Ibikorwa remezo bikomeje guhindura isura  y’Umujyi wa Musanze

  • Imvaho Nshya
  • Nzeri 25, 2023
  • Hashize amezi 8
Image

Abagana ndetse n’abaturiye Umujyi wa Musanze bishimiye iterambere n’impinduka bigenda bigaragara, kuko ubona bihindura isura nziza y’uyu mujyi bitandukanye no mu myaka yashize, bakaba babikesha imiyoborere myiza.

Mu mujyi wa Musanze kuri ubu hari inzu zigerekeranye zirimo kuzura kimwe n’izindi zirimo kuzamuka n’imihanda yagiye yubakwa mu nkengero z’umujyi; ibi ngo bituma uyu mujyi wa kabiri mu yunganira Umujyi wa Kigali ugaragaza impinduka nziza ku bawuturiye kimwe n’abawugana.

Ni umujyi w’ubukerarugendo, kubera Pariki y’Ibirunga, abaturage baganiriye n’Imvaho Nshya bavuga ko bishimiye impinduka mu iterambere.

Bizimungu Cyprien ni umwe mu bafite ibikorwa mu mujyi wa Musanze, yagize ati: “Kuri ubu twishimira impinduka z’umujyi wacu mu iterambere ariko cyane cyane izi nyubako z’amagorofa zatumye umujyi ugaragara neza kandi bituma abawukoreramo biyongera kuko urumva inzu zariyongereye kubera ko zigerekeranye, byatumye amacumbi yiyongera mu mujyi wacu cyane ko aha ari igicumbi cy’ubukerarugendo mu majyaruguru”.

Aba baturage bo muri uyu mujyi bongeraho ko ngo kwakira impinduka zo kuhavugurura byabagoye nk’uko Simbankabo Eulade abivuga.

Yagize ati: “Kuba uyu mujyi ugenda usa neza kandi waguka tubikesha imiyoborere myiza, mu 2018, ni bwo twasabwaga guhindura inzu twakoreragamo tukubaka izijyanye n’igihe urumva twasabwaga kubaka inzu zigerekeranye twumvaga ari ukuduhohotera, icyo gihe nta mafaranga yo kuvugurura twari dufite.

Kubera imiyoborere myiza ubuyobozi bwaduhuje n’ibigo by’imari, twarubatse inzu zacu zongererwa agaciro, tubona aho gukorera hisanzuye, ubu rero twebwe twiyemeje gukomeza gushimira Perezida Kagame udahwema kudutekerereza uyu mugi wacu kandi arawukunda kuko ntiyava mu majyaruguru ngo agere muri uyu mugi agende ataturamukije nta mpamvu rero y’uko umugi wacu utasa neza”.

Imihanda muri uyu mugi yariyongereye cyane cyane mu nkengero zawo, ikaba ari gahunda bari barasezeranyijwe na Perezida Paul Kagame.

Ibikorwa remezo bikomeje iwiyongera ku bwinshi, hari inyubako zuzuye n’izikirimo kwiyubaka

Dukundane Issa wo mu Kagali ka Ruhengeri, Umurenge wa Muhoza, Umudugudu wa Susa yagize ati: “Kuri ubu dufite imihanda myinshi ya kaburimbo kandi myiza, irimo kubakwa hano ndetse no mu yindi midugudu igize Umujyi wa Musanze ibi rero tubifitemo inyungu nyinshi cyane ubutaka bwacu bwongerewe agaciro kubera guturira imihanda ya kaburimbo, aho ubutaka bwaguraga amafaranga ibihumbi 300 ubu hageze muri miliyoni 15 urumva ko dufitemo inyungu nyinshi ikindi ni uko ubu dufite amatara ku mihanda”.

Abatwara abagenzi muri rusange n’akoresha ibinyabiziga mu ngendo nk’uko bamwe babivuga ngo imihanda ni kimwe mu byatumye boroherezwa ingorane bahuraga nazo cyane nk’ibinogo.

Rwicaninyoni Emmanuel ni umwe mu baturage  bo mu Murenge wa Musanze uturiye umuhanda wa kaburimbo uturuka ahitwa Kalisimbi- Kinigi avuga ko ntaho bazongera guhurira n’icyondo.

Yagize ati: “Kaburimbo yamaze kugeramo ituzaniye ibyiza byinshi. Nko kuba abagenda n’amaguru cyangwa ibinyabiziga, batazongera kugira aho bahurira n’ibyondo, ibiziba n’ibinogo byahoze muri uyu muhanda utarakorwa. Nk’abaturage byanaduteye akanyabugabo ko kuvugurura inzu zacu kuko bigaragara ko zimwe zishaje, bityo umujyi wacu urusheho gusa neza, binayongerere agaciro”.

Umwe mu batwara abagenzi ku igare, Mwambutsa yagize ati: “Ubu umugenzi turamugeza iyo ajya bitatugoye kandi mu gihe gito. Bitandukanye na mbere aho twagendaga mu muhanda wagera ahari ibinogo cyangwa amabuye menshi mukavaho mukagenda n’amaguru. Bikaba bibi cyane nko gutwara umugenzi wenda atazi neza aho agiye bikaba byatuma yanga kukwishyura. Ubu ntituzongera guhomba kuko iyo mihanda yari mibi yasimbujwe indi mishya ya kaburimbo”.

Akomerza avuga ko ngo ari nayo mpamvu bashimira Ubuyobozi bw’Igihugu bukomeje kubagezaho iterambere maze avuga ko inshingano yabo ari ugukomeza kubungabunga ibyo bagenda bagezwaho mu iterambere.

Kugeza ubu mu mugi wa Musanze mu kiciro cya gatatu hamaze kubakwa umuhanda wa km5, uturuka ahitwa mu Kizungu-Karisimbi-Susa-Nyamagumba uzatwara miliyari eshanu z’amafaranga y’u Rwanda.

Imihanda n’amashyanarazi bigaragara mu mujyi no mu nkengero zawo

NGABOYABAHIZI PROTAIS

  • Imvaho Nshya
  • Nzeri 25, 2023
  • Hashize amezi 8
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE