Turere twegereye imipaka y’u Rwanda na Uganda bajya gushaka ibicuruzwa byiganjemo ibiribwa na serivisi  muri Uganda, Leta yashyizeho amasoko maze abaturage bakajya bajya kuhagurira ibiribwa n’ibindi byatumye ingendo za hato na hato bajyaga bakora bambuka imipaka mu buryo bunyuranyije n’amategeko zigabanyuka.

Habumuremyi Jean Baptiste wo ku mupaka wa Cyanika yagize ati: “Iyi gahunda yatekerejwe na Perezida wa Repubulika wacu Paul Kagame ni ingenzi, kuko twajyaga twambuka muri Uganda gushaka yo kawunga, amavuta umuceri n’ibindi, twageragayo bakatwambura hakaba ubwo baduciye za miliyoni kugira ngo tubashe gusubira iwacu mu Rwanda. Ariko ubu byose birahari buracya tukaza guhahira hano ibyo dukeneye ntakwirirwa twambuka imipaka ngo badukubitireyo cyangwa se batwambure”.

Habumuremyi akomeza avuga ko muri iyo gahunda urubyiruko rwahabonye akazi.

Yagize ati: “Aya maguriro uretse no kuba dufatira hafi ibyo dukeneye ku giciro gito, n’urubyiruko rwa hano ku mipaka rwahaboneye akazi, ni rwo rupakira rugapakurura ibicuruzwa rugatwaza abaguzi mu gihe rwahoraga ruhanganye n’abashinzwe umutekano rujya gushaka ibiraka byo kwikorera imizigo muri Uganda. Ibikorwa nk’ibi turabishyigikiye cyane ahubwo bazaduhe n’inganda ku mipaka hano zikora ibyo twakagombye kujya kuzana hakurya”.

Mukandayisenga Solange na we ashimangira ko kuba bahahira mu Rwanda byatumye n’umutekano wabo barushaho kuwizera.

Ati: “Ubu rwose kuba duhahira hano iwacu ni ibintu byiza Perezida yatekereje, iyo twageraga mu masoko yo muri Uganda twarahahaga ariko nanone dufite ikibazo cy’ukuntu tuza kwambuka, bamwe twabaga twanyuze mu mashyamba ducungana n’Inzego z’umutekano, wababona kubera ko nawe wabaga uzi ko uri mu makosa ukiruka ugata ibyo wahashye cyangwa se ukaba wagwira ibuye ukavunika cyangwa ugakomereka. Mbese umutima wabaga wenda kukuvamo, ariko ubu ibintu ni byiza kandi tugura ku giciro cyiza”.

Mfizi Christophe, umucungamutungo w’imwe muri Kompanyi zicuruza ibiribwa n’ibindi bikoresho muri gahunda yatekerejwe na Leta yo kwegereza abaturage ibikenewe ku mupaka wa Cyanika, yavuze ko byari ngombwa ko Abanyarwanda bishakamo ibisubizo bakajya bahahira hafi.

Yagize ati: “Iyi gahunda y’uko Umunyarwanda ahahira hafi bitamugoye kandi yizeye umutekano we, yatanze ibisubizo byinshi, nka twe abacuruzi turunguka tukabaho neza, … ibigo by’amashuri hano muri Burera bihahira hano kandi ku biciro byiza bidategereje kujya hakurya, kuko inzu dukoreramo ni iz’Akarere kaduhaye kimwe no kugeza ibicuruzwa ku madepo yacu, urumva rero ko nta mpamvu yo kuzamura ibiciro”.

Mu Karere ka Burera iyi gahunda y’amaguriro ya hafi ikorera mu Mirenge itandatu ikora ku mipaka ya Uganda aho bacuruza umuceri, ibigori, ifu y’akawunga, amavuta, ibishyimbo n’ibindi.

Ibyo byatumye n’ibigo by’amashuri bigera kuri 13 byo muri iyo Mirenge bihahira hafi bikishyura amafaranga abonetse, mu gihe bamwe muri ba rwiyemezamirimo bandi bahoraga mu manza bashinja ayo mashuri kubambura.

Urubyiruko rwabonye akazi mu maguriro yubatswe ku mipaka

NGABOYABAHIZI PROTAIS

  • Imvaho Nshya
  • Ukwakira 2, 2023
  • Hashize amezi 8
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE