Ibimenyetso byatanzwe na RFI byorohereza ubutabera

  • Imvaho Nshya
  • Nzeri 15, 2023
  • Hashize amezi 9
Image

Inzego zitandukanye zirebana n’ubutabera Urwego rw’Ubugenzacyaha, Inkiko na Minisiteri y’Ubutabera muri rusange, zatangaje ko ibimenyetso bitangwa n’Ikigo cy’u Rwanda cy’ibimenyetso bishingiye ku bumenyi n’ubuhanga bikoreshwa mu butabera (RFI) byorohereza ubutabera.

Byakomojweho mu ntangiriro z’icyumweru gishize tariki 07 Nzeri 2023, ubwo hamurikwaga ku mugaragaro ikigo gishya cya RFI cyasimbuye Laboratwali y’igihugu y’ibimenyetso bya gihanga bikoreshwa mu butabera (RFL).

Umuyobozi Mukuru muri Minisiteri y’Ubutabera ushinzwe guhuza Ibikorwa by’Urwego rw’Ubutabera, Nabahire Anastase, agaragaza ko ibimenyetso ari ikintu gikomeye cyane mu butabera.

Ati “Ikimenyetso kibuze ibyo uvuga biba ari amangambure. Iri ni ishema ryacu, iyo urebye aho twavuye.

Ikimenyetso kidufasha gukumira icyaha, kugenza icyaha, gushinja icyaha ndetse no kugorora abamenyereye kwishora mu byaha”.

Ashimangira ko umugenzacyaha utanze ibimenyetso byavuye muri RFI, byorohereza akazi umushinjacyaha.

Akomeza avuga ko ibi byose RFI irimo kugeraho bizafasha guca intege abanyabyaha.

Ati “Imirimo y’iki kigo irafasha ubutabera bwacu ariko igakurura n’ubukerarugendo. Abazaza kugisura bazagenda mu modoka zacu, bazarara mu mahoteli yacu…”.

Harrison Mutabazi, Umuvugizi w’Inkiko mu Rwanda, avuga ko ibimenyetso byose birangirira mu nkiko.

Aha ni ho ahera avuga ati “Ibimenyetso bigomba kuba simusiga kugira ngo umuntu ahamwe n’icyaha cyangwa agirwe umwere”.

Mu buhamya bwe avuga ko RFI itarashyirwaho, imanza zatindaga kubera ibimenyetso byoherezwaga mu Budage ariko ngo kubera iki kigo cyaje birihutisha mu gutanga ubutabera ndetse n’akazi k’inkiko ngo kakihuta.

Urwego rw’Ubugenzacyaha (RIB) rutangaza ko iyi RFI ibafatiye runini cyane cyane mu butabera ndetse n’umutekano muri rusange.

Umugenzuzi Mukuru RIB, Maurice Murigo, yavuze ko RIB ari yo ntangiriro y’ubutabera ikaba n’umukiliya w’imena w’ikigo cya RFI.

Yagize ati “Ukurikije ibyo bamaze kudufasha, nta gushidikanya ko ejo hazaza h’ubutabera ari heza”.

Lt Col Dr Charles Karangwa, Umuyobozi Mukuru w’Ikigo cy’u Rwanda cy’ibimenyetso bishingiye ku bumenyi n’ubuhanga bikoreshwa mu butabera, RFI, yavuze ko serivisi RFI itanga zirushaho kurwanya ibyaha.

Akomeza avuga ko RFI ifite abakozi bize neza muri za Kaminuza no mu bigo byateye imbere.

Ati “RFI ifite ikoranabuhanga ikoresha rigezweho riyifasha gutanga serivisi zayo zose mu ikoranabuhanga kandi byongera amahirwe yo kubika amakuru”.

Ikigo gishya cya RFI cyasimbuye RFL

Lt Col Dr Charles Karangwa, Umuyobozi Mukuru wa RFI, avuga ko nyuma ya Jenoside yakorewe Abatutsi muri 1994, u Rwanda rwakomeje kwiyubaka by’umwihariko mu nzego z’ubutabera.

Ku bufatanye na Polisi n’inzego z’ubutabera zashyizeho ikigo gipima ibimenyetso bya gihanga byifashishwa mu butabera.

RFL yashyizweho n’itegeko N0 41/2016 ryo ku wa 15/10/2016.

RFI yasimbuye RFL, yo yashyizweho n’itegeko N0 049/2023 ryo ku wa 02/08/2023.

Mu 2023 Guverinoma y’u Rwanda yanzuye ko RFL yahinduka RFI, ikigo gishingiye ku bumenyi n’ubuhanga gishyirwaho n’iteka rya Perezida.

Lt Col Dr Karangwa avuga ko guhindura RFL ikaba RFI biha u Rwanda gupima ibimenyetso bya gihanga ku rwego mpuzamahanga.

Ubuyobozi bufite intego yo kugeza serivisi zayo mu bindi bihugu.

Mu 2005 yitwaga KFL ikaba yaracungwaga n’ishami rya Polisi rishinzwe iperereza (CID) ifatanyije n’Ubushinjacyaha bukuru bw’u Rwanda (NPPA).

Ubuyobozi bwa RFI bwishimira ko bufite abakiliya b’imena bahoraho nka RNP, RIB, RCS, RDF, NIDA, NPPA, NISS, ibigo byigenga, inkiko n’ibindi.

Kwagura imikoranire bituma bwagura ubushobozi bwabwo. Ibi bubihera ku kuba hari ibigo bikomeye RFI ikorana nabyo, ibyo mu Buhinde, mu Buholande n’ahandi.

RFI mu 2018-2019 yakiriye ibimenyetso bisaga 4,000 mu gihe mu 2021-2022 hakiriwe dosiye 9,935.

Ibibazo byakemutse kugeza mu kwezi kwa Nyakanga 2023, ni 37,363. Ubuyobozi bwa RFI bugaragaza ko ibyinshi ari ibyaha bijyanye n’ubugizi bwa nabi.

Kugeza ubu serivisi za RFI zose zijyana zikoresha ikoranabuhanga.

Imwe mu mishinga RFI iteganya gukora, ni wo kumenya niba ikinyabiziga kitarahinduriwe.

Hari umushinga kandi wo kumenya ko umutu yishwe n’ibyatsi.

Kugeza imishinga yayo mu ntara no ku bibuga by’indege.

Kugira ubushobozi bwo guhugura ababagana kugira ngo bashobore gukoresha serivisi zabo.

Hatangiye ubushakashatsi bwo kuzajya bamenya niba umubyeyi atwite umwana ufite ibibazo by’uburwayi bityo inda ikaba yakurwamo ku busabe bw’ubutabera.

KAYITARE JEAN PAUL

  • Imvaho Nshya
  • Nzeri 15, 2023
  • Hashize amezi 9
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE